ភ្នំពេញ៖ នារី២នាក់ម្តាយនិងកូនបានរងរបួស ក្រោយពីមានចោរឆក់កាបូប២នាក់ បានធ្វើសកម្មភាពឆក់កាបូបរបស់ពួកគាត់ បានសម្រេចហើយ និងបណ្តាលឲ្យដួលម៉ូតូដួលម៉ូតូទៀត បង្កការភ្ញាក់កាលពីវេលាម៉ោង១ និង២០នាទីរសៀលថ្ងៃទី៤ ខែធ្នូ ឆ្នាំ២០១៥ នៅចំណុចផ្លូវ២៧១កែងផ្លូវលេខ១៦០ សង្កាត់ទឹកល្អក់២ ខណ្ឌទួលគោក។
ជនរងគ្រោះ២នាក់ម្តាយ និងកូនស្រីពុំត្រូវបានស្គាល់ឈ្មោះ បានជិះម៉ូតូស្កុបពីពណ៌ស ពាក់ស្លាកលេខភ្នំពេញ1CJ-8217 ឌុបគ្នាតាមបណ្ដោយផ្លូវ២៧១ក្នុងទិសដៅពីត្បូងទៅជើង។ លុះមកដល់ចំណុចខាងលើស្រាប់តែមានជនសង្ស័យ២នាក់អាយុប្រហែល២០ឆ្នាំ ជិះម៉ូតូម៉ាកហុងដាឌ្រីម ពណ៌ខ្មៅ មិនចាំស្លាកលេខ មកពីក្រោយស្របទិសគ្នាបានឆក់ទាញយកកាបូបពីជនរងគ្រោះជាកូនស្រី បណ្ដាលឲ្យដួលម៉ូតូជនរងគ្រោះរងរបួសស្រាលទាំង២នាក់។ ចំណែកជនល្មើសជិះម៉ូតូគេចខ្លួនបាត់ស្រមោល។
បើតាមសម្តីជនរងគ្រោះជាកូនស្រី និងជាម្ចាស់កាបូប បានបញ្ជាក់ប្រាប់នគរបាលថា នៅក្នុងកាបូបរបស់នាងមានទូរស័ព្ទម៉ាកសាំសុងមួយគ្រឿង ដែលមានតម្លៃ១០០ដុល្លារ លុយខ្មែរមួយចំនួន និងកាតគ្រីម៉ូតូស្កុបពីដែលជាឈ្មោះអ្នកលក់ឲ្យមិនទាន់កាត់ឈ្មោះ។
បច្ចុប្បន្នជនរងគ្រោះបានដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលទឹកល្អក់២ ដើម្បីស្វែងរកចាប់ខ្លួនដាក់ទោសទៅតាមច្បាប់៕
ដោយ៖ វិបុល
