ភ្នំពេញ៖ រថយន្តស៊េរីទំនើបម៉ាកឡង់គ្រីស័របានបើកបុករថយន្តឡិចស៊ីស៤៧០ចំំហៀងពីក្រោយ ហើយរថយន្តឡិចស៊ីសជ្រុលទៅបុកដើមឈើបន្ថែមទៀត បណ្តាលអោយរងការខូចខាតយ៉ាងដំណំ ។

ហេតុការណ៍នេះបានកើតឡើងកាលពីវេលាម៉ោង១០ និង១៥នាទីយប់ថ្ងៃទី១៦ ខែធ្នូ ឆ្នាំ២០១៥ តាមបណ្តោយផ្លូវលេខ៣១០ កែងនិងផ្លូវលេខ៥១ ស្ថិតក្នុងសង្កាត់បឹងកេងកងទី១ ខណ្ឌចំការមន ។

ប្រភពព័ត៍មានពីកន្លែងកើតហេតុបានអោយដឹងថា មុនពេលកើតហេតុគេបានឃើញរថយន្តឡិចស៊ីស៤៧០ ពណ៍ខ្មៅ ពាក់ស្លាកលេខ ភ្នំពេញ 2L-4230 បើកតាមបណ្តោយផ្លូវលេខ៥១ ពីត្បូងទៅជើង ពេលមកដល់ចំណុចកើតហេតុ មានរថយន្តស៊េរីទំនើបម៉ាកឡង់គ្រីស័រ ពណទឹកប្រាក់ ពាក់ស្លាកលេខ ភ្នំពេញ 2X-6189 បើកបរតាមបណ្តោយផ្លូវលេខ៣១០ ទិសដៅពីលិចទៅកើតក៏បានបុកគូទរថយន្ត៤៧០ពីក្រោយ ហើយរថយន្តឡិចស៊ីសបានជ្រុលទៅបុកដើមឈើរងការខូចខាតទាំងសងខាងយ៉ាងដំណំ ។

បន្ទាប់ពីបង្កហេតុម្ចាស់រថយន្តទាំង២គ្រេឿងបានប្រកែកគ្នាយ៉ាងតឹងសរសៃកប្រមាណជាជិតមួយម៉ោង ទាល់តែសមត្ថកិច្ចជំនាញទៅដល់ទើបភាគីទាំង២សម្រេចព្រមព្រៀងគ្នាយករថយន្តទៅជួសជុលរេៀងៗខ្លួន ៕

ដោយ៖ ភារ៉ា ដង្កោ