ភ្នំពេញ៖ បុរសម្នាក់បានស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យ ខណៈដែលពួកគេទាំង២នាក់កំពុងអង្គុយផឹកស៊ី ស្រាប់តែមានបុរសម្នាក់បើករថយន្តក្នុងបំណងបត់ចូលផ្ទះ តែបែរជាច្រឡំជាន់ហ្គាហោះបុករះពេញទំហឹងបណ្តាលអោយបុរសម្នាក់ស្លាប់និងម្នាក់ទៀតត្រូវរងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះភ្លាមៗនៅមន្ទីពេទ្យ ។
ហេតុការណ៍នេះបានកើតឡើងកាលពីវេលាម៉ោង៩នឹង៣០នាទីយប់ ថ្ងៃទី២៧ ខែធ្នូ ឆ្នាំ២០១៥ តាមបណ្តោយផ្លូវលេខ៩៣ ស្ថិតក្នុងភូមិសាមគ្គី សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះមានឈ្មោះ ហុង ថន អាយុជាង30ឆ្នាំ មុខរបរជាអ្នកថតរូបនៅវត្តភ្នំ ស្នាក់នៅផ្ទះជួលម្តុំកន្លែងកើតហេតុ មានស្រុកកំណើតឃុំអង្គសុភី ស្រុកកំពង់ត្រាច ខេត្តកំពត ។
បើតាមប្រភពពត៌មានពីកន្លែងកើតហេតុបានឱ្យដឹងថា មុនពេលកើតហេតុគឺមានបុរស២នាក់បាននាំគ្នាអង្គុយផឹកស៊ីលើតុមួយនៅកន្លែងកើតហេតុ លុះមកដល់វេលាម៉ោងកើតហេតុមានបុរសម្នាក់បានបើរថយន្តមួយគ្រឿងម៉ាកcamary ឆ្លាម ពណ៍ទឹកប្រាក់ ពាក់ស្លាកលេខ ភ្នំពេញ 2AH-5306 បើកមកតាមបណ្តោយផ្លូវលេខ៩៣ ទិសដៅពីជើងទៅត្បូង ហើយបានបត់បំណងចូលផ្ទះ តែដោយជាន់ហ្គាច្រឡំបានហោះបុករះបុរសដែលកំពុងអ្គុយផឹកទាំង២នាក់ពេញទំហឹង បណ្តាលឱ្យស្លាប់ម្នាក់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗផងដែរ ហើយរថយន្តបង្កបានជ្រុលទៅបុកពីក្រោយនិង រថយន្តសាំយុង ពាក់ស្លាកលេខ ភ្នំពេញ AA-4208 រងការខូចខាតបន្ថែមទៀត រីឯម្ចាស់រថយន្តបានគេចខ្លួនបាត់ស្រមោលបន្ទាប់ពីកើតហេតុរួចមក ។
ក្រោយកើតហេតុសមត្ថកិច្ចមូលដ្ឋានបានចុះមកអន្តរាគមន៍នៅកន្លែងកើតហេតុ និងបានសហការជាមួយជំនាញយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំសោះស្រាយនាពេលក្រោយ ចំណែកសពបុរសរងគ្រោះសមត្ថកិច្ចទំនាក់ទំនងទៅក្រុមគ្រួសារសាច់ញាតិ ឱ្យមកទទួលយកទៅធ្វើបុណ្យឯស្រុកកំណើតតាមប្រពៃណី ៕
ដោយ៖ ព្រែកជ័យ
