ភ្នំពេញ ៖ បុរសម្នាក់ត្រូវបានសមត្ថកិច្ចបុស្ដិ៍នគរបាលរដ្ឋបាលមិត្តភាពឃាត់ខ្លួន បន្ទាប់ពីរូបគេបានចាយលុយក្លែងក្លាយឲ្យថ្លៃជិះតាក់ស៊ី ហើយត្រូវអ្នកបើកបរតាក់ស៊ីដឹង ដឹកចូលបុស្ដិ៍ កាលពីវេលាម៉ោង៨ព្រឹក ថ្ងៃទី៩ ខែកក្កដា ឆ្នាំ២០១៥។
ជនសង្ស័យត្រូវបានគេស្គាល់ថា ឈ្មោះញៀន ខ្លូត ភេទប្រុស អាយុ៣២ឆ្នាំ ស្នាក់នៅផ្ទះជួលម្ដុំផ្សារម្ដុំអូរបែកក្អម មុខរបរកម្មករសំណង់។ ចំណែកបុរសជាអ្នកបើកបរតាក់ស៊ីឈ្មោះ ម៉ម សុធារី អាយុ៣៧ឆ្នាំ ស្នាក់នៅភូមិបឹងឈូក សង្កាត់ទឹកថ្លា ខណ្ឌសែនសុខ។
តាមសម្ដីរបស់បុរសអ្នកបើកបរតាក់ស៊ីបានឲ្យដឹងថា នៅយប់ថ្ងៃទី៨ ខែកក្ដដា ឆ្នាំ២០១៥ ជនសង្ស័យបានហៅខ្លួនឲ្យជូនពីម្ដុំស្ដុបណូគៀ ទៅផ្សារដើមគ ត្រឡប់ទៅត្រឡប់មកអស់ថ្លៃ៦០ដុល្លារ។ លុះដល់វេលាព្រឹកឡើងជនសង្ស័យក៏បានទាក់ទងហៅគេម្ដងទៀត ឲ្យជូនពីស្ដុងណូគៀទៅទន្លេបាទីខេត្តតាកែវ ក្នុងតម្លៃ២០ដុល្លារ។ ពេលនោះគាត់ក៏បានមកយកជនសង្ស័យនោះទៅ ហើយដោយដឹងថា លុយដែលជនសង្ស័យចាយនោះ ជាលុយដុល្លារក្លែងក្លាយ គាត់ក៏បានជិះបង្វែងដាន ហើយបានយកជនសង្ស័យទៅដាក់ក្នុងបុស្ដិ៍នគរបាលរដ្ឋបាលមិត្តភាពឲ្យឃាត់ខ្លួនទុកតែម្ដង។
ក្រោយពីបានឃាត់ខ្លួន ជនសង្ស័យបានសារភាពថា រូបគេពិតជាបានចាយលុយដុល្លារក្លែងក្លាយពិតមែន ប៉ុន្ដែលុយទាំងនេះគឺមិត្តភក្ដិគេម្នាក់ឈ្មោះភី ឈុន អាយុ៣៧ឆ្នាំបានឲ្យគេប្រាំរយដុល្លារហើយគេក៏បានយកមកចាយទៅ។
ក្រោយពេលទទួលបានចម្លើយសារភាពពីជនសង្ស័យ សមត្ថកិច្ចកំពុងកំណត់មុខសញ្ញាដើម្បី ឈានទៅឃាត់ខ្លួនជនបក្ខពួកគេ យកមកចាក់ការតាមផ្លូវច្បាប់៕ ស រស្មី
