ខេត្តកំពង់ឆ្នាំង ៖ យុវជនម្នាក់បានរងរបួសធ្ងន់ និង ម្នាក់ទៀតបានរងរបួសស្រាលនៅក្នុងករណីគ្រោះថ្នាក់ចរាចរណ៍ មួយដែលបង្ករឡើងរថយន្តសាំយ៉ុងមួយគ្រឿងបុកម៉ូតូសង់កូរ៉េពីក្រោយពេញមួយទំហឹង កាលពីវេលាម៉ោង២១និង១០នាទីថ្ងៃទី៨ ខែកក្កដា ឆ្នាំ២០១៥ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៨៥និង៨៥ ស្ថិតក្នុងជ្រៃបាក់ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចបានអោយដឹងថា ជនរងគ្រោះនៅក្នុងឧប្បត្តិហេតុនេះម្នាក់ឈ្មោះ សយ វិសាល ភេទប្រុស រស់នៅភូមិ-ឃុំកើតហេតុខាងលើ រងរបួសធ្ងន់ ជាជិះម៉ូតូ ។ ចំណែកឯម្នាក់ទៀតអ្នកបើកបរថយន្តមិនស្គាល់អត្តសញ្ញាណ ព្រោះក្រោយពេលកើតហេតុ បានឡើងម៉ូតូជិះគេចខ្លួនទាំងរងរបួស ។
សមត្ថកិច្ចបានអោយដឹងទៀតថា នៅមុនពេលកើតហេតុជនរងគ្រោះបានជិះម៉ូតូម៉ាកសេ១០០ កូរ៉េ ពណ៌ក្រហម គ្មានស្លាកលេខ ក្នុងទិសដៅពីត្បូងទៅជើង នៅពេលមដល់ចំណុចកើត ហេតុស្រាប់តែមានរថយន្តម៉ាកសាំយ៉ុងមួយគ្រឿងពណ៌ស ពាក់ស្លាកលេខភ្នំពេញ 2I -4114 ដែលបើកក្នុងទិសដៅស្របគ្នា បានរេមកបុកម៉ូតជនរងគ្រោះពេញមួយទំហឹងតែម្តង បណ្តាលអោយ ជនរងគ្រោះដែលកំពុងបើកម៉ូតូប៉ើងខ្ទាតទៅបោកលើកញ្ចក់រថយន្ត បណ្តាលអោយសន្លប់ស្តូកស្តឹងតែម្តង ។
ក្រោយពេលកើតហេតុជនរងគ្រោះបានដឹកមកសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង ។ ដោយឡែកមធ្យោបាយបង្កត្រូវបានយកមរក្សាទុកនៅអធិការដ្ឋាននគរបាលស្រុករលាប្អៀរដើម្បីរង់ចាំដោះស្រាយតាមនីតិវិធី ៕ ចន្ថា
