ភ្នំពេញ៖ បើនិយាយអំពីភូមិសាស្ដ្រ ខណ្ឌឫស្សីកែវដែលពីមុនមានផ្ទៃដីលាតសន្ធឹងធំល្វឹងល្វើយបច្ចុប្បន្នខណ្ឌមួយ នេះត្រូវបានបំបែកចេញជា២ខណ្ឌបន្ថែមទៀតគឺខណ្ឌសែនសុខនិងខណ្ឌ ជ្រោយចង្វា ដើម្បីងាយស្រួលក្នុងការគ្រប់គ្រងផ្នែក រដ្ឋបាល ។ ប៉ុន្ដែខណ្ឌឫស្សីកែវជាតំបន់ ដ៏ស្មុគស្មាញមួយហើយមួយផ្នែកនៃដី ដែលមិនទាន់មានលំនៅឋាន គឺស្ថិត នៅក្នុងជម្លោះអូសបន្លាយអស់រយៈពេលរាប់សិបឆ្នាំនៅតែមិនទាន់ចប់ទៀត ដោយកន្លែងខ្លះត្រូវបានធ្វើការដោះស្រាយ ដោយអាជ្ញាធរដោះស្រាយវិវាទដីធ្លី ហើយកន្លែងខ្លះនៅតែបន្ដរកដំណោះ ស្រាយ ។
ជាមួយគ្នានោះជនខិលខូចមួយចំនួន បានឆ្លៀតឱកាសដែលអាជ្ញាធរឬក៏ជំនាញកំពុងជាប់រវល់ពួកគេបានលួចបោះ បង្គោលកាប់ឆ្ការធ្វើជាសំណង់សង់អំពី ឈើឬដែកចាប់យកដី ដែលស្ថិតនៅ ក្នុងជម្លោះធ្វើឱ្យអាជ្ញាធរគ្រប់លំដាប់ ថ្នាក់មានការឈឺក្បាលវិលមុខនៅលើក រណីនេះ ។
កាលពីព្រឹកថ្ងៃទី២៣ ខែធ្នូ ឆ្នាំ២០១៥ កម្លាំងរបស់អាជ្ញាធរខណ្ឌឫស្សីកែវក៏ ដូចជាជំនាញបានចុះធ្វើការហាមឃាត់ សំណង់ដែលធ្វើអំពីដែកស្ថិតនៅលើដី ទំនាស់ក្នុងក្រុមទី៧ ភូមិទួលគោក សង្កាត់ ទួលសង្កែ ខណ្ឌឫស្សីកែវ ដោយឱ្យ រុះរើចេញជាបន្ទាន់ ។ ប៉ុន្ដែសំណង់ថ្មីៗ ជាច្រើនទៀតមានខ្លះទំហំតូចខ្លះ ទំហំធំ សង់ជាប់ៗគ្នាដែលឋិតនៅលើដីតំបន់ អភិវឌ្ឍន៍នេះនៅតែមានច្រើនដដែល បើទោះបីអាជ្ញាធរ និងមន្ដ្រីជំនាញខិតខំ ព្យាយាមហាមឃាត់និងទប់ស្កាត់យ៉ាងណាក៏ជនមួយចំនួនឆ្លៀតឱកាសលួច សាងសង់រហូតបានជាស្ថាពរនិងខ្លះទៀតអាជ្ញាធរដឹងចុះធ្វើការហាមឃាត់ ។
សំណង់ដែលអាជ្ញាធរហាមឃាត់ នៅព្រឹកថ្ងៃទី២៣ ខែធ្នូ ឆ្នាំ២០១៥ មាន ម្ចាស់ឈ្មោះម៉ម ណាង ហើយក៏ឱ្យរុះរើ យកសម្ភារនោះចេញដោយរក្សាទុកនូវ ភាពដើម ។
បើតាមប្រភពព័ត៌មានបានឱ្យដឹងថា មូលហេតុដែលឈានដល់ការសាងសង់ លំនៅឋានយ៉ាងស្អេកស្កះជាប់ៗគ្នាបែបដូចជាសំណង់អនាធិបតេយ្យខាងលើនេះ គឺមានមេខ្យល់នៅពីក្រោយបំផុសឱ្យបងប្អូនប្រជាពលរដ្ឋនាំគ្នាមកចាប់យកដី មិនខុសពីពាក្យស្លោកមួយឃ្លាដែលគេ ធ្លាប់តែឮកន្លងមកថា “ចាញ់បាន លុយឈ្នះបានដី” ។ ប៉ុន្ដែជនទាំងនោះមិន គិតពីការអភិវឌ្ឍអ្វីនោះទេគឺធ្វើយ៉ាងណាឱ្យតែបានផលប្រយោជន៍ដល់បុគ្គលខ្លួន ឯងប៉ុណ្ណោះ ។
ជុំវិញពាក់ព័ន្ធរឿងរ៉ាវខាងលើនេះ អាជ្ញាធរបានបញ្ជាក់ថា តំបន់ដែលមាន ជម្លោះនោះគឺឋិតនៅក្នុងដៃអាជ្ញាធរជាតិ ដោះស្រាយវិវាទដីធ្លីកំពុងតែពន្លឿននិង ដោះស្រាយឱ្យបានចប់សព្វគ្រប់ ៕
ដោយ៖ អារុណរះ
