នាវាចម្បាំងអាមេរិក ចូលទៅកាន់កំពង់ផែ ទីក្រុងម៉ានីល

ចែករំលែក៖

ទីក្រុងម៉ានីល៖ បន្ទាប់ពីនាវាចរណ៍ នៅសមុទ្រដែលមានជម្លោះ នៅសមុទ្រចិនខាងត្បូង នាវាចម្បាំងដ៏ទំនើបរបស់អាមេរិក​បានចូលទៅកាន់​កំពង់ផែ ​ទីក្រុងម៉ានីលប្រទេសហ្វីលីពីន ។ភាគីចិនបានប្រឆាំងតវ៉ាយ៉ាងខ្លាំង ទៅនឹងសកម្មភាពអាមេរិកបញ្ជូននាវាចម្បាំងឲ្យមកវត្តមាននៅក្នុងដែនទឹកសមុទ្រចិនខាងត្បូង ហើយថាជាទង្វើបង្កឲ្យមានស្ថានការតានតឹងខ្លាំងឡើង ។
មេបញ្ជាការកងទ័ពជើងទឹកអាមេរិក Eric Anduze បានបញ្ជាក់ថា នាវាចម្បាំង USS Blue Ridge បានបោះយុទ្ធថ្កាកាលពីថ្ងៃទី១៣ ខែមីនា នៅកំពង់ផែ ទីក្រុងម៉ានីល ប្រទេសហ្វីលីពីន ។ ការមកកាន់ទីនេះ ដើម្បីបង្ហាញឲ្យកាន់តែច្បាស់ក្រឡែតបន្ថែមទៀតអំពីសម្ព័ន្ធភាពរឹងមាំ មិនអាចប្រែក្រឡាស់រវាងហ្វីលីពីន នឹងអាមេរិក ។

កាលពីពេលថ្មីៗនេះ មេបញ្ជាការរូបនេះធ្លាប់បានលើកឡើងថា ឲ្យតែស្របទៅតាមច្បាប់អន្តរជាតិ មិនថា តែផ្លូវទឹក ផ្លូវអាកាស ផ្លូវគោកអ្វីទេ កម្លាំងទាហានអាមេរិកមានសិទ្ធិធ្វើនាវាចរណ៍, ហោះហើរ និងចរាចរណ៍ទៅមកបាន ដោយមិនចាំបាច់មានការព្រួយបារម្ភខ្លាចភាគីណាមួយមិនសប្បាយចិត្តនោះឡើយ ។

លោក Anduze បញ្ជាក់ថា ប្រវត្តិសាស្រ្តរបស់យើង យូរយារណាស់មកហើយ… យើងមកកាន់ទីនេះដើម្បីឲ្យគ្រប់គ្នាដឹងថា ភាពជាដៃគូគឺរឹងមាំជាងពីពេលមុនៗទៅទៀត ។ លោក Anduze មិនបានលាតត្រដាងវែងឆ្ងាយនោះទេ ថា ដំណើរនាវាចរណ៍របស់ខ្លួនបានពើបប្រទះជាមួយកម្លាំងនាវាជើងទឹកចិន។

រដ្ឋមន្ត្រីការបរទេសអាមេរិក លោក Mike Pompeo អំឡុងធ្វើទស្សនកិច្ចនៅទីក្រុងម៉ានីល កាលពីដើមខែមីនា ឆ្នាំ២០១៩ ថ្លែងថា បញ្ហាសមុទ្រចិនខាងត្បូង អាមេរិកនៅតែចាត់ទុកថា ជាច្រកផ្លូវ ចេញ ចូល របស់នាវាគ្រប់ប្រភេទ ហើយសង្ឃឹមថា ភាគីចិននឹងមិនបង្កការគំរាមកំហែង ដោយសកម្មភាពបិទផ្លូវខ្សែទឹកមានជម្លោះនេះឡើយ ។

លោក Lu Kang អ្នកនាំពាក្យក្រសួងការបរទេសចិន បានប្រតិកម្មយ៉ាងខ្លាំងៗថា ចិនជាមួយបណ្តាប្រទេសជុំវិញសមុទ្រចិនខាងត្បូង កំពុងតែប្រឹងប្រែងរក្សាសន្តិភាព ស្ថិរភាពនៅក្នុងតំបន់ ដោយខិតខំពិភាក្សាដោះស្រាយបញ្ហា គោលបំណងការពារជម្លោះកុំឲ្យរីកកាន់តែធំឡើង ។ «ប្រសិនជាប្រទេសពីខាងក្រៅតំបន់នេះ ដូចជាអាមេរិកជាដើម បើមានផ្នត់គំនិតសន្តិភាពនៅក្នុងចិត្ត ដូចបំណងប្រាថ្នារបស់ពលរដ្ឋក្នុងតំបន់ដែរនោះ ពួកគេមិនគួរមកកកូរកកាយបង្កបញ្ហាដូចនេះឡើយ» ៕

ដោយ៖ មែវ សាធី

ចែករំលែក៖
ពាណិជ្ជកម្ម៖ ads2 ads3 ambel-meas ads5 ads6 scanpeople ads7 fk Print