ភ្នំពេញ៖ មនុស្សប្រុសស្រី២នាក់បានរងរបួសធ្ងន់ ត្រូវបានបញ្ជួនទៅកាន់មន្ទីរពេទ្យ និងរនាំងដែកពុះចែកទ្រូងផ្លូវចំនួន៦ផ្ទាំងបាក់រាបដល់ដី ខណៈដែលបុរសម្នាក់ស្រវឹងស្រាបើកបុក។
គ្រោះថ្នាក់ចរារចណ៍នេះបានកើតឡើងនៅវេលាម៉ោង១៧និង១០នាទី ថ្ងៃទី១៤ ខែធ្នួ ឆ្នាំ២០១៥ នៅចំណុចមុខមណ្ឌលសុខភាពទឹកថ្លាផ្លូវសហពន្ធ័រុស្សី សង្កាត់ទឹកថ្លា ខណ្ឌសែនសុខ។
ជនរងគ្រោះទី១ឈ្មោះ មុន្នី រាជ ភេទស្រី អាយុ១៥ឆ្នាំ ជាសិស្ស ស្នាក់ភូមិ សង្កាត់ ទឹកថ្លា ខណ្ឌសែនសុខ ទី២ឈ្មោះ ជា សុណ្ណ ភេទប្រុស អាយុ១៧ឆ្នាំ ជាសិស្សរៀននៅវិទ្យាល័យបុរី១០០ខ្នង ស្នាក់នៅ ភូមិសង្កាត់ទឹកថ្លា ខណ្ឌសែនសុខ។ ដោយឡែកអ្នកបើកបរបង្កមិនស្គាល់អត្តសញ្ញាណទេ ។
ប្រភពពីកន្លែងកើតហេតុបានអោយដឹងថា នៅមុនពេលកើតហេតុគេឃើញជនរងគ្រោះឈ្មោះ ជា សុណ្ណ បានជិះម៉ូតូ១គ្រឿងម៉ាកស៊ុយសុីគី ស្តេប ពណ៍ខ្មៅ ពាក់ស្លាកលេខ ភ្នំពេញ 1H.9909 ជិះម្នាក់ឯង ក្នុងទិសដៅពីកើតទៅលិច ជនរងគ្រោះម្នាក់ទៀត ឈ្មោះ មុន្នី រាជ ភេទស្រី បានជិះម៉ូតូ១គ្រឿង ម៉ាកស៊ុយសុីគីឡែត ពណ៍ស ពាក់ស្លាកលេខ ភ្នំពេញ 1FI.6599 ឌុបគ្នា២នាក់ក្នុងទិសដៅពីកើតទៅលិចដូចគ្នាលុះមកដល់ចំណុចកើតហេតុ ក៏មានរថយន្ត១គ្រឿងម៉ាក FRONTER ពណ៍ស ពាក់ស្លាកលេខ ភ្នំពេញ 2Z.8212 បើកបរក្នុងទិសដៅពីលិចទៅកើតក្នុងល្បឿនលឿ ក៏រេចង្កូតមកបុក និងរនាំងដែកបាក់អស់៦ផ្ទាំងហើយជ្រុលមកបុករះនឹងម៉ូតូទាំង២គ្រឿងខាងលើបណ្តាលអោយមនុស្សរងរបួសធ្ងន់ទាំង២នាក់តែម្តង ។
ក្រោយកើតហេតុ ជនរងគ្រោះត្រូវរថយន្តសាម៊ុយដឹកយកទៅសង្គ្រោះនៅមន្ទីរពេទ្យ ចំណែកអ្នកបើកបររថយន្តបង្ក និងម៉ូតូ សមត្ថកិច្ចចរាចរណ៍ស្ទូចយកទៅរក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញដើម្បីដោះស្រាយនៅពេលក្រោយ ៕
ដោយ៖ តុង សីហា
