ភ្នំពេញ៖ ជនសង្ស័យមួយក្រុមមានគ្នា៣នាក់ប្រដាប់ដោយដាវសាមរៃគ្រប់ដៃ បានមកកាប់ប្រហារទៅលើបុរសម្នាក់បណ្ដាលឲ្យរងរបួសធ្ងន់ត្រូវបានរថយន្តដឹកយកទៅសង្គ្រោះភ្លាមៗនៅមន្ទីរពេទ្យ បង្កឲ្យមានការភ្ញាក់ផ្អើលដល់សមត្ថកិច្ចចុះមកដល់កន្លែងកើតហេតុជួយធ្វើអន្តរាគមន៍ផងដែរ។ ហេតុការណ៍នេះបានកើតឡើងកាលពីវេលាម៉ោង២១និង០០នាទីយប់ ថ្ងៃទី១៨ ខែធ្នូ ឆ្នាំ២០១៥ នៅម្ដុំតាន់ប៉ា (ហៅផ្សារតាប៉ាង) ផ្លូវលេខ៤៩ សង្កាត់ផ្សារថ្មី៣ ខណ្ឌដូនពេញ។
ជនរងគ្រោះមានឈ្មោះណាក់ ភេទប្រុស អាយុ៣៧ ស្នាក់នៅម្ដុំផ្សារតូច សង្កាត់ទួលសង្កែ ខណ្ឌឬស្សីកែវ ។
ប្រភពព័ត៌មានពីជនរងគ្រោះឈ្មោះណាក់បានប្រាប់ឲ្យដឹងថា មុនពេលកើតហេតុគាត់បានដើរលេងនៅម្ដុំកើតហេតុខាងលើ និងបានឡើងលើអាគារតាន់ប៉ា ជាន់ទី២ ដែលម្លុកក្មេងទំនើងជក់ថ្នាំ និងល្បីខាងកាប់ចាក់គ្នា។ ប្រភពដដែលបានបន្តថា បន្ទាប់ក្រោយមក ស្រាប់តែមាន ជនសង្ស័យ៣នាក់ប្រដាប់ដោយដាវសាំម៉ូរៃកាន់គ្រប់ដៃ បានមកកាប់ប្រហារទៅលើជនរងគ្រោះ បណ្ដាលឲ្យរបួសគ្រប់កន្លែង ធ្វើឲ្យគាត់ឈឺចុកចាប់ពេញខ្លួនដេកដួលនៅលើដី។
បន្ទាប់ពីធ្វើសកម្មភាពព្រួតគ្នាកាប់ទៅលើជនរងគ្រោះរួចមក ក្រុមពួកជនសង្ស័យដែលបានបង្ករបួសស្នាមនិងបក្សពួកបាននាំគ្នាគេចខ្លួនបាត់អស់គ្មានសល់ រីឯជនរងគ្រោះត្រូវបានរថយន្តសង្គ្រោះរបស់មន្ទីរពេទ្យកាល់ម៉ែត ដឹកយកទៅសង្គ្រោះភ្លាមៗផងដែរផងដែរ៕ដោយៈ ព្រែកជ័យ
