ភ្នំពេញ៖ ពលរដ្ឋក្រីក្រចំនួន ៣គ្រួសារនៅភូមិក្រាំងអង្រ្កង សង្កាត់ក្រាំងធ្នង់ទទួលអំណោយពីអនុសាខាកាកបាទក្រហមកម្ពុជាខណ្ឌសែនសុខ នៅរសៀលថ្ងៃទី២៥ ខែធ្នូ ឆ្នាំ២០១៥នេះ លោកថេង សុថុល ប្រធានគណៈកម្មការអនុសាខាកាកបាទក្រហមកម្ពុជាខណ្ឌ និងជាអភិបាលរងខណ្ឌសែនសុខ អញ្ជេីញសំណេះសំណាលសួរសុខទុក្ខ និងនាំយកអំណោយជាគ្រឿង ឧបភោគបរិភោគ និងសម្ភារៈមួយចំនួនរបស់សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាទៅជូនប្រជាពលរដ្ឋក្រីក្រចំនួន៣គ្រួសារ នៅសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។

ជាពិសេសលោក ថេង សុថុល អភិបាលរងខណ្ឌសែនសុខបានបានពាំនាំនូវការសាកសួរសុខទុក្ខគ្រួសារទីទល់ក្រទាំងអស់ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ថ្វីត្បិតលោកមិនបានអញ្ជើញមកផ្ទាល់ក៏ពិតមែនតែលោកតែងតែបានគិតគូរដល់សុខ និងទុក្ខពលរដ្ឋគ្រប់ទីកន្លែងទាំងអស់ហើយបេសកម្មរបស់កាកបាទក្រហមកម្ពុជាបានដើរតួជាសំខាន់ សម្រាប់ជួយដល់ ប្រជាពលរដ្ឋគ្រប់រូបមិនប្រកាន់ជាតិសាសន៍ ពណ៌សម្បុរ និងមិនបម្រើអោយគណបក្សនយោបាយណាមួយឡើយ ។

អំណោយដែលទទួលបានក្នុងមួយគ្រួសារមាន អង្ករ ៥០គីឡូក្រាម  ទឹកក្រូច១កេស ទឹកសុទ្ធ១កេស ត្រីខ១០កំប៉ុង ទឹកដោះគោ០៦កំប៉ុង ស្ករស៣គីឡូក្រាម កំសៀវ១ ឆ្នាំង១ ចង្ក្រានហ្គាស១ ខ្ទះឆា១ កញ្រែងជ័រ១ បំពង់ទឹកក្ដៅ១ ចានដែកធំ១ ជ្រុញ១ ផ្តិល១ ស្លាបព្រា១គួ និងមុង ភួយ កន្តេល១ ។

ជាមួយគ្នានេះដែរ គណៈកម្មាធិការអនុសាខាកាកបាទក្រហមកម្ពុជាខណ្ឌបានឧបត្ថម្ភថវិកា ដោយក្នុងមួយគ្រួសារទទួលបានចំនួន ៥ម៉ឺនរៀល ក្នុុងនោះលោក ទូច ខាន់ដា អនុប្រធានភូមិបាលខណ្ឌសែនសុខក៏បានឧបត្ថម្ភថវិការបស់លោកក្នុងមួយគ្រួសារចំនួន៥មុឺនរៀលផងដែរ សរុបក្នុងមួយគ្រួសារទទួលបានថវិការ១០មុឺនរៀល ៕

ដោយ៖ តុង សីហា