កម្លាំងការពាររួមតំបន់អឺរ៉ុប គឺជាការផ្តួចផ្តើមនឹងចង់បានរបស់ប្រធានាធិបតីបារំាង ហើយពេលនេះបានលេចចេញជារូបរាងហើយ នៅទីក្រុងប៉ារីស ដោយពេលដំបូង មាន៩ប្រទេសបានចូលរួម ។
ដោយមានការអំពាវនាវ ពីប្រធានាធិបតីបារាំង លោក Emmanuel Macron ស្តីពីការបង្កើត កម្លាំងការពាររួមនៅតំបន់អឺរ៉ុប ហើយពេលនេះ កម្លាំងទាហានរួមអឺរ៉ុប បានបង្ហាញរូបរាង ហើយ នៅថ្ងៃទី ៧ខែវិច្ឆិកា ។ កម្លាំងទាហានការពាររួម តំបន់អឺរ៉ុបនេះ នឹងធ្វើសកម្មភាព ចំពោះវិបត្តិផ្សេងៗនៅជាប់ព្រំដែន អឺរ៉ុប បានលេចចេញជារូបរាងនៅទីក្រុងប៉ារីសជាផ្លូវការ។
សកម្មភាពបង្ករកងកម្លាំងការពាររួម ស្នើរឡើងដោយ បារាំង ហើយកម្លាំងនេះ ស្ថិតនៅដាច់ដោយឡែកពីណាតូ ។ ការសម្រេចបង្កើតឡើង ក្រោយពេលដែល ណាតូ មានសញ្ញា មិនល្អក្រោមការដឹកនាំរបស់ប្រធានាធិបតីដូណាលត្រាំ ។
ប្រធានាធិបតីបារាំង លោក ម៉ាក្រុង បានស្នើបង្កើតកម្លាំងរួម រយៈពេលជាង ១ឆ្នាំកន្លងមក ប៉ុន្តែមិនទាន់បានសម្រេច ដោយសារតែមានបញ្ហាមួយចំនួន នៅក្នុងប្រទេសសម្ព័ន្ធមិត្តអឺរ៉ុប ។ មកទល់ពេលនេះ មាន៩ប្រទេសក្នុងតំបន់ ដូចជា អាល្លឺម៉ង់ ប៊ែលហ្សិច អង់គ្លេស ដាណឺម៉ាក អេស្តូនៀ ហុល្លង់ ហ្វាំងឡង់ អេស្បាញ ព័រទុយហ្គាល បានចូលរួមនៅក្នុងកម្លាំងការពាររួម ដែលស្នើឡើងដោយបារាំង ។ ប្រទេសជាសមាជិកនិង ធ្វើការវិភាគ ទៅលើវិបត្តិ និងមនុស្ស ដើម្បីដោះស្រាយ បញ្ហា ដែលប្រទេសក្នុងតំបន់ប្រឈមមុខ ។
ប្រធានគណកម្មការអឺរ៉ុប លោក Jean Claude Juncker បានគាំទ្រ អឺរ៉ុបចាំបាច់ត្រូវតែមានកម្លាំង ការពារឯករាជ្យ ពីណាតូ ។ តាមមន្ត្រីការពារជាតិ បារាំង បានបញ្ជាក់ថា អឺរ៉ុប នឹងមានសមត្ថភាពគ្រប់គ្រាន់ដើម្បី ការពារផលប្រយោជន៍រួម នៅក្នុងតំបន់ ដោយមិនចាំបាច់ កម្លាំងពីខាងក្រៅ ។
លោកJean Claude Juncker បានបញ្ចាក់ថា កម្លាំងការពាររួមខាងលើ មិនមានវិវាទ ឬទំនាសជាមួយ កម្លាំងណាតូឡើយ ហើយអាចចូលរួម នៅក្នុងសកម្មភាពដូចជាណាតូ ក្នុងបរវេនអឺរ៉ូប ៕
ដោយ៖ មែវ សាធី
