ទីក្រុងបាងកក៖ ការបោះឆ្នោតនៅក្នុងប្រទេសថៃនៅសល់តែជាងមួយសប្តាហ៍ទៀតប៉ុណ្ណោះ គឺនៅថ្ងៃទី២៤ខែមីនា ហើយបណ្តាបេក្ខភាពនាយករដ្ឋមន្ត្រីកំពុងតែខិតខំ អូសទាញការគាំទ្រពីសំណាក់ម្ចាស់ឆ្នោត«ប្រជាពលរដ្ឋ»ងាកមកគាំទ្រខ្លួន ដើម្បីដឹកនាំប្រទេសថៃ ឲ្យកាន់តែរីកចំរើន ។
នៅពេលនេះរបបយោធាថៃនៅតែមានមហិច្ឆិតាគ្រប់គ្រងអំណាចដឹកនាំប្រទេសថៃជាបន្តទៀត ទាំងនោះហើយបង្ករឲ្យមានក្តីបារម្ភកាន់តែខ្លាំង ប្រសិនបើ យោធាមិនជាប់ឆ្នោតនោះ បញ្ហានឹងបន្តកើតឡើង ក្នុងឆាកនយោបាយថៃដដែល ។ ទម្លាប់ជ្រៀតជ្រេកដោយយោធា នៅក្នុងនយោបាយថៃពិបាក ក្នុងការ លុបបំបាត់ ដោយយោធាធ្លាប់ចូលរួមធ្វើរដ្ឋប្រហារជិត២០លើកកន្លងមក គឺជាចំនួនច្រើនបំផុត មិនធ្លាប់មាន។
តាមពិតនៅលើក្រដាស ថៃជាប្រទេសប្រជាធិបតេយ្យរាជានិយម តាំងពីឆ្នាំ១៩៣៣ មកម៉្លេះ។ ក៏ប៉ុន្តែ នៅលើសាច់ការជាក់ស្តែងវិញ ប្រទេសនេះតែងតែឋិតនៅក្រោមការដឹកនាំរបស់យោធា។ ទោះជាបានប្រសូតចេញពីការបោះឆ្នោតក៏ដោយ គ្រប់រដ្ឋាភិបាលស៊ីវិលសុទ្ធតែឋិតនៅក្រោមការគំរាមកំហែងធ្វើរដ្ឋប្រហារពីសំណាក់យោធានិងសុទ្ធតែឋិតនៅក្រោមឥទ្ធិពលដ៏ខ្លាំងជ្រុលរបស់ព្រះបរមរាជវាំង។
រាប់ទាំងរដ្ឋប្រហារថ្ងៃទី១៩កញ្ញាឆ្នាំ២០០៦ ដែលបានទម្លាក់លោកថាក់ ស៊ីនចេញពីតំណែងនាយករដ្ឋមន្ត្រី ប្រទេសថៃបានស្គាល់រដ្ឋប្រហារយោធាទាំងអស់ចំនួន១៩លើក តាំងពីឆ្នាំ១៩៣២មក។ នេះស្តែងឲ្យឃើញថា យោធាដើរតួនាទីធំធេងណាស់ នៅក្នុងជីវិតនយោបាយនៃប្រទេសថៃ។ការធ្វើ អន្តរាគមន៍យោធាដ៏ញឹកញាប់បែបនេះដែលតាមធម្មតាគ្មានការបង្ហូរឈាមឡើយ មិនមែនជារឿងចៃដន្យទេ។
ម្យ៉ាង យោធាជាអ្នកដែលបានផ្តួលរំលំរបបរាជានិយមផ្តាច់ការនៅឆ្នាំ១៩៣២ និងជាអ្នកដែលបានបង្កើតរបបរាជានិយមអាស្រ័យរដ្ឋធម្មនុញ្ញ នៅថ្ងៃទី២៤មិថុនាឆ្នាំ១៩៣៣។ ម្យ៉ាងទៀត ពេញមួយសតវត្សរ៍ទី២០ យោធាដែលមិនចាំបាច់គិតគូរពីរឿងការពារជាតិ ដ្បិតប្រទេសថៃមិនដែលឆ្លងកាត់សង្គ្រាម បានងាកមករវីរវល់តែពីរឿងនយោបាយផ្ទៃក្នុងនៃប្រទេស។
ចំណុចទាំងនោះហើយ បានជាមកទល់សព្វថ្ងៃ យោធាថៃតាំងខ្លួនជាកម្លាំងមួយម្ចាស់ការ មិនស្តាប់បញ្ជាអ្នកនយោបាយ ផ្តល់សិទ្ធិធំដល់ខ្លួនឯង ដើម្បីគាបសង្កត់ឬរំលំរដ្ឋាភិបាល។ អ៊ីចឹងហើយដែរ បានជានាយករដ្ឋមន្ត្រីថៃជាច្រើនរូប សុទ្ធសឹងជានាយទាហានឬជាអតីតនាយទាហាន ដូចយ៉ាងលោកភីប៊ុន(Phibun) លោកសារីត(Sarit) លោកថានំ(Thanom) ឬក៏កន្លងទៅថ្មីៗនេះ លោកសុងធី(Sonthi) រហូតដល់បច្ចុប្បន្ន លោក ប្រាយុទ្ធចាន់អូចា ក៏កាន់អំណាចចេញពីយោធាផងដែរ។
លើកណាក៏ដូចលើកណា ក្រុមនាយទាហានដែលបានធ្វើរដ្ឋប្រហារ តែងតែអះអាងថា គឺដើម្បីការពារផលប្រយោជន៍ជាតិ។ ឧទាហរណ៍ ទាក់ទិននឹងរដ្ឋប្រហារឆ្នាំ១៩៤៧ ឧត្តមសេនីយ៍ភីប៊ុនបាននិយាយអះអាងថា គឺដើម្បីការពារភាពថ្លៃថ្នូរនៃរបបរាជានិយម ប្រឆាំងនឹងរដ្ឋាភិបាលមួយដែលទន់ជ្រាយពេក នៅចំពោះមុខបស្ចិមលោក។ ពាក់ព័ន្ធនឹងរដ្ឋប្រហារឆ្នាំ១៩៧១វិញ ក្រុមឧត្តមសេនីយ៍បានពន្យល់ថា គឺដើម្បីការពារប្រទេស ទប់ទល់នឹងឥទ្ធិពលកុម្មុយនិស្តដែលចេញមកពីតំបន់បណ្តោយព្រំដែនជាមួយប្រទេសម៉ាឡេស៊ី។ ហើយស្តីពីរដ្ឋប្រហារទម្លាក់លោកថាក់ ស៊ីននៅឆ្នាំ២០០៦វិញ ក្រុមឧត្តមសេនីយ៍បានថ្លែងថា គឺដើម្បីរក្សាស្ថិរភាពនៃប្រទេស។
ដោយឡែក យោធា រដ្ឋាភិបាល និងរាស្ត្រថៃ ទទួលស្គាល់តួនាទីជាចាំបាច់របស់ព្រះមហាក្សត្រ ក្នុងការដោះស្រាយវិបត្តិធំៗនិងក្នុងការផ្សះផ្សាជាតិ ទោះបីជាតួនាទីនោះ មិនត្រូវបានចែងនៅក្នុងរដ្ឋធម្មនុញ្ញក៏ដោយ។ នៅឆ្នាំ១៩៧៣ ក្រោយពីរដ្ឋាភិបាលបានវាយបង្ក្រាបក្នុងថ្លុកឈាមចលនានិស្សិត ឧត្តមសេនីយ៍ថានំត្រូវបង្ខំចិត្តលាលែងចេញពីមុខតំណែងនាយករដ្ឋមន្ត្រី និងត្រូវបង្ខំចិត្តនិរទេសទៅរស់នៅក្រៅប្រទេស តាមសំណូមពររបស់ព្រះចៅភូមីបុល។
ពាក់ព័ន្ធនឹងការបោះឆ្នោត នៅថ្ងៃទី២៤ខែមីនាខាងមុខ ប្រមុខដឹកនាំយោធា ដែលចូលរួមធ្វើរដ្ឋប្រហារហើយឡើងកាន់អំណាចដឹកនាំប្រទេសជាតិ៥ឆ្នាំកន្លងមក លោកប្រយុទ្ធចានអូចា នៅតែមានបំណងចង់បន្តដឹកនាំប្រទេសថៃ ជាបន្តទៀត ។
នៅពេលនេះអ្នកនយោបាយថៃបានលើកឡើងពីគោលនយោបាយដឹកនាំផ្សេងៗគ្នា ក្នុងការទាក់ទាញ ពលរដ្ឋគាំទ្រ ។ នៅពេលនេះនាយករដ្ឋមន្ត្រីថៃ លោកប្រាយុទ្ធចាន់អូចា បានអួតពីសមិទ្ធផលដែលខ្លួនខិតខំក្នុងរយៈពេល៥ឆ្នាំកន្លងមក ចាប់តាំងពីរដ្ឋប្រហារទម្លាក់ អតីតនាយករដ្ឋមន្ត្រីយីងឡាក់ស៊ីណាវ៉ាត្រា កាលពីឆ្នាំ២០១៤។
នៅក្នុងដំណើរចុះទៅតាមមូលដ្ឋានឃោសនាបោះឆ្នោត នាយករដ្ឋមន្ត្រីបន្តុបដោយរបបសឹករបស់ថៃ បានច្រៀងចំរៀងមនោសញ្ចេតនាមួយនិងបានអួតអំពីសមិទ្ធផលរបស់រដ្ឋាភិបាលលោកក្នុងដំណើរចុះទៅកាន់ភាគឦសានប្រទេសនៅមុនការបោះឆ្នោតនាថ្ងៃ២៤មីនា។
លោកប្រាយុទ្ធ ចាន់អូចា បានដឹកនាំធ្វើរដ្ឋប្រហារកាលពីឆ្នាំ២០១៤ ដើម្បីបណ្តេញរដ្ឋាភិបាលជាប់ឆ្នោតមួយ និងពេលនេះកំពុងស្វះស្វែងបន្តនៅក្នុងអំណាច តាមមធ្យោបាយស្របច្បាប់។
លោកបានបង្ហាញមុខនៅចំពោះហ្វូងមនុស្សរាប់ពាន់នាក់ក្នុងដំណើរមួយដែលជាផ្នែកនៃការងារផ្លូវការរបស់លោក។តែស្ទីលនៃការចុះជួបប្រជាជននេះវាស្រដៀងគ្នានឹងអ្វីដែលមនុស្សជាច្រើនគិតថាជាយុទ្ធនាការរកសម្លេងឆ្នោត ដែលលោកបានអនុវត្តដូច្នេះអស់ពេលជាច្រើនខែមកហើយ។
លោកបានប្រាប់អ្នកគាំទ្រនៅខេត្តណាខន រ៉ាតចាស៊ីម៉ា កន្លែងដែលលោកបានកើតនៅក្នុងជំរំយោធាមួយនាឆ្នាំ១៩៥៤ថា« យើងសំរេចបានច្រើនណាស់នៅ៥ឆ្នាំមកនេះ។បើយើងអាចបន្ត៥ឆ្នាំទៀត យើងកាន់តែសំរេចបានចរន្តនៅយូរតទៅទៀត លោកពូទុយ» ដែលជាឈ្មោះក្រៅរបស់លោកប្រាយុទ្ធ។ប្រាយុទ្ធត្រូវបានស្វាគមន៍និងថតសែលហ្វ៊ីជាមួយអ្នកគាំទ្រ។ចាស់ៗក្នុងមូលដ្ឋានឱបថើបលោកប្រាយុទ្ធ ដែលជាបេក្ខជននាយករដ្ឋមន្ត្រីរបស់គណបក្សផាឡាងប្រាចារ៉ាត ៕
