ខេត្តកណ្តាល៖ បុរសស្ត្រីពីរនាក់ប្តីប្រពន្ធជិះម៉ូតូឌុបគ្នាយ៉ាងលឿនតាមបណ្តោយផ្លូវលេខ៣៨០បណ្តាលឲ្យជ្រុលចង្កូតទៅបុកដើមនៅក្បែរចិញ្ចើមផ្លូវពេញមួយទំហឹង ធ្វើឲ្យបុរសជាប្តីស្លាប់បាត់បង់ជីវិតភ្លាមៗនៅកន្លែងកើតហេតុ រីឯស្ត្រីជាប្រពន្ធរងរបួសយ៉ាងធ្ងន់ធ្ងរត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ ។
ករណីគ្រោះថ្នាក់ចរាចរណ៍បង្កដោយខ្លួនឯងនេះបានកើតឡើងកាលពីវេលាម៉ោង២០និង១០នាទី ថ្ងៃទី០៣ ខែធ្នូ ឆ្នាំ២០១៥ លើកំណាត់ផ្លូវលេខ៣៨០ ស្ថិតក្នុងភូមិព្រែកតាបែន ឃុំព្រះប្រសប់ ស្រុកខ្សាច់កណ្តាល ខេត្តកណ្តាល ។
មន្ត្រីនគរបាលចរាចរណ៍ស្រុកខ្សាច់កណ្តាលបានឲ្យដឹងថា បុរសជាប្តីស្លាប់បាត់បង់ជីវិតនោះមានឈ្មោះ ធី រ៉ាវី អាយុ២០ឆ្នាំ រីឯស្ត្រីជាប្រពន្ធរងរបួសធ្ងន់នោះមានឈ្មោះ ចាន់ ណា អាយុ១៨ឆ្នាំ ។ ទាំង២នាក់នេះមានទីលំនៅក្នុងភូមិព្រែកតាបែន ឃុំព្រះប្រសប់ ស្រុកខ្សាច់កណ្តាល ជិះម៉ូតូម៉ាកស៊ុយហ្ស៊ូគីស្មាស់វី ធុនសេ១១០ ពណ៌សលាយខ្មៅ ពាក់ស្លាកលេខភ្នំពេញ1AR-4085 ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះពីរនាក់ប្តីប្រពន្ធខាងលើនេះជិះម៉ូតូឌុបគ្នាចេញពីផ្ទះឆ្ពោះទៅទិសខាងជើង ដោយបុរសជាប្តីជាអ្នកបើកបរម៉ូតូ ។ក្រោយពីចេញពីផ្ទះបាត់ជាច្រើនម៉ោងគេបានឃើញបុរសជាប្តីបើកម៉ូតូឌុបស្ត្រីជាប្រពន្ធត្រឡប់មកពីទិសខាងជើងវិញ ដោយល្បឿនលឿន ខណៈជិះជិតដល់ផ្ទះទៅហើយនោះម៉ូតូបានរេចង្កូតទៅស្តាំដៃធ្លាក់ចិញ្ចើផ្លូវបុកជាមួយដើមម្ខុបមួយដើមពេញមួយទំហឹង បណ្តាលឲ្យបុរសជាប្តីស្លាប់ភ្លាមៗនៅនិងកន្លែងកើតហេតុ រីឯស្ត្រីជាប្រពន្ធរងរបួសធ្ងន់ ។
បច្ចុប្បន្នស្ត្រីរងគ្រោះកំពុងសម្រាកព្យាបាលរងរបួស នៅមន្ទីរពេទ្យក្នុងរាជធានីភ្នំពេញ រីឯសាកសពបុរសជាប្តីត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ ស្អាងជ័យ
