ភ្នំពេញ៖ ប្រឡូកសិល្បៈមិនក្រោម៥ឆ្នាំទេ វុទ្ធី សាក់ បានបង្ហាញក្តីស្រមៃរបស់ខ្លួនក្នុងការប្រឡូកក្នុងការងារជាសម្តែងក្នុងភាពយន្តខ្នាតធំ បើទោះបីជាស្ថិតក្នុងតំណែងណាមួយក៏ដោយ។ ការបង្ហើបនេះធ្វើឡើងក្រោយពីតារារូបនេះមានឱកាសត្រឹមការសម្តែងក្នុងបទចម្រៀង ការបង្ហាញម៉ូតសម្លៀកបំពាក់ប៉ុណ្ណោះ។
ផ្តើមពីការថតបង្ហាញម៉ូតសម្លៀកបំពាក់សម្រាប់សម្អាងការ និងហាងលក់សម្លៀកបំពាក់មួយចំនួន វុទ្ធី សាក់ បានសម្រេចចិត្តហក់ចូលការសម្តែងក្នុងបទចម្រៀងមួយចំនួនជាបន្តបន្ទាប់ ប៉ុន្តែតារាប្រុសស្រស់សង្ហារូបនេះមិនទាន់ទទួលបានឱកាសចូលរួមថតភាពយន្តខ្នាតធំនៅឡើយ។ លោកថាសមត្ថភាពសម្តែងរបស់លោកក្នុងបទចម្រៀងមួយចំនួននោះទទួលបានការកោតសរសើរច្រើនពីផលិតករ ប៉ុន្តែលោកនៅតែខ្វះឱកាសចាប់ចូលប្រឡូកក្នុងការសម្តែងទៅវិញ។
តារារូបនេះថ្លែងក្នុងន័យតូចចិត្តតិចៗថា ដោយសារការប្រឡូកសិល្បៈជាច្រើនឆ្នាំកន្លងមក អាចបណ្តាលមកពីទំនាក់ទំនងជាមួយផលិតកម្មនានានៅមានកម្រិត ។
ទោះជាយ៉ាងណាលោកនៅតែដាក់ក្តីសង្ឃឹមថានឹងមានផលិតកម្មណាមួយផ្តល់ឱកាស បើទោះបីជាការសម្តែងនោះស្ថិតក្នុងតំណែងតួអ្វីក៏ដោយ ហើយលោក នឹងប្រឹងប្រែងឲ្យអស់ពីសមត្ថភាព៕ ដោយ វឌ្ឍនា
