លោក ឃួង ស្រេង អភិបាល នៃ​គណៈអភិបាល​រាជធានីភ្នំពេញ ដឹកនាំ​អង្គ​ប្រជុំ​ ដើម្បីត្រួតពិនិត្យ និងពង្រឹងអាវុធ​ជាតិ​ផ្ទុះ គ្រឿងញៀន​ គ្រឿងស្រវឹង និង​ការអនុវត្តច្បាប់​ស្ដីពី​ចរាចណ៍​ផ្លូវ​គោក

ចែករំលែក៖

ភ្នំពេញ ៖ ដើម្បីរក្សាសន្តិសុខ សុវត្ថិភាព ​សណ្តាប់ធ្នាប់​ និងរបៀបរៀបរយសាធារណៈ​ នៅក្នុងរាជធានីភ្នំពេញ នា​ព្រឹក​ថ្ងៃ​ព្រហស្បតិ៍ ១៥រោច ខែ​ផល្គុន ឆ្នាំ​ច សំរឹទ្ធិ​ស័ក ព.ស២៥៦២ ត្រូវ​នឹង​ថ្ងៃ​ទី​៤ ខែមេសា ឆ្នាំ២០១៩ លោក ឃួង ស្រេង អភិបាល នៃ​គណៈអភិបាល​រាជធានីភ្នំពេញ បានអញ្ជើញ​ជា​អធិបតី​ ដឹកនាំអង្គ​ប្រជុំ​គណៈបញ្ជាការ​ឯកភាព​រាជធានីភ្នំពេញ ដើម្បីត្រួតពិនិត្យ និងពង្រឹងកិច្ចការត្រួតពិនិត្យ​អាវុធ​ជាតិ​ផ្ទុះ គ្រឿងញៀន​ គ្រឿងស្រវឹង និង​ការអនុវត្តច្បាប់​ស្ដីពី​ចរាចណ៍​ផ្លូវ​គោក ឱ្យបានជាប់ជាប្រចាំ និង​ជា​ពិសេស​កិច្ច​ការ​ការពារ​សន្ដិសុខ សណ្ដាប់​ធ្នាប់ និង​របៀបរៀបរយ​សាធារណៈជូន​បងប្អូន​ប្រជាពលរដ្ឋ​ក្នុង​ឱកាស​ពិធី​បុណ្យចូល​ឆ្នាំ​ថ្មី​ប្រពៃណី​ជាតិ ឆ្នាំ​កុរ ឯកស័ក ព.ស២៥៦៣ គ.ស​២០១៩ ។​

យោងតាមលិខិតរដ្ឋបាលរាជធានីភ្នំពេញចុះ​នៅទី១ ខែមេសា ឆ្នាំ២០១៩កន្លងទៅ បានប្រកាសចេញសេចក្តីជូន​ដំណឹង​ដល់សាធារណៈជនចំនួន៣ចំណុច ដើម្បីរក្សាសន្តិសុខ សុវត្ថិភាព ​សណ្តាប់ធ្នាប់​និងរបៀបរៀប​រយ​សាធារណៈ​នៅក្នុងរាជធានីភ្នំពេញ​ នា​ឱកាស​​បុណ្យចូលឆ្នាំថ្មី ប្រពៃណីជាតិ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៩ នា ពេលខាងមុខនេះ មានដូចខាងក្រោមនេះ ៖

១-ត្រូវគោរពច្បាប់ចរាចរណ៍ផ្លូវគោក និងមិនត្រូវបើកបរក្នុងស្ថានភាពស្រវឹង ដើម្បីជៀសវាងគ្រោះថ្នាក់ផ្សេងៗ

២-ចូលរួមទប់ស្កាត់គ្រោះអគ្គិភ័យដោយប្រុងប្រយ័ត្ន និងម្ចាស់ការខ្ពស់ ចំពោះភ្លើងទៀន ធូប ភ្លើង ចង្ក្រានចរន្ត អគ្គិសនី ដើម្បីរក្សាបានទ្រព្យសម្បត្តិ អាយុជីវិតផ្ទាល់ខ្លួន និងអ្នកដទៃ ។

៣-ចូលរួមលេងល្បែងប្រជាប្រិយគ្រប់ប្រភេទ​និងជៀសវាងដាច់ខាត​ការលេងបាញ់ទឹកជះទឹក គប់ស្បោងទឹ លាប ធ្យូង ប៉ាតម្សៅ ទះគក់ដោយដៃ ឬសវាយដោយរំពាត់ដល់អ្នកដំណើរ ឬជិះម៉ូតូបង្ហោះ ប្រដេញគ្នាលេង នៅ តាមដងផ្លូវ ដែលអាចនាំឲ្យមានគ្រោះថ្នាក់ជាយថាហេតុ ប៉ះពាល់ដល់អាយុជីវិតផ្ទាល់ខ្លួន និងអ្នកដំណើរ ព្រមទាំងហាមដាច់ខាតការលេងល្បែងស៊ីសង អុជផាវ គ្រឿងផ្ទុះគ្រប់ប្រភេទ ដើម្បីរក្សានូវភាពថ្លៃថ្នូរ ស័ក្តិសមជា កុល បុត្រកុលធីតាខ្មែរ ។

សេចក្តីជូនដំណឹងបានបញ្ជាក់ទៀតថា អាជ្ញាធរគ្រប់លំដាប់ថ្នាក់ ត្រូវសហការអនុវត្ត និងផ្សព្វផ្សាយឲ្យមាន ប្រសិទ្ធភាព ព្រមទាំងចាត់វិធានការផ្លូវច្បាប់ ចំពោះអ្នកប្រព្រឹត្តអំពើមិនគប្បីខាងលើ ដែលបង្កឲ្យប៉ះពាល់ ដល់ប្រពៃណី សេចក្តីថ្លៃថ្នូររបស់ជាតិ ក៏ដូចជាប៉ះពាល់ដល់សន្តិសុខសុវត្ថិភាព សណ្តាប់ធ្នាប់ និងរបៀបរៀបរយ សាធារណៈក្នុងរាជធានីភ្នំពេញ ៕ ដោយ ៖ ស សម


ចែករំលែក៖
ពាណិជ្ជកម្ម៖ ads2 ads3 ambel-meas ads5 ads6 scanpeople ads7 fk Print