ខេត្តសៀមរាប ៖ លិខិតអនាមុខជាច្រើនសន្លឹក ត្រូវជនមិនស្គាល់មុខបាចចោល នៅមុខស្នងការដ្ឋាននគរបាលក្រុងនិងខេត្ដ ខេត្តសៀមរាប ដោយរិះគន់និងបើកកកាយរឿងអធិការនគរបាលក្រុង លោកទិត្យ ណារ៉ុង ថា និយមបក្សពួកនិងបានយកលុយខែតាមបនល្បែងស៊ីសង និងកន្លែងបំរើផ្លូវភេទលួចលាក់ក្នុងតំបន់ទេសចរណ៍។
លិខិតនោះត្រូវបានជនមិនស្គាល់មុខបាចចោលកាលពីថ្ងៃទី០៧ខែកក្កដានេះ ដោយសំណូមពរ លោកស្នងការឲ្យមានវិធានការ ទៅលើលោកអធិការក្រុងរូបនោះ។
ក្នុងលិខិតអនាមឹកនោះបានរៀបរាប់យ៉ាងថា យើងខ្ញុំជាមន្ត្រីនគរបាលក្រុងមិនសប្បាយចិត្តសូមអន្តរាគមន៏ពីលោកស្នងការ លើការតែងតាំងមុខតំណែង មន្ត្រីនគរបាលនាពេលកន្លងមក និងពេលបច្ចុប្បន្ន។ ការតែងតាំងមុខតំណែងលោកអធិការក្រុងដែលតែងតាំងតែមនុស្សនៅជិតខ្លួន ភាគច្រើនកម្លាំងថ្មី និងកម្លាំងអសកម្មតាមប៉ុស្តិ៏ ដែលបានបញ្ឍរជើង ដែលពួកគេសំបូរលុយស៊ូកប៉ាន់ ដើម្បីយកតួនាទី ចំណេកឯអ្នកធ្វើការយូរឆ្នាំហើយមិនដែលអធិការរូបនោះមើលឃើញទេ ព្រោះគ្មានលុយស៊ូកអោខ្លួន។
លិខិតបានបានឲ្យដឹងបន្ដថា សូមលោកស្នងការមេត្តាជ្រាបថា មានមន្ត្រីឈ្មោះ ម៉ុក បូរ៉ា បានដើរប្រមូលលុយតាមបនល្បែងហ្គេម .ឆ្នោត.និងតាមកន្លែងវ៉ៃស៊ិច ដែលជ្រកក្រោមស្លាកម៉ាស្សា នៅក្នុងក្រុងសៀមរាប។
ប្រភពបានទម្លាយថា កាលពីថ្ងៃទី១៣ខែមិនាឆ្នាំ២០១៥ ឈ្មោះម៉ុក បូរ៉ា បានទៅឆក់ត្រីហើយយកកាំភ្លើង អាកា បាញ់ជាច្រើនគ្រាប់នៅវាលស្រែប្រាំង ក្នុងសង្កាត់ជ្រាវក្រុងសៀមរាប ផ្អើលពលរដ្ឋទាំងថ្ងៃ តែលោក ទិត្យ ណារ៉ុង អធិការនគរបាលក្រុង មិនដាក់វិន័យទេ ថែមទាំងតែងតាំងបុក្គលរូបនោះជាអនុផ្នែកព្រហ្មទណ្ឌទៀត។ លិខិតដែលមិនបានចុះថ្ងៃខែនិងឈ្មោះបាន បានស្នើឲ្យស្នងការជួយពិនិត្យទៅលើ ការតែងតាំងមុខតំណែងមន្ត្រីណាមួយ គួរតែប្រជុំវាយតំលៃឲ្យបានត្រឹមត្រូវជាមុនសិន ពិសេសគួរមើលមន្ត្រីចាស់ដែលបំរើការងារយូរឆ្នាំ។ដោយលើកឡើងថា កម្លាំងដែលជាប់វិន័យមិនគួរតម្តើងតួនាទីទេ។ជាមួយគ្នានោះដែរលោកស្នងការគួរតែបង្កើតគណៈកម្មការត្រួតពិនិត្យកម្លាំងក្នុងក្រុងសៀមរាប ហើយកុំសូវជឿរទៅលើរបាយការណ៏ពេក។
ជុំវិញករណីខាងលើនេះ លោកវរសេនីយ៏ទោទិត្យ ណារ៉ុង អធិការនគរបាលក្រុងសៀមរាប បានថ្លែង តាមទូរសព្ទ័នៅរសៀលថ្ងៃទី០៨ខែកក្កដានេះថា លោកសុំមិនធ្វើអធិប្បាយបានទេ ព្រោះលោកបានរាយការដាក់ជូនទៅលោកស្នងការរួចរាល់អស់ហើយ។
ចំពោះលោកឧត្តមសេនីយ៏ទោ សត ណាឌី ស្នងការដ្ឋាននគរបាលខេត្តសៀមរាប បានមានប្រសាសន៏ថា លោកនៅមិនទាន់ដឹងនៅឡើយទេ ព្រោះពេលនេះកំពុងប្រជុំនៅឯភ្នំពេញ។
បន្ទាប់ពីលិខិតអនាមឹកបានទៅដល់ដៃមន្ត្រីប៉ូលិស ស្ទើរពេញខេត្តសៀមរាប ក៏មានព័ត៏មានទម្លាយតៗគ្នាថា លោកអធិការ ទិត្យ ណារ៉ុង រូបនេះ ក្រៅពីដើរដាក់ខែយកលុយតាមបនល្បែង និងតាមបណ្តាបទល្មើសផ្សេងៗក៏តម្រូវឲ្យប៉ូលិសក្រោមឪវាទ ដែលនៅតាមប៉ុស្តិ៏ឬគោលដៅ បង់ប្រាក់ទៅឲ្យលោក១០០ដុល្លារក្នុង១ខែផងដែរ។បើមិនដូច្នេះទេ ចាំបាច់ត្រូវផ្លាស់ប្តូរចេញពីកន្លែងឈរជើង ដោយមិនខ្វល់ថាមន្ត្រីក្រោមឪវាទរកប្រាក់ដោយវិធីណាឡើយ។ ប្រភពបន្តថា ទង្វើនិងសកម្មភាព របស់លោកអធិការ បានធ្វើឲ្យមន្ត្រីក្រោមឪវាទ សតិអារម្មណ៏អស់ជំនឿលើការងារ ព្យាយាមប្រព្រឹត្តិអំពើពុករលួយ ដើម្បីបានប្រាក់បង់ខែឲ្យមេ។
ប្រភពដដែល បន្ថែមទៀតថា បច្ចុប្បន្នបនល្បែងក្នុងក្រុងសៀមរាប កំពុងរីកដូចផ្សិត តួយ៉ាងដូចជាកន្ទុយលេខប្រជល់មាន់ ពិសេសហ្កេមបាញ់ត្រី តែសមត្ថកិច្ចក្នុងមូលដ្ឋាន មិនអាចទៅក្បែរបានទេ បើមិនចឹងឮដល់លោកអធិការភ្លាមៗ។ល្បែងហ្កេមបាញ់ត្រី ដែលកំពុងពុះកញ្ជ្រោលខ្លាំងជាងគេនាពេលនេះគឺនៅក្នុងក្លឹបស្នូកឃរ័ឈ្មោះ ប៊ីអេសស៊ី(BSC) ដែលមានទីតាំងនៅចំណុចផ្លូវកែងផ្សារញ៉ែ ក្បែរគោលដៅឈរជើងរបស់ប៉ូលិស។ ក្នុងក្លឹបមួយនេះពួកអ្នកចូលលេង ភ្នាល់ចាញ់ឈ្នះរាប់ម៉ឺនដុល្លារ ហើយភាគច្រើនអ្នកដែលចូលទៅជក់ថ្នាំញៀន។
គួររំលឹកផងដែរថា សម្រាប់ក្រុងទេសចរណ៏សៀមរាបអង្គរ នាពេលថ្មីៗនេះ សកម្មភាពចោរកាច់សោរកម៉ូតូ ឆក់កាបូប និងគាស់ជញ្ជាំងគាស់ទ្វារផ្ទះ ចូលប្លន់យកទ្រព្យសម្បត្តិ កំពុងតែកក្រើកយ៉ាងខ្លាំងពេញតំបន់ទេសចរខេត្តសៀមរាប បើទោះបីសមត្ថកិច្ចប្រឹងទប់ស្កាត់ក្ដី ដោយសារតែមាន កើតចេញពីការចាញ់ល្បែងស៊ីសងខាងលើ៕ជានិរន្ដរ៍
