ប្រទេសប៉ាគីស្ថាន ៖ ការបាញ់ប្រហារ បណ្តាលឲ្យមនុស្ស ស្លាប់៧នាក់ ក្នុងនោះមានជនដៃដល់ ៣នាក់ ជាការវាយប្រហារភេរវកម្ម សម្តៅទៅលើពលរដ្ឋចិន។
សារព័ត៌មាន SCMP បានផ្សយាថា ៖មនុស្ស៧នាក់ស្លាប់ ក្នុងហេតុការណ៍វាយប្រហារទៅលើស្ថានទូតចិន នៅក្នុងទីក្រុង ការ៉ាជី ប្រទេសប៉ាគីស្ថាន ហើយក្រុមភេរវកម្មនៅក្នុងតំបន់ បានប្រកាសទទួលស្គាល់ថាជាសកម្មភាពរបស់ខ្លួន។
រដ្ឋាភីបាលទីក្រុងប៉េកាំងបានថ្កោលទោសយ៉ាងខ្លាំង ដល់ការវាយប្រហារ ទៅលើស្ថានទូតនៅ ទីក្រុង ការ៉ាជី កាលពីថ្ងៃទី២៣ខែវិច្ឆិកា បានសម្លាប់មនុស្ស៧នាក់ ក្នុងនោះមានប៉ូលិស២នាក់ និងពលរដ្ឋ២នាក់ ។
ខ្មាន់កាំភ្លើង ៣នាក់ បំពាក់ដោយកាំភ្លើងយន្តបានព្យាយាមចូលក្នុងស្ថានទូតចិន នៅវេលាម៉ោង៩និង៣០នាទីព្រឹក ។ ខ្មាន់កាំភ្លើងទាំងនោះត្រូវបានកម្លាំងសន្តិសុខរារាំង ហើយមានការបាញ់ប្រហារគ្នាកើតឡើង ។ ជនដៃដល់៣នាក់ត្រូវបានបាញ់សម្លាប់ ចំណែកបុគ្គលិកសន្តិសុខ ២នាក់ជនជាតិប៉ាគីស្ថានក៏បានស្លាប់ផងដែរ ។ ចំណែក មន្ត្រីស្ថានទូត នឹងគ្រួរសារមានសុវត្ថិភាព។
រដ្ឋមន្ត្រីការបរទេសចិន លោក វ៉ាងយី បានឲ្យដឹងថា៖ រាល់ការខិតខំដើម្បីបំផ្លាញទំនាក់ទំនង ដ៏ល្អរវាងចិន និង ប៉ាគីស្ថាន នឹងត្រូវបរាជ័យ ។ នៅក្នុងជំនួបពិភាក្សាតាមទូរស័ព្ទ ក្រោយហេតុការណ៍បាញ់ប្រហារភ្លាមៗ រវាងរដ្ឋមន្ត្រីការបរទេស ចិន និងប៉ាគីស្ថាន ភាគីចិនបង្ហាញពីទំនុកចិត្ត ទៅលើ សមត្ថភាព រក្សាសន្តិសុខស្ថេរភាពនៅក្នុងប្រទេសប៉ាគីស្ថាន ។
ក្រុមឧទ្ទាម រំដោះ Balochistan បានប្រកាស ទទួលខុសត្រូវពីការវាយប្រហារខាងលើ ។ ក្រុមភេរវកម្មខាងលើ ចាត់ទុកថាទីក្រុងប៉េកាំងជាអ្នករៀបចំ ចង់បំផ្លាញអនាគតរបស់ Balochistan ។
នេះជាការវាយប្រហារលើកទីពីរហើយសម្តៅពលរដ្ឋចិន នៅក្នុងទីក្រុង ការ៉ាជី ក្នុងពេល៤ខែកន្លងមក ។ កាលពីខែសីហា ឆ្នាំ២០១៨ ក៏មានការវាយប្រហារទៅលើ រថយន្ត ដឹក ក្រុមវិស្វករ ជនជាតិចិន បណ្តាលឲ្យរងរបួស ៦នាក់ ក្នុងនោះមានជនជាតិចិន៣នាក់។
តំបន់ Balochistan គឺជា មជ្ឈមណ្ឌុល សេដ្ឋកិច្ច ចិន-ប៉ាគីស្ថាន ។ បច្ចុប្បន្ន មានពលរដ្ឋចិន ជាង ៣មុឺននាក់កំពុងធ្វើការនៅទីនោះ ដោយមួយចំនួនធំធ្វើការអភិវឌ្ឍន៍ហេដ្ឋារចនាសម្ព័ន្ធ ធំៗ ដែលរដ្ឋាភិបាលទីក្រុងប៉េកាំងវិនិយោគមានទឹកប្រាក់រាប់សិបពាន់លានដុល្លារ ។
ចិនគឺជាសម្ព័ន្ធមិត្តយ៉ាងជិតស្និតជាមួយប៉ាគីស្ថាន បានចំណាយប្រាក់រាប់សិបពាន់លានដុល្លារទៅលើប្រទេសនេះ ប៉ុន្មានឆ្នាំចុងក្រោយនេះ ក្នុងនោះមានការកសាងកំពុងផែរសមុទ្រ ផងដែរ៕
ដោយ៖ មែវ សាធី
