តួឯកល្ខោនបាសាក់ម្នាក់ត្រូវចោរលួចម៉ូតូបាត់ខណះកំពុងបាត់មុខរៀបសម្តែង

ចែករំលែក៖

ភ្នំពេញ ៖ បុរសជាតួឯកល្ខោនបាសាក់ម្នាក់ពេលកំពុងតែផាត់មុខ លាបម្សៅ ដើម្បីរៀបចំឡើងសម្តែង ស្រាប់តែមានជនសង្ស័យលួចម៉ូតូមួយគ្រឿងយកទៅបាត់ បង្កឲ្យមានការភ្ញាក់ផ្អើលកាលពីវេលម៉ោង៨យប់ថ្ងៃទី១៨ ខែកក្កដា ឆ្នាំ២០១៩ នៅម្តុំឆាកល្ខោនមួយកន្លែងស្ថិតក្នុងភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ ។

ជនរងគ្រោះជាម្ចាស់ម៉ូតូខាងលើឈ្មោះ ជីម សុធារី ភេទប្រុស អាយុ២០ឆ្នាំ ជាសិល្បករល្ខោនបាសាក់ មានស្រុកកំណើតនៅ ភូមិស្វាយអាត់លើ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ។ ចំណែកម៉ូតូមួយគ្រឿងដែលត្រូវជនសង្ស័យលួចយកទៅបាត់នោះម៉ាកហុងដាឌ្រីម ស៊េរី២០១៥ ពណ៌ខ្មៅ ពាក់ស្លាកលេខភ្នំពេញ 1CZ-8857 ។

តាមប្រភពព័ត៌មានពីជនរងគ្រោះជាម្ចាស់ម៉ូតូបាននិយាយថា នៅមុនពេលកើតហេតុ ពួកគាត់បានសម្តែង ល្ខោនបាសាក់នៅភូមិឃុំកើតហេតុខាងលើអស់រយៈពេលមួយសប្តាហ៍មកហើយ ដែលការសម្តែងល្ខោនបាសាក់នេះមិនមែនមានកម្មវិធីបុណ្យអ្វីនោះទេ គឺសម្តែងដើម្បីរៃអង្គាសថវិកា និងប្រាក់ឧបត្ថម្ភយកទៅផ្គត់ផ្គង់ដល់ក្រុមល្ខោនដែលខ្វះខាត ។ ចំណែករឿងដែលត្រូវសម្តែងនៅយប់កើតហេតុខាងលើ គឺមានចំណងជើងថា «រឿងសូរិយាអស្ដង្គត» ហើយជនរងគ្រោះសម្តែងជាតួឯកទៀតផង ។

តាមប្រភពដដែលបានបន្តថា នៅមុនពេលកើតហេតុ ជនរងគ្រោះបានទុកម៉ូតូនៅមុខឆាកល្ខោន ហើយកំពុងតែផាត់មុខ លាបម្សៅ ដើម្បីសម្តែងជូនបងប្អូនប្រិយមិត្តទស្សនា លុះផាត់មុខ លាបម្សៅរួចហើយ បំរុងនឹងឡើងសម្តែង ក៏ស្រាប់តែមិនឃើញម៉ូតូរបស់ខ្លួនដែលទុកនៅមុខឆាកល្ខោន ក៏បង្កឱ្យមានការផ្អើលឆោឡោ និងផ្អាកការសម្តែងភ្លាមៗតែម្តង ដោយជនរងគ្រោះដើររកម៉ូតូទាំងគ្រងសម្លៀកបំពាក់ជាតួឯកល្ខោនបាសាក់ផងដែរ។

បន្ទាប់ពីដើររកម៉ូតូគ្រប់ទីកន្លែងអស់ហើយ តែមិនឃើញ ទើបជនរងគ្រោះរត់ទៅប្តឹងទាំងគ្រងសម្លៀកបំពាក់ជាតួល្ខោនបាសាក់ ដើម្បីអោយសមត្ថកិច្ចជួយអន្តរាគមន៍ស្រាវជ្រាវ ៕សុខាសែនជ័យ