កំពង់ឆ្នាំង ៖ មានការភ្ញាក់ផ្អើលមួយបានកើតឡើង ខណៈដែលបុរសម្នាក់បានអះអាងថា ខ្លួនត្រូវបានជនមិនស្គាល់មុខភ្ជង់ប្លន់យកចិញ្ចៀនមាសមួយវង់។ករណីខាងលើនេះបានកើតឡើងនៅវេលាម៉ោងប្រមាណជា១០និង១៥នាទីព្រឹក ថ្ងៃទី៩ ខែកក្កដាឆ្នាំ២០១៥ នៅចំណុចត្រង់ស្ថានីយបូមទឹកខាងមុខវត្តយាយទេព ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង។ បុរសដែលបានអះអាងថា មានគេភ្ជង់ប្លន់យកមាស ត្រូវបានគេស្គាល់ឈ្មោះតូន នៅ អាយុ៥៨ឆ្នាំ មានទីលំនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង មានមុខរបរធ្វើចម្ការ។
ប្រភពពីជនរងគ្រោះបាននិយាយឲ្យដឹងនៅមុខសមត្ថកិច្ចដែលកំពុងធ្វើការសាកសួររថា នៅមុនពេលកើតហេតុ គាត់បានជិះម៉ូតូយកផ្លែឈើដែលបានទិញពីផ្សារទៅផែកាណូតផ្សាក្រោម ដើម្បីផ្ញើទៅឲ្យប្រពន្ធនៅឯភូមិប្រឡាយមាស។
បុរសរងគ្រោះខាងលើបានឲ្យដឹងបន្ថែមទៀតថា នៅពេលដែលគាត់ជិះម៉ូតូត្រឡប់មកផ្ទះវិញស្រាប់តែមានបុរសមិនស្គាល់មុខម្នាក់ ជិះម៉ូតូតាមក្រោយគាត់ ដោយបានហៅឲ្យឈប់នៅចំណុចកើតហេតុខាងលើ ដើម្បីឲ្យគាត់ចូលទៅក្នុងវត្តសួររកកន្លែងគ្រូ ត.ឆ្អឹងបាក់ ពេលនោះគាត់បានឈប់ម៉ូតូ ស្រាប់តែលេចមុខជនមិនស្គាល់មុខ២ទៅ៣នាក់ទៀត មានស្លៀកពាក់ឯកសណ្ឋាននគរបាលបានស្ទុះយកកាំភ្លើងមកភ្ជង់ ខ្លះដោះចិញ្ចៀនគាត់ និងខ្លះទៀតដកសោម៉ូតូ ហើយបាននាំគ្នាឡើងជិះម៉ូតូ៣គ្រឿងគេចខ្លួនចេញឡើងទៅផ្សារលើបាត់តែម្ដង។
ក្រោយកើតហេតុក៏ស្រាប់តែមានការភ្ញាក់ផ្អើលឆោឡោឡើងដល់ប្រជាពលរដ្ឋ និងសមត្ថកិច្ចបាននាំជនរងគ្រោះមកអធិការនគរបាលក្រុងកំពង់ឆ្នាំង ដើម្បីធ្វើការសាកសួរ និងកម្លាំងមួយចំនួនទៀតបានចេញតាមគោលដៅស្ទាក់រកមុខសញ្ញា ក្នុងនោះជនរងគ្រោះបានបាត់តែចិញ្ចៀនមាសមួយវង់ ចំនួន៥ជី។
តាមការសន្និដ្ឋានរបស់សមត្ថកិច្ច ជំហានរបស់សមត្ថកិច្ចព្រហ្មទណ្ឌធ្ងន់និងស្រាល បានធ្វើការកំណត់ជារឿងឆបោកល្បែងស៊ីសងភ្នាល់ដាក់របស់របរ មានលុយ និងសម្ភារៈមួយចំនួន ក្រោយពីជនរងគ្រោះដឹងខ្លួន បានជិះម៉ូតូគេចចេញពីក្រុមជនល្មើស បានជិះតាមសួររកកន្លែងគ្រូសម្រាប់ត.ឆ្អឹងបាក់ ហើយកម្លាំងរបស់ពួកជនល្មើសចេញមកគាបស៊ីដូចប្លន់តែម្ដង។
ក្នុងនោះសមត្ថកិច្ចបានឲ្យដឹងបន្ថែមទៀតថា ២ទៅ៣ឆ្នាំមុន ក៏ធ្លាប់កើតមានរបៀបដូចគ្នាអញ្ចឹងផងដែរ ក្រោយពេលធ្វើសកម្មភាពរួច ជិះម៉ូតូគេចខ្លួនបាត់។ ចន្ថា
