ភ្នំពេញ:បុរសម្នាក់ជិះម៉ូតូគ្មានកញ្ចក់ និងមិនពាក់មួកសុវត្ថិភាព ពេលសមត្ថកិច្ចដាក់គោលដៅពង្រឹងច្បាប់ចរាចរ ហើយព្យាយាមបើកបញ្ច្រាសផ្លូវដើម្បីគេងខ្លួន យក៏ជ្រុលទៅបុករថយន្តកុងតឺន័រមួយគ្រឿងទៀតដែលបើកស្របទិសដៅបណ្តាលឲ្យរងរបួសធ្ងន់។ហេតុការណ៍នេះបានកើតឡើង កាលពីម៉ោងជិត១០យប់ថ្ងៃទី០៦ ខែធ្នូ ឆ្នាំ២០១៨ នៅតាមបណ្ដោយផ្លូវលេខ២៧១ ខាងមុខវិទ្យាល័យជាស៊ីមសាមគ្គី ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ។
ប្រភពពត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស បើកបរម៉ូតូមួយគ្រឿងម៉ាក ហុងដាឌ្រីម ស៊េរី០១៧ ពណ៌ខ្មៅ ពាក់ស្លាកលេខ ភ្នំពេញ 1GD-3633 តាមបណ្តោយផ្លូវលេខ២៧១ ក្នុងទិសដៅពីត្បូងទៅជើង ខណៈមកដល់ក្បែរចំណុចកើតហេតុ ក៏មានកម្លាំងសមត្ថកិច្ចខណ្ឌទួលគោកកំពុងតែដាក់គោលដៅត្រួតពិនិត្យអាវុធជាតិផ្ទុះនិងពង្រឹងច្បាប់ចរាចរផ្លូវគោក។ ភ្លាមនោះដោយខ្លាចសមត្ថកិច្ចចាប់ផានពិន័យ ព្យាយាមជិះគេចខ្លួនឆ្លងទៅផ្លូវម្ខាងទៀត ដែលបញ្រ្ចាសទិសដៅចរាចរបានជ្រុលទៅបុករថយន្តកុងតឺន័រពណ៌ស ពាក់ស្លាកលេខ ភ្នំពេញ 3E-1605 ចំពីមុខពេញទំហឹងបណ្តោយអ្នកបើកបរម៉ូតូរងរបួសបាក់ជើងខាងស្តាំ។
បន្ទាប់ពីកើតហេតុជនរងគ្រោះត្រូវបានរថយន្តសង្គ្រោះបន្ទាន់របស់គ្លីនិកឯកជន ហុងហាក់ដឹកយកទៅសង្គ្រោះភ្លាមៗ។ ចំណែកម៉ូតូនិងរថយន្តត្រូវបានសមត្ថកិច្ចមូលដ្ឋានទាក់ទងទៅសមត្ថកិច្ចជំនាញឲ្យចុះមកយកទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំដោះស្រាយគ្នានៅពេលក្រោយ៕ជ្រោយពេជ្រ
