ភ្នំពេញ៖ តារាចម្រៀងដែលទើបនឹងលេចមុខជាថ្មីក្រោយជួបរឿងរ៉ាវជីវភាពលំបាកនោះ បានបញ្ចេញបទចម្រៀង២បទ ក្នុងផលិតកម្មថ្មីរបស់លោក ឧកញ៉ា ឡេង ណាវ៉ាត្រាគឺផលិតកម្ម Galaxy ។
ទោះទទួលបានការគាំទ្រច្រើនគួរសមនោះក្តី ក៏តារាចម្រៀងរូបនេះបញ្ជាក់ថា ការវិលរកការងារសិល្បៈជាថ្មី ដើម្បីជួយខ្លួនឯង គ្រួសារ និងតាមសំណូមពររបស់ទស្សនិកជន មិនមែនដើម្បីប្រជែងជាមួយសិល្បករជំនាន់ក្រោយនោះទេ។
ចាប់កាន់ក្បាលមេក្រូច្រៀងជាថ្មី លោកចាន់ សម័យ បានបង្ហើរសំនៀងក្នុងបទចម្រៀង២បទក្នុងផលិតកម្មថ្មីគឺបទមរតកដើម “បាត់ស្រីទៅណា?” និងបទ” ស្រីល្អដូចក្អែក”។ ក្រោយបញ្ចេញស្នាដៃទាំងនេះលោកហាក់ទទួលបានការចាប់អារម្មណ៍ជាថ្មីពីទស្សនិកជន។ បញ្ជាក់មុនពេលឡើងយន្តហោះរួមជាមួយតារាចម្រៀងប្រុសស្រីជំនាន់ក្រោយ១០រូបផ្សេងទៀតទៅច្រៀងរាំនៅប្រទេសកូរ៉េនោះ លោកចាន់ សម័យបញ្ជាក់ថា លោកពិតជាសប្បាយចិត្តដែលមានឱកាសលេចមុខជាថ្មី ក្រោយពីខកខានអស់ជាច្រើនឆ្នាំ។
តារារូបនេះបញ្ជាក់ថា ពិតជាត្រេកអររកអ្វី មកប្រៀបបានព្រោះតែទទួលបានការអញ្ជើញជាហូរហែពីសំណាក់ម្ចាស់កម្មវិធីនានាទាំងក្នុងនិងក្រៅស្រុក។ លោកថាការផ្តល់ឱកាសពីលោកឧកញ៉ា ឡេង ណាវ៉ាត្រា គឺលើសពីអ្វីដែលលោករំពឹងទុក បន្ថែមពីការជួយដោយផ្ទាល់កន្លងមក។ លោកបញ្ជាក់ថាក្រោយចូលឆ្នាំថ្មីលោកក៏ត្រៀមបញ្ចេញបទចម្រៀងមួយចំនួនបន្ថែមទៀតដើម្បីបម្រើការកម្សាន្ត។ លោកថាបើទោះបីជាការចេញបទចម្រៀងថ្មីនៅពេលខាងមុខក្តីក៏លោកបញ្ជាក់ថាមិនមានបំណងប្រកួតប្រជែងជាមួយសិល្បករជំនាន់ក្រោយដែរ ព្រោះតែលោកយល់ថាបច្ចុប្បន្នមានសិល្បករវ័យក្មេងជំនាន់ក្រោយមានសមត្ថភាពច្រើន។
ងាកមកស្ថានភាពជំងឺឆ្អឹងខ្នងប្រចាំកាយវិញ តារាចម្រៀងរូបនេះបញ្ជាក់ថា លោកនៅតែបន្តពិនិត្យតាមដានព្យាបាលនៅឡើយ ខណៈដែលពេលនេះមានបងប្អូនខ្មែររស់នៅប្រទេសបារាំងបានជួយផ្ញើឱសថតល្អៗមកមួយចំនួនដើម្បីឲ្យក្រុមគ្រូពេទ្យពិនិត្យ និងដើម្បីប្រាកដថាអាចយកមកព្យាបាលជំងឺលោកបានដែរឬយ៉ាងណា។
ទោះជាយ៉ាងណាលោកនៅតែមិនភ្លេចគុណបំណាច់ដែលសប្បុរសជនទាំងអស់ទាំងក្នុងនិងក្រៅប្រទេសដែលបានជួយលើកទឹកចិត្ត និងផ្តល់ជាថវិកាជួយសម្រួលដល់លោកក្នុងគ្រាលំបាកនោះផងដែរ៕ ដោយ វឌ្ឍនា
