ភ្នំពេញ ៖ ក្រសួងធនធានទឹក និងខតុនិយមនៅថ្ងៃពុធទី២១សីហានេះបានចេញសេចក្តីជូនដំណឹង ស្តីពីស្ថានភាពទឹកជំនន់ទន្លេមេគង្គ ដោយបញ្ជាក់ថា កាលពីវេលាម៉ោង០៧ ព្រឹក នាថ្ងៃទី ២០ ខែសីហា ឆ្នាំ២០១៩កន្លង មកនេះ មានប្រព័ន្ធសម្ពាធទាប(ITCZ) មួយ បានកើតឡើង និងកំពុងអូសកាត់លើអាង ទន្លេមេគង្គ ចាប់ពីប្រទេសវៀតណាមដល់
ប្រទេសមីយ៉ាន់ម៉ា ។
សេចក្តីជូនដំណឹងបន្តថា ប្រព័ន្ធសម្ពាធទាបនេះ ក៏មានឥទ្ធិពលផងដែរទៅលើ ប្រទេសឡាវ ថៃ និងប្រទេសកម្ពុជា ពិសេសតំបន់ខ្ពង់រាបភាគឦសាន តំបន់ផ្ទៃរងទឹក ភ្លៀងនៃទន្លេសេកុងសេសាននិងទន្លេស្រែពក ដោយបង្កឲ្យមានភ្លៀងធ្លាក់ជាប់ៗគ្នាក្នុងកម្រិតពីមធ្យម ទៅខ្លាំង ចាប់ពីថ្ងៃទី ២១ ខែសីហា ឆ្នាំ ២០១៩ នេះតទៅ ។
ការបញ្ជាក់បែបនេះ បន្ទាប់ពីក្រមអ្នកព្យាករ ក្រសួងធនធានទឹកបានធ្វើការពិនិត្យ និងតាមដានលើស្ថានភាពអាកាសធាតុជាប្រចាំរួចមក ។
សេចក្តីជូនដំណឹងរបស់ក្រសួងធនធានទឹកនិងឧតុនិយមបានបញ្ជាក់ទៀតថា ការធ្លាក់ភ្លៀងខាងលើ នឹងធ្វើឲ្យទឹកទន្លេមេគង្គកើនឡើងជាបន្តបន្ទាប់ ក្នុងនោះមាន ៖
• ស្ថានីយជលសាស្រ្តស្ទឹងត្រែង ទឹកអាចឡើងដល់កម្ពស់ ៨,៥០ ម៉ែត្រ នៅទាបជាង
កម្រិតកម្ពស់ត្រវប្រុងប្រយ័ត្ន (កម្ពស់ប្រុងប្រយ័ត្ន ១០,៧០ ម៉ែត្រ) ។
– ស្ថានីយជលសាស្ត្រក្រចេះ ទឹកអាចឡើងដល់កម្ពស់ ១៨,៥០ ម៉ែត្រ នៅទាបជាងកម្រិត
កម្ពស់ប្រុងប្រយ័ត្ន (កម្ពស់ប្រុងប្រយ័ត្ន ២ ២
,០០ ម៉ែត្រ) ។
• ស្ថានីយជលសាស្ត្រកំពង់ចាម ទឹកអាចឡើងដល់កម្ពស់ ១០,០០ ម៉ែត្រ នៅទាបជាង
កម្រិតកម្ពស់ប្រុងប្រយ័ត្ន (កម្ពស់ប្រុងប្រយ័ត្ន ១៥,២០ ម៉ែត្រ) ។ រីឯនៅទន្លេមេគង្គក្រោម ទន្លេសាប និងទន្លេបាសាក់ ទឹកបន្តឡើងជាបន្តបន្ទាប់ ។
ជារួមស្ថានភាពទឹកទន្លេឡើងក្នុងពេលនេះ អាចចាត់ចូលជាការហក់ឡើងអតិបរមាលើក
ទី ១ ។ ជាទូទៅ ទឹកទន្លេមេគង្គ តែងតែហក់ឡើង ២ ដង ក្នុងមួយឆ្នាំៗ ដែលហៅថា អតិបរមាលើកទី១ និងអតិបរមាលើកទី២ ។
ក្នុងសេចក្តីជូនដំណឹងបានស្នេីសូមដល់ក្រសួង-ស្ថាប័ន អាជ្ញាធរដែនដីពាក់ព័ន្ធ ពិសេសបងប្អូនប្រជាកសិករ ដែលប្រកបរបរកសិកម្មនៅអមសងខាងទន្លេទាំងអស់
រួសរាន់ក្នុងការប្រមូលកសិផល និងសូមបង្កើនការយកចិត្តទុកដាក់ប្រុងប្រយ័ត្ន ដើម្បីចៀសវាងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ៕
ដោយ ៖សុខខេមរា
