ខេត្តកណ្តាល៖ បុរសវ័យកណ្តាលម្នាក់ បានស្លាប់ភ្លាមៗនៅកន្លែងកើតហេតុ បន្ទាប់បានជិះម៉ូតូរេចង្កូត ទៅប៉ះរបងដើមអំពិលទឹក ដួលបោកក្បាលលើផ្លូវបេតុង នៅម៉ោង១រំលងអធ្រាត្រឈានចូល ថ្ងៃទី១០ ខែធ្នូ ឆ្នាំ២០១៥ ស្ថិតនៅផ្លូវបេតុង ភូមិព្រែកលោក ឃុំព្រែកស្តី ស្រុកកោះធំ ខេត្តកណ្តាល។
ជនរងគ្រោះត្រូវបានស្គាល់ឈ្មោះ ឃោល ហួត ភេទប្រុស អាយុ ៤៦ឆ្នាំ មុខរបរកសិករ ស្នាក់នៅភូមិព្រែកលោក ឃុំព្រែកស្តី។
ប្រភពព័ត៌មានពីកន្លែងកើតហេតុបានឲ្យដឹងថា នៅយប់នោះជនរងគ្រោះបានជិះម៉ូតូត្រឡប់មកពីចូលរួមពិធីបុណ្យញាតិក្នុងភូមិ ដោយមានកម្មពិធីផឹកស៊ីខ្លះ រួចក៏ត្រឡប់មកផ្ទះ វិញបើកម៉ូតូម៉ាកគុបជ្រុង ពណ៌ខៀវចាស់ ពាក់ផ្លាកលេខ កណ្ដាល 1E-1141។ ពេលមកដល់ចំណុច កើតហេតុបានរេចង្កូតម៉ូតូ ទៅប៉ះបុកដើមអំពិលទឹកក្បែរផ្លូវ បណ្ដាលឲ្យដួលបោកក្បាលលើផ្លូវបេតុងស្លាប់ ។
ករណីនេះកម្លាំងជំនាញ និងកម្លាំងប៉ុស្តិ៍រដ្ឋបាលព្រែកស្ដី បានចុះទៅពិនិត្យកន្លែងកើតហេតុជាក់ស្ដែង រួចបានប្រគល់សាកសព ជនរងគ្រោះជូនទៅក្រុមគ្រួសារធ្វើបុណ្យតាមប្រពៃណី ៕
ដោយ៖ សហការី
