ខេត្តសៀមរាប៖ ផ្ទះប្រជាពលរដ្ឋ១ខ្នងមាន៥បន្ទប់ធ្វើពី លើថ្មក្រោមទំហំ៨មx២០ម ត្រូវបានអគ្គីភ័យឆាបឆេះអស់ទ្រព្យមួយចំនួនបណ្តាលមកពីទុស្សេខ្សែភ្លើង និងមនុស្សម្នាក់សន្លប់ ខណៈបុរសរូបនោះជួយពន្លត់ភ្លើងរអិលដួល ។
ហេតុការណ៍នេះកើតឡើងនៅវេលាម៉ោង១៩ និង៣០នាទី ថ្ងៃទី៣០ ខែវិច្ឆិកា ២០១៥ស្ថិតក្នុងភូមិបន្ទាយចាស់ សង្កាត់ស្លក្រាម ក្រុងសៀមរាបទល់មុខសណ្ណាគារសេរីភាព ។
តាមប្រភពព័ត៌មាន បានអោយដឹងថា នៅក្នុងបន្ទប់ផ្ទះកើតហេតុខាងលើគេឃើញផ្សេងហុយចេញពីបន្ទាប់ ដែលគេសង្ស័យថា ឆ្លងចរន្ដអគ្គិសនី បន្ទាប់ប្រជាពលរដ្ឋនិងម្ចាស់ផ្ទះបានយកបំពុងពន្លត់អគ្គីភ័យ ប៉ុន្ដែមិនអាចពន្លត់បាន ។ ប្រភពបន្ដថា បន្ទាប់មករថយន្ដពន្លត់អគ្គីភ័យបានបាញ់ទឹកពន្លត់ទើបរលត់ដោយសុវត្ថិភាព។ នៅក្នុងហេតុការណ៍នោះ មានបុរសម្នាក់បានដូលសន្លប់ ដោយសារជួយពន្លត់ភ្លើងជាន់ឈើរអិលដួល ប៉ុន្ដែគេមិនដឹងថា ជាម្ចាស់ផ្ទះឬអ្នកជិតខាងឡើយ រួចហើយសមត្ថកិច្ចហៅឡានពេទ្យបញ្ជូនទៅសង្គ្រោះបន្ទាន់ភ្លាម ។
អាជ្ញាធរក្រុងសៀមរាប បានឲ្យដឹងថា ម្ចាស់ផ្ទះមានឈ្មោះ ឆៃ សុខប៊ុនធឿន មុខរបរដឹកភ្ញៀវ ស្ថិតនៅភូមិបន្ទាយចាស់ សង្កាត់ស្លក្រាម ក្រុងសៀមរាប សរុបការខូចខាត បន្ទប់ជួល១ទំហំ៣មx៤ និងសម្ភារៈក្នងបន្ទប់មួយចំនួន ។ លោកបន្តថា មូលហេតុដែលបណ្តាលឲ្យមានការឆាបឆេះនេះគឺបណ្តាលមកពីទុស្សសេខ្សែភ្លើង ។
លោកបន្តទៀតថា នៅកន្លែងកើតហេតុក៏មានវត្តមានលោក ផល្លា ប្រធានក្រុមប្រឹក្សាខេត្តលោកអភិបាលខេត្ត និងកងកម្លាំងប្រដាប់អាវុធចុះមកជួយអន្តរាគមន៍ផងដែរ ។ លោកបន្ថែមថានៅក្នុងហេតុការណ៍ពន្លត់អគ្គីភ័យនេះសមត្ថកិច្ចប្រើប្រាស់រថយន្តពន្លត់ចំនួន២គ្រឿង ទើបអាចជួយពន្លត់បានដោយជោគជ័យនិងមិនមានរាលដាលដល់ផ្ទះជិតខាងនោះទេ ៕
ដោយ៖ ជានិរន្ដរ៍
