ប្រទេសចិន៖ សារព័ត៌មាន Wall Street Journal នៅថ្ងៃទី៥ខែឧសភា បានផ្សាយថា ៖ចិនអាចនឹងលុបកិច្ចពិភាក្សាលើវិស័យពាណិជ្ជកម្មជាមួយអាមេរិក ក្រោយពេលប្រធានាធិបតីដូណាលត្រាំបានព្រមានដំឡើងពន្ធលើទំនិញនាំចូលពីចិនមានតម្លៃ ២០០ពាន់លានដុល្លារ ។
ព័ត៌មានស្តីពីការលុបកិច្ចពិភាក្សាខាងលើ របស់ចិនកើតឡើងក្នុងពេលដែល បណ្តាញសង្គម Twitter បានប្រកាស់ដំឡើងពន្ធពី១៥-២៥ភាគរយ ទៅលើទំនិញ ២០០ពាន់លានដុល្លារ។
ការតម្លើងពន្ធនឹងចាប់ផ្តើមនៅថ្ងៃទី១០ខែឧសភា ខាងមុខនេះ។ ក្រៅពីនេះលោកត្រាំក៏បានព្រមានដំឡើងពន្ធ ២៥ភាគរយដល់ទំនិញ មានតម្លៃ ៣២៥ពាន់លានដុល្លារផ្សេងទៀត របស់ចិន។
នៅលើបណ្តាញសង្គមTwitter ផ្ទាល់ខ្លួនប្រធានាធិបតីដូណាលត្រាំបានប្រកាសឲ្យដឹងថា៖ នៅក្នុងខែតុលា ចិននឹងត្រូវបង់ពន្ធ ២៥ភាគរយដល់អាមេរិក ក្នុងវិស័យបច្ចេកវិទ្យាជាន់ខ្ពស់ ក្រៅពីនេះគឺទំនិញបង់ពន្ធ ១០ភាគរយលើមុខទំនិញតម្លៃ២០០ពាន់លានដុល្លារ ។
លោកត្រាំបានលើកឡើងថា ដំណើការពិភាក្សា ក្នុងវិស័យពាណិជ្ជកម្មរវាងប្រទេសទាំងពីរ មានសភាពយឺតយ៉ាវ ។ សកម្មភាពខាងលើរបស់លោកត្រាំ កើតឡើង ក្រោយសេតវិមានបានប្រកាសថាដំណើរការពិភាក្សាក្នុងវិស័យពាណិជ្ជកម្មរវាងប្រទេសទាំងពីរ កំពុងតែល្អប្រសើរ ហើយប្រទេសទាំងពីរត្រៀមចុះហត្ថលេខា នៅកិច្ចព្រមព្រៀង។
តាមគម្រោង គណៈប្រតិភូចិននិងទៅកាន់ទីក្រុងវ៉ាស៊ីនតោននៅថ្ងៃទី៨ខែឧសភា ដើម្បីពិភាក្សា លើវិស័យពាណិជ្ជកម្មជាថ្មី ៕
ដោយ៖ មែវ សាធី
