ខេត្តបាត់ដំបង ៖ បុរសវ័យចំណាស់ម្នាក់ បានស្លាប់ភ្លាមៗ នៅនឹងកន្លែងកើតហេតុ ខណៈដែលរូបគាត់បានបើកបរម៉ូតូយ៉ាងលឿននៅពេលយប់ ហើយបានបុកគោយន្តច្នៃមួយគ្រឿងដែលឈប់សំចតនៅលើទ្រូងផ្លូវ ដោយសារតែគោយន្តច្នៃនោះបានបែកកង់។
ករណីគ្រោះថ្នាក់ចរាចរណ៍នេះបានកើតឡើងនៅយប់ថ្ងៃទី១៨ ខែធ្នូ ឆ្នាំ២០១៥ តាមបណ្ដោយផ្លូវជាតិលេខ៥៧ ត្រង់ចំណុចភូមិជាមន្ត្រី ឃុំត្រែង ស្រុករតនៈមណ្ឌល ខេត្តបាត់ដំបង ។
ប្រភពព័ត៌មានបានឲ្យដឹងថា នៅមុនពេលកើតហេតុ គឺមានគោយន្តច្នៃមួយគ្រឿងដែលបានបើកបរក្នុងទិសដៅពីកើតទៅលិច ដោយឈ្មោះ ហេង រិន ភេទប្រុស អាយុ៣៥ឆ្នាំ រស់នៅក្នុងភូមិ/ឃុំកើតហេតុខាងលើ។ លុះមកដល់ចំណុចកើតហេតុ ស្រាប់តែកង់គោយន្តខាងមុខមួយគ្រាប់បានបែក ដែលធ្វើឲ្យអ្នកបើកបរត្រូវឈប់សំចតនៅលើទ្រូងផ្លូវដើម្បីដោះដូរកង់។ ខណៈដែលគេកំពុងចតនោះ ក៏ស្រាប់តែមានម៉ូតូមួយគ្រឿងបានបើកបរមកពីក្រោយយ៉ាងលឿនក្នុងទិសដៅស្របគ្នា ដោយគ្មានការបង្អង់ល្បឿនឡើយ គឺគេបានបុកទៅលើទ្រុងគោយន្តនោះពីក្រោយបណ្ដាលឲ្យអ្នកបើកបរបោកក្បាលទៅនឹងតួគោយន្តច្នៃស្លាប់ភ្លាមៗមួយរំពេច។
ប្រភពព័ត៌មានពីសមត្ថកិច្ចបានឲ្យដឹងថា ជនរងគ្រោះឈ្មោះ រិន រ៉ន ហៅ តឹក ផុន ភេទប្រុស អាយុ៦២ឆ្នាំ រស់នៅភូមិភ្ញាវ ឃុំត្រែង ស្រុករតនៈមណ្ឌល។ បច្ចុប្បន្នសពត្រូវបានប្រគល់ទៅឲ្យក្រុមគ្រួសារដើម្បីយកទៅធ្វើបុណ្យតាមប្រពៃណីហើយ។ ដោយឡែកមធ្យោបាយធ្វើដំណើរទាំងពីរគ្រឿង ក៏ត្រូវបាននាំយកទៅរក្សាទុកនៅអធិការដ្ឋាននគរបាលស្រុករតនមណ្ឌល ដើម្បីធ្វើការដោះស្រាយជាក្រោយ៕ សហការី
