ខេត្តកំពត ៖ ពាក់ព័ន្ធនឹងការបោះ បង្គោលចូលសមុទ្រ នៅក្នុងខេត្តកំពតត្រូវ បានលោក វីល្លាម ដែលជាអ្នកខ្នះខ្នែង ក្នុងរឿងនេះតាំងពីដើមរៀងមកនោះនៅយប់ថ្ងៃទី២៧ ខែឧសភានេះ លោកបាន សរសេរលើហ្វេសប៊ុកថា លោកអភិបាលខេត្តកំពតបានបញ្ជាក់ថា ដីនោះគឺមានប្លង់កម្មសិទ្ធិស្របច្បាប់ របស់ប្រជាពលរដ្ឋ ហើយលោកក៏បានលើកឡើងបន្ថែមថា នឹងចុះស្រាវជ្រាវបន្ថែមទៀត ដើម្បីដោះស្រាយបំភ្លឺចម្ងល់នេះ ជូនមហាជនឲ្យបានជ្រាបកាន់តែច្បាស់។
បើតាមលោកវីល្លាមបានដកស្រង់សំដីលោក ជាវ តាយ អភិបាលខេត្តកំពត មកបញ្ជាក់ថា ចំពោះករណីបោះបង្គោលចូលសមុទ្រនៅភូមិបឹងតាព្រាម សង្កាត់ត្រេីយកោះ ក្រុងកំពត ខេត្តកំពត ជាដីមានកម្ម សិទ្ធិស្របច្បាប់របស់ពលរដ្ឋ ។
លោកអភិបាលខេត្តកំពតបានលើកឡើងថា យេីងខ្ញុំនឹងប្រេីសមត្ថកិច្ចតាមដានការអនុវត្តច្បាប់ចុះពិនិត្យចំពោះបញ្ហានេះបន្ថែមដេីម្បីឲ្យពលរដ្ឋអស់ចម្ងល់ ក្រោយទទួលបានការបំភ្លឺនេះជាមូលដ្ឋានស្រាវជ្រាវ ។
អភិបាលខេត្តកំពត លោក ជាវ តាយ បានប្រកាសថា ដីក្នុងសមុទ្រ នៅភូមិបឹងតាព្រាម សង្កាត់ត្រើយកោះ ក្រុងកំពត នៅខាងកើតភ្នំដូង ក្នុងសមុទ្រខេត្តកំពត ដែលគេបោះបង្គោលក្នុងទឹក ដើម្បីកំណត់ព្រំដីនោះ គឺជាដី និងទឹក ដែលមានបណ្ណកម្មសិទ្ធិស្របច្បាប់ តាំងពីឆ្នាំ២០០៨ មកម្លេ៉ះ។ ដីសមុទ្រនោះ ជាប្រភេទអ៊ូបង្គារបស់ប្រជាពលរដ្ឋ១២គ្រួសារ ដោយនៅពេលថ្មីៗនេះ ត្រូវបានគេបោះបង្គោលក្នុងទឹកសមុទ្រ ដើម្បីកំណត់ព្រំដែន ក៏ត្រូវបានគេថតបង្ហោះតាមហ្វេសប៊ុក ក្នុងរយៈពេលប៉ុន្មានថ្ងៃនេះ។
នៅក្នុងសន្និសីទកាសែត នៅសាលាខេត្តកំពត កាលពីថ្ងៃទី២៧ ខែឧសភា ឆ្នាំ២០១៩ លោក ជាវ តាយ អភិបាលខេត្តកំពត បានប្រកាសថា ផ្អែកតាមរបាយការណ៍របស់រដ្ឋបាលក្រុងកំពត និងមន្ត្រីជំនាញ ដែលបានចុះសិក្សាស្រាវជ្រាវ ជាមួយគ្រប់ផ្នែកពាក់ព័ន្ធ បង្ហាញថា ដីសមុទ្រទំហំ៤៥,៦១៤ហិកតា ស្ថិតនៅភូមិបឹងតាព្រាម សង្កាត់ត្រើយកោះ ក្រុងកំពត ជាកម្មសិទ្ធិរបស់ប្រជាពលរដ្ឋ ១២គ្រួសារ ដែលជាអ៊ូបង្គា។ នៅឆ្នាំ២០០៨ ប្រជាពលរដ្ឋទាំងនោះ បានដាក់សំណើ តាមរយៈអាជ្ញាធរសង្កាត់ ក្រុង និងខេត្ត ចូលទៅទីស្តីការគណៈរដ្ឋមន្ត្រី ដើម្បីធ្វើបណ្ណកម្មសិទ្ធិស្របច្បាប់។ ដូច្នេះ ប្រជាពលរដ្ឋទាំង១២គ្រួសារ ទទួលបានបណ្ណកម្មសិទ្ធិស្របច្បាប់ លើដីសមុទ្រទាំងនោះ ចាប់ពីតាំងពីឆ្នាំ២០០៨ មក។
ជាមួយនឹងការប្រកាសពីភាពស្របច្បាប់លើដីឆ្នេរសមុទ្រ ជាកម្មសិទ្ធិឯកជននោះ អភិបាលខេត្តកំពត លោក ជាវ តាយ ក៏បានបញ្ជាក់ថា នៅពេលបច្ចុប្បន្ន ម្ចាស់កម្មសិទ្ធិលើដីសមុទ្រទាំងនោះ បានបោះបង្គោលកំណត់ព្រំទឹក និងព្រំដី ដើម្បីឱ្យជំនាញ ចុះទៅកំណត់តាមបណ្ណ មុននឹង ចាប់ផ្តើមអភិវឌ្ឍជាមណ្ឌលទេសចរណ៍ធម្មជាតិ ឬទេសចរណ៍កែច្នៃ៕
