ភ្នំពេញ ៖ ប្រជាពលរដ្ឋបានរិះគន់ទៅលើលោក ឃួង ស្រេង អភិបាលរាជធានីភ្នំពេញមិនសំចៃមាត់ថា ការចេញបទបញ្ជារបស់លោកគ្មានប្រសិទ្ធភាព ថែមទាំងធ្វើឲ្យក្រុមអ្នកបើករថយន្តធំៗចូល​ក្រុង​ពេល​ថ្ងៃជារៀងរាល់ថ្ងៃ មិនខ្វល់បទបញ្ជាសោះឡើយ។

​ជាក់ស្ដែង មានស្ត្រីពីរនាក់ជិះម៉ូតូឌុបគ្នាចេញពីផ្សារស្ទឹងមានជ័យត្រូវរថយន្តធន់ធំបើកបុកពីក្រោយជ្រុលកិនស្ត្រីម្នាក់ស្លាប់យ៉ាងអាណោចអាធម៌​ កាលពីវេលាម៉ោង​១០នឹង៣០នាទីព្រឹកថ្ងៃទី​ ១២​ ខែ​មីនា​ ឆ្នាំ​២០១៩​ ស្ថិតនៅតាមបណ្តោយផ្លូវព្រះមុនីរ៉េត​ ក្បែរផ្សារស្ទឹងមានជ័យថ្មី​ ក្នុងសង្កាត់ស្ទឹងមានជ័យទី១​ ខណ្ឌមានជ័យ​ រាជធានីភ្នំពេញ​។

យោងតាមសម្តីស្ត្រីជាអ្នកឌុបបានឲ្យដឹងថា ដំបូងឡើយរូបគាត់រួមទាំងស្ត្រីរង់គ្រោះបានចូលទិញសម្ភារក្នុងផ្សារស្ទឹងមានជ័យថ្មី​ ដើម្បីយកទៅរួមបុណ្យចម្រើនព្រះជន្ម​ ក្រោយទិញរួចរាល់ក៏បានជិះម៉ូតូមួយគ្រឿងម៉ាក​ TODAY ពណ៌ត្រួយចេក​ ធ្វើដំណើរទិសដៅពីជើងទៅត្បូង​ ខណៈជិះដល់ចំណុចកើតហេតុក៏មានរថយន្តធន់ធំមួយគ្រឿងម៉ាក​ ហីុយ៉ាន់ដាយ​  ពាក់ស្លាកលេខភ្នំពេញ​ 3E 0515 បើកលឿនស្របគ្នាបុកពីក្រោយបណ្តាលអោយស្ត្រីដែលជាអ្នកជិះពីក្រោយធ្លាក់ពីលើម៉ូតូត្រូវរថយន្តកិនក្បាលផ្ទុះធ្លាយខួរខ្ទេតពេញផ្លូវស្លាប់យ៉ាងអាណោចអាធម៌នៅនឹងចំណុចកើតហេតុ​ ចំណែករូបខ្លួនជាអ្នកឌុបមិនមានរងរបួសនោះទេ​ ។

សមត្ថកិច្ចបានឲ្យដឹងថា ក្រោយមានករណី​នេះ​តៃកុងរថយន្តរួមនឹងរថយន្តបង្កត្រូវបានសមត្ថកិច្ចឃាត់បានភ្លាមៗ​  ហើយចំពោះអត្តសញ្ញាណសពស្ត្រីខាងលើមានឈ្មោះ​ ស៊ុន​ សួង អាយុ៥៣ឆ្នាំ​ មានស្រុកកំណើតនៅខេត្តស្វាយរៀង​ ។

ប្រភពដដែលបន្តថា ជុំវិញគ្រោះថ្នាក់ចរាចរនេះសមត្ថកិច្ចជំនាញបានចុះមកវាស់វែង ត្រង់ចំណុចកើតហេតុរួចអូសយករថយន្តបង្កនឹងម៉ូតូរបស់ស្ត្រីរងគ្រោះយកទៅរក្សាទុកនៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនាពេលក្រោយ​ ចំណែកសាកសពស្ត្រីខាងលើត្រូវបានធ្វើលិខិតប្រគល់​ជូនសាច់ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត​  ៕ ដោយ៖ ភារ៉ា ដង្កោ