អាប់ភីស៊ីត ប្រឆាំងនឹង​ ចាន់អូចា ចង់ក្លាយជានាយករដ្ឋមន្ត្រីបន្តទៀត

ចែករំលែក៖

ការកាន់អំណាចដឹកនាំប្រទេសថៃរយៈពេល៥ឆ្នាំកន្លងមក របស់លោកប្រាយុទ្ធចាន់អូចា ទទួលរងការប្រឆាំងយ៉ាង​​ខ្លាំង ពី​ បណ្តាមេបក្សនយោបាយនានានៅក្នុងប្រទេសថៃ  ដោយលោកបានពន្យាពេលបោះឆ្នោតជាបន្តបន្ទាប់ រហូតដល់ព្រះមហាក្សត្រឡាយព្រះហស្ថ ឲ្យបោះឆ្នោតទើបមានការសម្រេចយកថ្ងៃទី​២៤ខែមីនា សម្រាប់ការបោះឆ្នោតជ្រើសរើសនាយករដ្ឋមន្ត្រីថ្មី​។

លោកប្រយុទ្ធ ចាន់អូចា​នៅតែមានបំណង អង្គុយ​កៅអីនាយករដ្ឋមន្ត្រីដដែល ក្រោយការបោះឆ្នោត​ទទួលរងការប្រឆាំងយ៉ាងខ្លាំង ក្នុងនោះមានមេដឹកនាំគណបក្សប្រជាធិបតេយ្យ លោកអាប់ភីស៊ីត វេចាជីវ៉ា (Abhisit Vejjajiva) ជាដើម ។

លោក អាប់ភីស៊ីត បានថ្លែងតាមវីដេអូ រយៈពេល៣៣ វិនាទី បង្ហោះនៅលើបណ្តាញសង្គមហ្វេសប៊ុករបស់ខ្លួន កាលពីថ្ងៃទី១០ ខែមីនា ឆ្នាំ២០១៩ថា លោកមិនគាំទ្រដាច់ខាត លោក ចាន់អូចា ដែលជាបេក្ខភាពនាយករដ្ឋមន្ត្រី តែម្នាក់គត់ នៃគណបក្ស Palang Pracharath (PPRP) ។ ពីព្រោះការ កាន់អំណាច យូរអង្វែងបែបនេះ អាចបង្កើតឲ្យមានជម្លោះនយោបាយ និងប្រាស់ចាកពីទ្រឹស្តីនយោបាយ ដែលថា គិតគូរផលប្រយោជន៍ពលរដ្ឋជាមុនដំបូងគេនោះ ។ 

លោក អាប់ភីស៊ីត បន្តទៀតថា ក្រោយកាន់តំណែងជាមេដឹកនាំប្រទេសថៃ ៥ឆ្នាំរបស់លោកប្រាយុទ្ធ ចាន់អូចា សេដ្ឋកិច្ចថៃ មានការធ្លាក់ចុះក្នុងសភាពថមថយ ធ្វើឲ្យប្រទេសជាតិរងទុក្ខវេទនាយ៉ាងខ្លាំង ។ 

ថ្ងៃទី២៤ ខែមីនា ឆ្នាំ២០១៩ ពលរដ្ឋថៃនឹងទៅបោះឆ្នោតដំបូងគេ ក្រោយរដ្ឋប្រហារយោធាក្នុងឆ្នាំ២០១៤ ទម្លាក់រដ្ឋាភិបាលស៊ីវិលស្របច្បាប់របស់លោកស្រី យីងឡាក់ ។ ក្រោយរដ្ឋប្រហារភ្លាម លោក ចាន់ អូចា បានឡើងកាន់តំណែងជានាយករដ្ឋមន្ត្រី រហូតដល់សព្វថ្ងៃ ។ 

ថ្មីៗនេះ តុលាការថៃ បានសម្រេចរំលាយគណបក្សថៃរក្សាជាតិ ដែលគេដឹងថា មានភាពជិតស្និទ្ធជាមួយត្រកូល​ថាក់ស៊ីន ក្រោមលេស តែងតាំងព្រះរាមរបស់ព្រះមហាក្សត្រថៃ ធ្វើជាបេក្ខភាពនាយករដ្ឋមន្ត្រី ផ្ទុយពីរដ្ឋធម្មនុញ្ញ ។

ការបោះឆ្នោតលើកនេះ ត្រូវបានគេមើលឃើញថា មានការប្រកួតប្រជែងគ្នាយ៉ាងស្រួចស្រាវ រវាងក្រុមស្រឡាញ់លទ្ធិប្រជាធិបតេយ្យពិតប្រាកដ នឹងក្រុមដែលគាំទ្ររបបយោធា និយមពួកអភិជន ៕


ចែករំលែក៖
ពាណិជ្ជកម្ម៖ ads2 ads3 ambel-meas ads5 ads6 scanpeople ads7 fk Print