ភ្នំពេញ៖ពេលនេះ ជនបង្កដែលបាញ់៥គ្រាប់បណ្ដាលបែកកញ្ចក់ឡាន ក្នុងបទល្មើសប៉ុនប៉ងឃាតកម្ម ត្រូវបានប្រភពព័ត៌មានបញ្ជាក់ថា លោកវរសេនីយ៍ទោ ដួង ណាគ្រី អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ។ ចំណែកជនរងគ្រោះ ឈ្មោះ ភូរិស្ស ស្តូរ៉ា់ ជាអគ្គនាយកក្រុមហ៊ុនសន្តិសុខ CPS ។
អធិការរងនគរបាលខណ្ឌច្បារអំពៅ លោក ម៉ៅ សឿត ថ្លែងប្រាប់ថា នៅព្រឹកថ្ងៃទី២ ខែឧសភា ឆ្នាំ២០១៩ នេះ នគរបាលខណ្ឌច្បារអំពៅ បានបញ្ជូនសំណុំរឿងនិងជនបង្ក ទៅនគរបាលព្រហ្មទណ្ឌកំរិតធ្ងន់នៃស្នងការដ្ឋាននគរបាលរាជធានីភ្នំពេញ ដេីម្បីចាត់ការបន្តតាមនីតិវិធី ។
ដោយឡែក ជនរងគ្រោះ ភូរិស្ស ស្តូរ៉ា់ ជាអគ្គនាយកក្រុមហ៊ុនសន្តិសុខ CPS ថ្លែងប្រាប់ថា លោកពុំដែលស្គាល់ ឬ ធ្លាប់មានទំនាស់ជាមួយជនបង្កនោះទេ ។ ប៉ុន្តែនៅយប់កេីតហេតុ គឺ ជនបង្កមានលក្ខណៈស្រវឹងជោកជាំ ទេីបឈានដល់ការបាញ់បំបែកកញ្ចក់ឡានរបស់លោក ។ ពេលនេះ លោកបានដាក់ពាក្យបណ្ដឹងជាផ្លូវការហើយ ដេីម្បីឱ្យសមត្ថកិច្ចចាត់ការតាមច្បាប់ទៅលេីជនបង្ករូបនេះ ។
ប្រភពព័ត៌មានច្បាស់ការណ៍មួយ ថ្លែងប្រាប់ថា បន្ទាប់ពីហេតុការណ៍បាញ់ប្រហារកេីតឡើងកាលពីវេលាម៉ោង០០៖៥៥នាទី រំលងអាធ្រាត្រឈានចូលថ្ងៃទី២ ខែឧសភា ឆ្នាំ២០១៩ ស្ថិតនៅចំណុចផ្លូវលេខ៣៦៣កែងផ្លូវ៦៤៨ ភូមិព្រែក សង្កាត់ច្បារអំពៅ១ ខណ្ឌច្បារអំពៅ គឺ មានអន្តរាគមន៍ជាច្រើនពីមន្ត្រីគ្រាក់ៗឱ្យមានការសម្របសម្រួលគ្នា ។ ប៉ុន្តែដោយសារជនរងគ្រោះមិនព្រមទេីបឈានដល់ការដាក់ពាក្យបណ្ដឹង ឃាត់ខ្លួនជនបង្កតែម្តង ។
មជ្ឈដ្ឋានជាច្រើន សង្ឃឹមថា សមត្ថកិច្ចនឹងចាត់លេីជនបង្កតាមច្បាប់ ព្រោះសកម្មភាពរបស់ជនបង្កមានលក្ខណៈព្រហេីននិងសាហាវ ៕
ដោយ៖ ចេស្តា
