ខេត្តកំពង់ឆ្នាំង៖ បុរសម្នាក់រងរបួសធ្ងន់ និងស្ត្រីម្នាក់ទៀតរងរបួសស្រាលនៅក្នុងហេតុការណ៍គ្រោះថ្នាក់ចរាចរណ៍មួយ ដែលបង្ករឡើងដោយរថយន្តបុកគោយន្តកែច្នៃពីក្រោយអូសជិត១០០ម៉ែត្រ ។
ដែលហេតុការណ៍នេះបានកើតឡើងកាលពីវេលាម៉ោង៧ព្រឹកថ្ងៃទី១៦ ខែធ្នូ ឆ្នាំ២០១៥ នៅតាមបណ្តោយផ្លូវជាតិលេខ៥ ស្ថិតក្នុងភូមិសាលាឃុំ ឃុំពពេល ស្រុកបរិបូរណ៍ ខេត្តកំពង់ឆ្នាំង ។
សមត្ថកិច្ចបានអោយដឹងថា ជនគ្រោះមានឈ្មោះ ជន ធី ភេទប្រុស អាយុ៣៨ឆ្នាំ រស់នៅក្នុងភូមិតាប៉ាង ឃុំចក ស្រុកបរិបូរណ៍ ខេត្តកំពង់ឆ្នាំង បានរងរបួសធ្ងន់ត្រង់ក្បាល ។ ដោយឡែកជនរងគ្រោះម្នាក់ទៀតឈ្មោះ ហែ រាសី ភេទស្រី អាយុ ២៩ឆ្នាំ រស់នៅក្នុងភូមិឃុំជាមួយគ្នា ។
សមត្ថកិច្ចបានអោយដឹងថា នៅមុនពេលកើតហេតុ មានគោយន្តកែច្នៃមួយគ្រឿង ជិះគ្នា៤នាក់ ធ្វើដំណើរក្នុងទិសដៅពីជើងទៅត្បួង នៅពេលមកដល់ចំណុចកើតហេតុ ក៍មានរថយន្តម៉ាកអ៊ីហ្ស៊ុយស៊ុយ ពណ៌ខ្មៅពាក់ស្លាកលេខ ង០៩៤៣-ភព២ ធ្វើដំណើរស្របទិសគ្នា ដោយបើកក្នុងល្បឿនយ៉ាងលឿន ហើយបានគេចជង្ហុកក៍ជ្រុលទៅបុកគោយន្តកែច្នៃពីក្រោយពេញមួយទំហឹង ហើយរុញគោយន្តកន្រ្តៃដែលមានអ្នកជិះនៅខាងលើ អូសជិត១០០ម៉ែត្រជ្រុលទៅបុកតូបលក់ឥវ៉ាន់មួយទៀត ក្នុងហេតុការណ៍នេះបណ្តាលអោយអ្នកជិះនៅលើគោយន្តរងបួសធ្ងន់ម្នាក់ និង ស្រាលម្នាក់ ។
ក្រោយពេលកើតហេតុដឹកយកមកសង្រ្គោះនៅមន្ទីរពេទ្យបង្អែកខេត្តកំពង់ឆ្នាំង ដោយឡែកអ្នកបើកបរ បានបន្ថែមល្បឿនរថយន្តបើករត់គេច តែត្រូវបានអ្នកបើកគោយន្ត ឡើងរថយន្តមួយផ្សេងទៀតដេញតាមរួចចាប់បាន បញ្ជូនមកអធិការនគរបាលស្រុកបរិបូរណ៍ដើម្បីរង់ចាំដោះស្រាយតាមនីតិវិធី ។
សមត្ថកិច្ចនគរបាលចរាចរណ៍ ស្រុកបរិបូរណ៍បានព្យាយាមលាក់បាំងឈ្មោះអ្នកបើកបររថយន្ត ដោយប្រាប់ថាមិនដឹងមួយណាជាអ្នកបើកនោះទេ បើទោះបីជាអ្នកបើកបរត្រូវបានមានវត្តនៅក្នុងអធិការដ្ឋាននោះដែរ ៕
ដោយ៖ ចន្ថា
