ភ្នំពេញ៖ បុរសជនជាតិចិនម្នាក់ស្រវឹងជោកជាំបើករថយន្ដសេរីទំនើបម៉ាកLandCruiser រេចង្កូតពេញផ្លូវជ្រុលទៅបុករថយន្ដCRVមួយគ្រឿងបណ្ដាលអោយរងការខូចខាតទាំងសងខាង តែមិនបណ្ដាលអោយមានអ្នករងរបួសនោះទេ ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២០និង២៥នាទីយប់ថ្ងៃទី១១ ខែធ្នូ ឆ្នាំ២០១៥ តាមបណ្ដោយផ្លូវលេខ៣១០ ទុលមុខ ហាងម៉ាស្សា អង្គរស្បារ ស្ថិតក្នុងសង្កាត់ បឹងកេងកង១ ខណ្ឌចំការមន រាជធានីភ្នំពេញ ។

ប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានរថយន្ដមួយគ្រឿងម៉ាកCRVពណ៍ទឹកប្រាក់ ពាក់ស្លាកលេខ ភ្នំពេញ2Z-8131 បើកបរដោយបុរសម្នាក់និងរួមដំណើរជាមួយប្រពន្ធនិងកូន ធ្វើដំណើរតាមបណ្ដោយផ្លូវលេខ៣១០ ទិសដៅពីកើតទៅលិច លុះមកដល់ចំណុចកើតហេតុស្រាប់តែមានរថយន្ដសេរីទំនើបមួយគ្រឿងម៉ាកLandCriuser ពណ៍ខ្មៅពាក់ស្លាកលេខ ភ្នំពេញ2AN-0009 បើកបរដោយបុរសជនជាតិចិនម្នាក់ស្ថិតក្នុងស្ថានភាពស្រវឹងជោកជាំធ្វើដំណើរបញ្ច្រាសទិសគ្នាហើយរេចង្កូតពេញផ្លូវបានជ្រុលទៅបុករថយន្ដCRVពេញទំហឹងបណ្ដាលអោយរងការខូចខាតទាំងសងខាងតែមិនបណ្ដាកអោយមានអ្នករងរបួសនោះទេ ។

ប្រភពដដែលបានបន្តថាក្រោយកើតហេតុម្ចាស់រថយន្ដLandCriuser បានបើកទ្វាររថយន្ដចុះរត់គេចខ្លួនបាត់ដោយបន្សល់រថយន្ដទុកនៅកន្លែងកើតហេតុ ។

ក្រោយពេលកើតហេតុកម្លាំងសមត្ថកិច្ចបានចុះមកដល់កន្លែងកើតហេតុហើយក៏មានដំណាងខាងរថយន្ដLandCriuser បានមកធ្វើការសម្របសម្រួលដោយខាងភាគីខាងរថយន្ដLandCriuser បានសងថ្លៃការខូចខាតទៅអោយរថយន្ដCRVចំនួន1300$ដើម្បីបញ្ចប់រឿងនៅកន្លែកកើតហេតុតែម្ដង ៕

ដោយ៖ ភារ៉ា ដង្កោ