ខេត្ដបន្ទាយមានជ័យ៖ នគរបាលក្រុង ប៉ោយប៉ែសហការជាមួយនគរបាល ប្រឆាំងបទល្មើសសេដ្ឋកិច្ចខេត្ដដឹកនាំ សម្របសម្រួលដោយ លោក ផាន់ ភិរម្យ ព្រះរាជអាជ្ញារងអមសាលាដំបូងខេត្ដ បានចុះទៅបង្ក្រាបទីតាំងបើកសិប្បកម្ម កែច្នៃឈើខុសច្បាប់មួយកន្លែងនៅក្រុង ប៉ោយប៉ែតបន្ទាប់ពីសិប្បកម្មកែច្នៃឈើ នោះបានបើកធ្វើអាជីវកម្មអាស្រ័យផលព្រៃឈើខុសច្បាបយូរឆ្នាំមកហើយគ្មាន ខ្លាចញញើតច្បាប់ ។ សមត្ថកិច្ចចុះ បង្ក្រាបធ្វើឡើងកាលពីរសៀលថ្ងៃទី១៦ ខែធ្នូ ឆ្នាំ២០១៥ នៅចំណុចភូមិសាមគ្គឺ មានជ័យ សង្កាត់ប៉ោយប៉ែត ខេត្ដបន្ទាយ មានជ័យ ។
បើតាមប្រភពព័ត៌មានពីសមត្ថកិច្ចប្រាប់ឱ្យដឹងថា នៅពេលបង្ក្រាបសមត្ថ កិច្ចឆែកឆេររកឃើញនិងដកហូតបាន ឈើប្រណីតប្រភេទធ្នង់ បេង នាងនួន ចំនួន៤៨ដុំ ដែលមានតម្លៃរាប់ម៉ឺន ដុល្លារ ។ ម្ចាស់សិប្បកម្មឈ្មោះ កែវ សុគុណ ភេទប្រុស អាយុ៣៨ឆ្នាំ រស់នៅ ភូមិសង្កាត់ខាងលើ មិនត្រូវបានសមត្ថ កិច្ចនាំខ្លួនមកនោះទេ ដោយរង់ចាំការ កោះហៅចូលខ្លួនបំភ្លឺនៅតុលាការជា ក្រោយពាក់ព័ន្ធនឹងការបើកសិប្បកម្មកែច្នៃឈើគ្មានការអនុញ្ញាតច្បាប់បង្កឱ្យ ប៉ះពាល់បាត់បង់ព្រៃឈើនិងបាត់បង់ ចំណូលរដ្ឋតាមរយៈនៃការធ្វើអាជីវកម្ម អាស្រ័យផលព្រៃឈើនោះ។ឈើដែលដកហូតបាននៅរសៀលថ្ងៃដដែលត្រួវបានសមត្ថកិច្ចដឹកយកមករក្សាទុកនៅស្នង ការដ្ឋាននគរបាលខេត្ដបន្ទាយមានជ័យ ដើម្បីទុកចាត់ការតាមច្បាប់ ។
សូមបញ្ជាក់ថា នៅខេត្ដបន្ទាយមាន ជ័យត្រូវគេមើលឃើញថា នៅមាន សិប្បកម្មខុសច្បាប់ច្រើនកន្លែងទៀត កំពុងធ្វើអាជីវកម្មកែច្នៃឈើ ។ សកម្ម ភាពនោះត្រូវគេនិយាយាថាមន្ដ្រីជំនាញព្រៃឈើមិនដែលឃើញមានវិធានការ បង្ក្រាបនៅឡើយនោះទេ ។ សកម្មភាព នោះត្រូវគេដាក់ការសង្ស័យថាអាច នឹងជាប់ពាក់គ្នាដើម្បីទទួលបានផល ប្រយោជន៍ ៕
ដោយ៖ សំ វិច្ឆិកា
