ភ្នំពេញ៖ កីឡាករ សេក គឹមរួន មកពីក្លិបអង្គរមានជ័យខេត្តសៀមរាប ត្រូវជួបប្រកួតជាមួយកីឡាករថៃ ឈ្មោះ ពេជ្រ ផាណុំ( Pich Phanom) រីឯកីឡាករ ឌុម កែវដា មកពីក្លិបមកុដរាជរាសីហ៍ ត្រូវប៉ះជាមួយកីឡាករ ជើងចាស់ ឆាយ មាស មកពីក្លិប សំរោងកោងកីឡាខេត្តបាត់ដំបង នារសៀលថ្ងៃទី២៦ខែធ្នូ ឆ្នាំ២០១៥ នៅសង្វៀនប្រដា ល់ទូរទស្សន៍ ប៉ុស្តិ៍លេខ៥ ។
ចំពោះសប្តាហ៍ទី២នេះ គឺជាការប្រកួតវគ្គសន្សំពិន្ទុក្នុងពូល A ដែលមានសមាសភាពកីឡាករទាំង៤នាក់ខាង លើ ប៉ុន្តែកីឡាករ២នាក់ក្នុងចំណោម៤នាក់មាន៣ពិន្ទុនៅក្នុងដៃហើយបន្ទាប់ពីពួកគេបានប្រកួតឈ្នះដៃគូ កាលពី សប្តាហ៍ទី១ ក្នុងកម្មវិធីកំពូលអ្នកប្រដាល់ពានរង្វាន់ជើងឯកអធិរាជស៊ីម៉ងត៍អូដ្ឋទម្ងន់៦៣,៥គីឡូក្រាមវគ្គ២។
ដោយឡែកជំនួបប្រកួតរវាងកីឡាករ សេក គឹមរួន នឹង កីឡាករ ពេជ្រ ផាណុំ( Pich Phanom) នៅមិនទាន់ ប្រាកដថា គឹមរួនអាចបន្តយក៣ពិន្ទពី ផាណុំ បានឬក៏អត់នោះទេ ប៉ុន្តែកាលពីថ្ងៃទី១២ខែធ្នូ កន្លងទៅ អ្នកប្រដាល់ថៃរូបនេះ ត្រូវបានកីឡាករ ឌុម កែវដា វាយឲ្យបោះបង់ការប្រកួត ត្រឹមទឹកទី២ ។ ចំណែកឯ កីឡាករសេក គឹមរួន វាយឈ្នះកីឡាករជើងចាស់ ឆាយ មាសដោយពិន្ទុ ។
តាមរយៈបទពិសោធន៍មួយប្រកួតកន្លងទៅរបស់កីឡាករទាំង២នាក់ គឺ សេក គឹមរួន និងពេជ្រ ផាណុំគឺ មានលក្ខណៈខុសគ្នាតែបន្តិចបន្តួចប៉ុណ្ណោះ។ កីឡាករ សេក គឹមរួនមានថ្វីដៃល្អ មិនអន់ជាង កីឡាករ ឌុម កែវដា ដែលវាយឲ្យអ្នកប្រដាល់ថៃ ពេជ្រ ផាណុំ បោះបង់ការប្រកួត កាលពីថ្ងៃ បើក កម្មវិធីកំពូលអ្នកប្រដាល់ពានរង្វាន់ជើងឯកអធិរាជស៊ីម៉ងត៍អូដ្ឋនោះឡើយ។ ដូច្នេះយើងចាំមើល ថាតើការប្រកួត រវាងកីឡាករកម្ពុជា សេក គឹមរួន នឹងកីឡាករថៃពេជ្រ ផាណុំ នរណា អាចទទួលបាន៣ពិន្ទុសម្រាប់ សប្តាហ៍ទី២វគ្គវាយសន្សំពិន្ទុខាងលើនេះ?
ចំពោះការប្រកួតរវាងកីឡាករ ឆាយ មាសនឹងកីឡាករ ឌុម កែវដាវិញ ត្រូវបានទស្សនិកជន ផ្តលការទុកចិត្ត ទៅលើកីឡាករ វ័យក្មេង ឌុម កែវដាច្រើនជាង កីឡាករ ជើងចាស់ ឆាយ មាស បើទោះបី ឆាយ មាស មានបទពិសោធន៍ច្រើនជាងក៏ដោយ ពីព្រោះមួយរយៈចុងក្រោយនេះ កីឡាករឆាយ មាស ពុំសូវមានវត្ត មាននៅលើសង្វៀនច្រើននោះទេ ទាំងនេះគឺជាមូលហេតុនាំឲ្យ ឆាយ មាស ស្រុតកម្លាំងច្រើន រហូតវាយចាញ់កីឡាករវ័យក្មេង សេក គឹមរួនដោយពិន្ទុ។
កីឡាករ ឌុម កែវដា ឡើងកូដជាបន្តបន្ទាប់ តាមរយៈស្នៀតប្រដាល់ដ៏សំបូរបែប ជាពិសេសនៅថ្ងៃបើកការប្រកួត កម្មវិធីកំពូលអ្នកប្រដាល់ពានរង្វាន់ជើងឯកអធិរាជស៊ីម៉ងត៍អូដ្ឋ កីឡាកររូបនេះ បាន វាយឲ្យអ្នក ប្រដាល់ថៃឈ្មោះ ពេជ្រ ផាណុំសុំចុះចាញ់យ៉ាងឆាប់រហ័ស គឺចំណាយពេលត្រឹមតែ ២ទឹកប៉ុណ្ណោះអាចយក៣ពិន្ទុពី ពេជ្រ ផាណុំ បានទៅហើយ។ ដូច្នេះ ការប្រកួតនេះ មានតែរង់ចាំអ៊ុតលទ្ធផលទាំងអស់គ្នាទេទើបដឹងច្បាស់ថា តើរវាង កីឡាករឆាយ មាស នឹងឌុម កែវដា នរណា រកបាន៣ពិន្ទុសម្រាប់សប្តាហ៍ទី២នេះ? ៕
ដោយ៖ សារីម
