ភ្នំពេញ៖ កម្លាំងការិយាល័យរដ្ឋបាលសរុបនៃ មន្ទីរប្រឆាំងគ្រឿងញៀនអគ្គស្នងការដ្ឋាននគរបាលជាតិ ដែលដឹកនាំដោយលោក អ៊ិន សុង និងមានការចូលរួមដឹកនាំជាមួយ លោក សៀង សុខ ព្រះរាជអាជ្ញារងរាជធានីភ្នំពេញផងនោះ បានចុះបង្ក្រាបករណីជួញដូរគ្រឿងញៀនមួយ ដោយចាប់បានស្រី្តមេជួញដូរម្នាក់ និងដកហូតថ្នាំញៀនបានមួយចំនួន ។
ប្រតិបត្តិការនេះបានប្រព្រឹត្តទៅនៅ វេលាម៉ោង ១០និង២០ នាទីយប់ ថ្ងៃទី២៩ ខែមិថុនា ឆ្នាំ២០១៥នៅតាមដងផ្លូវ ត្រង់ចំណុចភ្លើងស្ដុបផ្លូវលេខ២៧១ កែងផ្លូវលេខ៣៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
មន្រី្តនគរបាលបង្ក្រាបគ្រឿងញៀនបានឲ្យដឹងថាសមត្ថកិច្ចបានឃាត់ខ្លួនជនសង្ស័យ ម្នាក់ ឈ្មោះ ប៊ុន ស្រីអូន ភេទស្រី អាយុ២០ឆ្នាំមានទីលំនៅក្នុងភូមិ១ សង្កាត់ផ្សារដើមថ្កូវ ខណ្ឌចំការមន រួមនឹងវត្ថុតាងម្សៅថ្នាំញៀន ចំនួន៤កញ្ចប់ធំ ទម្ងន់ ៣៨៣,៧ក្រាម និងទូរស័ព្ទដៃ ០១គ្រឿងញៀន ។ បន្ទាប់សមត្ថកិច្ចឃាត់ខ្លួនស្រី្តនេះរួចមកសត្ថកិច្ចបានបន្ដទៅឆែកឆេរបន្ទប់ជួលរបស់ស្រី្តសង្ស័យខាងលើ ហើយបានរកឃើញថ្នាំញៀនប្រភេទម៉ាទឹកកកចំនួន៦កញ្ចប់ និងថ្នាំប្រភេទគ្រវីចំនួន ២៨គ្រាប់ទៀត។
បច្ចុប្បន្នសមត្ថកិច្ចកំពុងសាកសួរស្រី្តសង្ស័យរូបនេះដើម្បីរកបក្ខពួកចាប់ខ្លួនបន្តទៀតនិងកំពុងកសាងសំណុំរឿងដើម្បីបញ្ជូនទៅសាលាដំបូងរាជធានីចាត់ការតាមច្បាប់៕
