ភ្នំពេញ៖ លោក ប៉ា សុជាតិវង្ស អភិបាលរាជធានីភ្នំពេញ បានធ្វើការព្រមាន ទៅចៅសង្កាត់ និងចៅហ្វាយខណ្ឌចំការមន ក្នុងកិច្ចប្រជុំ កាលពីរសៀលថ្ងៃទី០១ ខែធ្នូ នៅសាលាក្រុងថា លោកនិងចាត់វិធានការផ្លូវច្បាប់ ចំពោះប្រជាពលរដ្ឋណា  ដែលកំពុង រស់នៅលើសំណង់មិនរៀបរយក្នុងអាងស្តុបទឹកបឹងត្របែក លើប្រឡាយ និងមាត់ប្រឡាយ ឲ្យខានតែបាន បើទោះបី ដឹងថាអាជ្ញាធរមូលដ្ឋានព្យាយាមបិទបាំងការពារផលប្រយោជន៍ខ្លួនយ៉ាងណាក៍ដោយបើទោះបី សំណង់អ្នកនោះជាមន្ដ្រីថ្នាក់ ខ្ពស់ប៉ុនណាក៍ដោយ ព្រោះថ្នាក់លើបានបើកភ្លឿងខៀវឲ្យសាលារាជធានីភ្នំពេញយើងអនុវត្ដហើយ ។

នៅក្នុងកិច្ចប្រជុំនោះ លោក ប៉ា សុជាតិវង្ស  រួមនឹងមន្ត្រីជំនាញពាក់ព័ន្ធ ជាច្រើនរូបទៀតបានឯកភាព ពិភាក្សារកដំណោះស្រាយជូន ពលរដ្ឋ ដែល មានប័ណ្ណកម្មសិទ្ធត្រឹមត្រូវ ដោយរកទីតាំងសមរម្យនៅក្បែនោះជូនពួកគាត់ តែដោយឡែកប្រជាពលរដ្ឋណាដែលរស់នៅក្នុងសំណង់មិនរៀបរយក្នុងអាងស្តុបទឹកបឹងត្របែក ក្នុងពេលដែលយើងអនុវត្ដហើយមិនព្រមចេញ យើងនឹងមានវិធានការ ផ្លូវច្បាប់ផងដែរចំពោះការរំលោភយកដី និងគ្មានលិខិតស្នាមច្បាប់ទំលាប់មិនប្រកតីដែលអាជ្ញាធរបានប្រព្រឹត្តឃុបឃិតជាមួយនិងអនុវត្តច្បាប់បញ្ជូនទៅតុលាការ ។

ជាមួយការអភិវឌ្ឍក្នុងការរំដោះទឹកសំអុយនិងទឹកភ្លៀងនៅកណ្តាលក្រុងអង្គការចៃការក៍បានស្ថាបនានូវប្រព័ន្ធលូជាច្រើនហើយបានសូមឲ្យអាជ្ញាធរក្រុងធ្វើយ៉ាងណាស្តារប្រលាយបឹងត្របែក ដែលជាកត្តាសំខាន់ដើម្បីរំដោះនូវទឹកជំនន់ នារដូវវស្សា ភាគខាងត្បូងរាជធានីផងដែរ ។ ដោយតម្រូវឲ្យអាជ្ញាធរមូលដ្ឋានត្រូវយកចិត្តទុកដាក់ក្នុងការរៀបរយ សម្រួលជាមួយប្រជាពលរដ្ឋក្នុងពេលអនុវត្តគម្រោងនេះ ។

ជាមួយគ្នានេះដែរ លោក ប៉ា សុជាតិវង្ស ក៍បានសន្យាជាមុនថា៖  ក្នុងជំហានដំបូងអាជ្ញាធរនឹងចូលខ្លួនដោះស្រាយជាមួយប្រជាពលរដ្ឋ ដោយជ្រើសរើសយកវប្បធម៌សន្ទនាជាគ្រឹះនៃការដោះស្រាយ ដោយមិនឲ្យមានការឈឺចាប់ឡើយ ។

លោក ប៉ា សុជាតិវង្ស បានមានប្រសាសន៍លើកឡើងថា ការដែលសាលារាជធានីភ្នំពេញមកជួបប្រជុំពិភាក្សានេះ ក្នុងគោលបំណងរកផ្លូវកណ្ដាលមួយ ដើម្បីដោះស្រាយជាមួយបងប្អូនជាមួយប្រជាពលរដ្ឋ មិនឲ្យមានការឈឺចាប់ និងទទួលយកបានទាំងអស់គ្នាជៀសវាងការប្តឹងទៅតុលាការ ។

លោកបន្តថា៖ សម្រាប់កាកសំណល់ លាមក ទឹកស្អុយ ទឹកភ្លៀងនិងហូរមកចាក់នៅតំបន់អាងស្តុបទឹកបឹងត្របែកនេះនិងចាប់ផ្តើមធ្វើការស្ថាបនាក្នុងរដូវប្រាំងនៅពេលខាងមុខនេះ។ ដូច្នេះវាល្មមដល់ពេលត្រូវដោះស្រាយដើម្បីស្តារអាងស្តុបទឹកនេះហើយ ដោយយើងមិនអាចបណ្តែតបណ្តោយបានទៀតទេ វានឹងធ្វើឲ្យប៉ះពាល់ដល់ប្រជាពលរដ្ឋទាំងអស់នៅរាជធានីភ្នំពេញ ។

លោកបន្តថា៖ អាងស្តុបទឹកបឹងត្របែកខាងជើង នេះមានទំហំ៨ហិកតា និងខាងត្បូងមាន១៨ហិកតា តែពេលនេះត្រូវបានគេរំលោភយកអស់មួយចំនួនទៅហើយ ហើយចំនួនដែលនៅសល់នោះត្រូវបានគេអង្កន់ចែកគ្នាថែមទៀត។ ពាក់ព័ន្ធទៅនឹងការហាមប្រាមរបស់សាលារាជធានីភ្នំពេញជុំវិញការផ្ទេរ លក់ដូរ ដីតំបន់នេះ ប៉ុន្តែសកម្មភាពនេះនៅតែកើតមាន ហាក់មិនស្តាប់តាមការណែនាំរបស់សាលារាជធានីឡើយ។

លោកបន្តថា៖ តំបន់បឹងត្របែកនេះ អាជ្ញាធររាជធានីភ្នំពេញនឹងឲ្យប្រជាពលរដ្ឋជ្រើសរើសយកជម្រើស២យ៉ាង ដោយទី១–សាលារាជធានីភ្នំពេញអាចផ្តល់កម្មសិទ្ធិស្របច្បាប់ ប៉ុន្តែត្រូវទិញដីនេះពីរដ្ឋ ព្រោះវាជាដីរបស់រដ្ឋ ទី២–ប្រគល់ដីឲ្យរដ្ឋ រដ្ឋប្រគល់សំណងគោលនយោបាយឲ្យមកប្រជាពលរដ្ឋវិញ ។

លោកបានបញ្ជាក់ពីគោលជំហរថា៖  ការស្តារអាងស្តុបទឹកនេះត្រូវតែធ្វើជាបន្ទាន់ បើទោះបីក្នុងឧបសគ្គយ៉ាងណាក៍ដោយ ដែលតម្រូវឲ្យប្រជាពលរដ្ឋ ត្រូវសហការជាមួយអាជ្ញាធរនៅពេលស្តារ និងការចុះស្រង់ទិន្នន័យជាក់ស្តែង ។

ក្នុងកិច្ចប្រជុំនោះលោកព្រុំ សំខាន់ អភិបានខណ្ឌចំការមនបានលើកឡើងថា៖ ការប្រជុំរឿងបឹងត្របែកនេះមានរយៈពេល១០ឆ្នាំហើយគឺតាំងពីផ្ទៃបឹងធំរហូតដល់តូចពេលនេះបឹងត្របែកត្រូវមន្ត្រីនិងអាជ្ញាធរបានឃុបឃិតធ្វើលិខិតទិញលក់ពីមួយទៅមួយរហូតមានបញ្ហានៅពេលបច្ចុប្បន្ន ។

សូមបញ្ជាក់ថា៖ អាងស្តុកទឹកបឹងត្របែកមានទំហំ២៦ហិកតា ពេលនេះត្រូវបានគេរំលោភនៅសល់មិនដល់១០ហិកតាផង ដោយប្រជាពលរដ្ឋកាន់កាប់ដោយខុសច្បាប់ និងសាងសង់លំនៅដ្ឋានមានមិនតិចជាង ៣០០គ្រួសារឡើយ ៕

ដោយ៖ សំរិត