កាលពីព្រឹកថ្ងៃសៅរ៍នៅម៉ោងប្រហែល៩ព្រឹក(ម៉ោងនៅក្នុងតំបន់)មានការផ្ទុះដ៍ធំមួយបានកើតឡើងនៅក្នុងហាងនំបុ័ងមួយនៅលើផ្លូវដឺត្រេវីសក្នុងសង្កាត់ទី៩នៃទីក្រុងប៉ារីស(de trévise 9eme arrondissement)។ គ្រោះមហន្តរាយនេះមានប្រភពដើមដោយសារការលេចធ្លាយឧស្ម័នយោងតាមមន្រ្ដីនគរបាល។ ក្រុមអ្នកពន្លត់អគ្គិភ័យ២០០នាក់រួមជាមួយប៉ូលិស១០០នាក់អន្ដរាគមន៍ដើម្បីការពារការលេចធ្លាយឧស្ម័ននៅពេលដែលការផ្ទុះបានកើតឡើង។
យោងតាមការិយាល័យព្រះរាជអាជ្ញាទីក្រុងប៉ារីសបានឲ្យដឹងថា៖គ្រោះមហន្ដរាយនេះបណ្ដាលឲ្យអ្នកពន្លត់អគ្គិភ័យពីរនាក់បានស្លាប់និងជនជាតិអេស្ប៉ាញម្នាក់។ មនុស្ស១០នាក់ស្ថិតក្នុងភាពអាសន្នទាំងស្រុងហើយមនុស្ស៣៧នាក់ទៀតរងរបួសបន្ដិចបន្ដួចផងដែរ។
រដ្ឋមន្រ្ដីក្រសួងមហាផ្ទៃលោកCastaner បានមានប្រសាសន៍ថា៖ ខ្ញុំសូមសរសើរនូវភាពក្លាហានក្រុមអ្នកពន្លត់អគ្គិភ័យដែលបានជួយសង្គ្រោះជីវិតរបស់សមមិត្តដែលបានកប់នៅក្រោមគំនរថ្មបាក់បែករយៈពេល២ម៉ោងនិង៣០នាទីពួកគេប្រឈមមហានិភ័យធំ។ លោកបន្ដទៀតថាការវិនិច្ឆ័យនៃអគារទាំងអស់ដែលបានរងផលប៉ះពាល់ដោយសារការផ្ទុះមួយនេះនឹងបន្ដរយៈពេល៤៨ម៉ោងទៀត៕ មល្លិកា