ភ្នំពេញ៖ នៅក្នុងប្រព័ន្ធទំនាក់ទំនងសង្គមហ្វេសប៊ុករបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១៣ ខែធ្នូ ឆ្នាំ២០១៥ បានសរសេរថា៖ «ថ្ងៃអាទិត្យនេះខ្ញុំវិលមកបញ្ហាគ្រួសារបន្តទៀត។ ល្ងាចថ្ងៃសុក្រនិងព្រឹកថ្ងៃសៅរ៍កន្លងមកនេះក្រុមគ្រួសារបាននិមន្តព្រះសង្ឃមកសូត្រមន្ត និងសង្ឃទានជូនម្តាយក្មេកខ្ញុំដែលមានអាយុ៩២ឆ្នាំទៅហើយ។ នេះជាឱកាសជួបជុំបងប្អូនកូនចៅយ៉ាងច្រើនចំពោះមុខម្តាយ ជីដូន ជីដូនទួត។ ងាកមកចៅខ្ញុំវិញទាំងប្រុសទាំងស្រីបានបង្ហាញនូវការសប្បាយរីករាយរបស់គេតាមភេទ និងតាមវ័យ។ តែអ្វីដែលគួរឱយកត់សម្គាល់នោះ គឺចៅចង់រៀននិងចៅមិនចង់រៀន។ ចៅចង់រៀនបានមកជំរាបលាដោយពោលពាក្យថា លោកតាចៅសុំលាទៅរៀនបន្តទៀត។ ឯចៅដែលមិនចង់រៀនបន្ទាប់ពីសុំច្បាប់ពីម្តាយមិនបានក៏មកនិយាយជាមួយខ្ញុំថា លោកតាចៅសុំមិនរៀនល្ងាចនេះទេព្រោះបុណ្យយាយទួតមានបងប្អូនមកច្រើន ចៅចង់នៅលេងជាមួយបងប្អូន។
រឿងតូចតាចក្នុងក្រុមគ្រួសារមែនពិត តែវាលំបាកសំរាប់ខ្ញុំ តើតម្រូវចិត្តចៅឬតម្រូវចិត្តកូន? យោងលើបទពិសោធន៍ដែលខ្ញុំមានជោគជ័យលើការអប់រំកូនៗ គឺទន្ទឹមនិងការស្រឡាញ់កូនក៏ត្រូវមានវិន័យដែលត្រូវគោរពជាចាំបាច់។ កូនៗទាំងអស់ខ្ញុំជាអ្នកដឹកដៃពួកគេចូលសាលារៀន និងជាអ្នកតាមដានត្រួតពិនិត្យសៀវភៅទំនាក់ទំនងរវាងសាលានិងគ្រួសារ។ ពេលនេះកូនៗរបស់ខ្ញុំកំពុងយករបៀបរបបដែលខ្ញុំធ្លាប់ប្រើប្រាស់ដើម្បីអប់រំថែទាំពួកគេពីមុនមក យកមកដើម្បីប្រើប្រាស់លើចៅៗរបស់ខ្ញុំហើយ។
ខ្ញុំត្រូវតែគោរពការសំរេចរបស់ពួកគេ ព្រោះពួកគេចង់ឱយកូនៗបានល្អ ហើយមានតែឪពុកម្តាយរបស់ចៅៗនេះហើយដែលត្រូវទទួលខុសត្រូវចំពោះវាសនាកូនៗរបស់ពួកគេ។ ខ្ញុំសង្ឃឹមថាចៅៗរបស់ខ្ញុំនឹងក្លាយជាពលរដ្ឋល្អ។
ជោគជ័យនៃមនុស្សម្នាក់ៗ ក្រុមគ្រួសារនិមួយៗគឺជាផ្នែកដ៏សំខាន់នៃជោគជ័យរបស់សហគមន៍មួយ រហូតដល់ប្រទេសជាតិមួយ»៕
