ភ្នំពេញ៖ ការនាំផលិតផលហាឡាល់ឥស្លាម (ម្ហូបអាហាឥស្លាម) ទៅកាន់ទីផ្សារពិភពលោក និងបណ្តាប្រទេសអូអាយស៊ី(Organization of Islamic Cooperation) និងបានលើកកម្ពស់ពង្រីក កំណើនសេដ្ឋកិច្ច នៃបណ្ដាប្រទេសជាមាជិកអាស៊ាន ពិសេស ប្រទេសដែលកំពុងអភិវឌ្ឍន៏ នេះបើតាមការបញ្ជាក់ឲ្យដឹងពី លោកអូស្មាន ហាស្សាន់ រដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ តំណាងប្រតិភូកម្ពុជាទៅចូលរួមសន្និសីទអន្ដរជាតិ ហាឡាល់លើកទី២ នៅទីក្រុងបាងកក ប្រទេសថៃ កាលពីថ្ងៃទី២៨ ខែធ្នូ ឆ្នាំ២០១៥ ដោយមានសមាជិកជាភ្ញៀវអន្ដរជាតិ ចំនួន៤០ប្រទេស ចូលរួម និងបណ្ដាក្រុមហ៊ុន សហគ្រាស ដែលធ្វើការវិនិយោគលើវិស័យទំនិញហាឡាល់ ផ្នែកសំម្ភារ ប្រើប្រាស់ ម្ហូបអាហាឥស្លាម ។
លោក អូស្មាន ហាស្សាន់ បានបញ្ជាក់ថា៖ ប្រទេសកម្ពុជា ពិតជាមានមោទកភាពណាស់ ប្រសិន បើការវិនិយោគឲ្យបានកាន់តែច្រើន នូវហាឡាល់ឥស្លាម ទៅកាន់ប្រទេសកម្ពុជានោះ ព្រោះបច្ចុប្បន្ន នៅតាមបណ្ដាសហគមន៏ឥស្លាម តំបន់ជនបទ ទីប្រជុំជន និងនៅតាមបណ្ដាខេត្ដ ក្រុង នៃព្រះរាជាណាចក្រកម្ពុជា កំពុងត្រូវការចំបាច់សម្រាប់យក មកប្រើប្រាស់ប្រចាំថ្ងៃ ដោយសារតម្រូវការ របស់បងប្អូនប្រជាពលរដ្ឋមានការកើនឡើង និងមានការបើកទូលាយនូវសិទ្ធិសេរីភាពសុខដុមរមនីយកម្ម នៃសាសនា ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា។
ក្នុងឱកាសនោះលោកអូស្មាន ហាស្សាន់ ក៏បានថ្លែងនូវអំណរគុណ ដល់ថ្នាក់ដឹកនាំប្រទេសថៃ ដែលបានរៀបចំឲ្យមានសន្និសីទ អន្តរជាតិហាឡាល់ឥស្លាមលើកទី២នេះឡើង ដើម្បីឲ្យគណៈប្រតិភូ នៃព្រះរាជាណាចក្រកម្ពុជា បានសិក្សាស្វែងយល់បន្ថែម ពីសារៈសំខាន់ នៃទំនិញហាឡាល់ ដែលពិតជាបានចូលរួមចំណែកយ៉ាងសំខាន់ ក្នុងការលើកកម្ពស់វិស័យទេសចរណ៍ នៃបណ្ដាប្រទេសដែលបាននាំចេញនូវផលិតផលហាឡាល់ ច្រើនជាងគេទៅធ្វើការផ្គត់ផ្គង់ទីផ្សារនៅមជ្ឈឹមបូព៌ា និងពិភពលោក ជាពិសេសគឺលើក កម្ពស់សេដ្ឋកិច្ចអាស៊ាន ។
លោកបន្ដថា ថ្នាក់ដឹកនាំនៃស្ថាប័នហាឡាល់ប្រទេសថៃបាន និងកំពុងសហការ និងផ្តល់នូវជំនួយជា បច្ចេកទេសដល់គណៈដឹកនាំជាន់ខ្ពស់នៃសាសនាឥស្លាមកម្ពុជា ក្នុងការជំរុញឲ្យមានស្ថាប័នផ្តល់វិញ្ញាបនប័ត្រ ហាឡាល់ ជាផ្លូវការនៅកម្ពុជា ហើយបានសន្យាថា នឹងសហការជាមួយកម្ពុជា ក្នុងការរៀបចំការតាំងពិព័រណ៌ ផលិតផលហាឡាល់អន្តរជាតិ នៅប្រទេសកម្ពុជាផងដែរ។ រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានឯកភាពលើ គោលការណ៍បង្កើតស្ថាប័នហាឡាល់នេះ ដោយមានកិច្ចសហការរវាងក្រសួងពាណិជ្ជកម្ម គណៈ ដឹកនាំ ជាន់ខ្ពស់ នៃសាសនាឥស្លាមកម្ពុជា និងបណ្តាក្រសួងពាក់ព័ន្ធមួយចំនួន ហើយលោកសង្ឃឹមថាកម្ពុជានឹងបង្កើតស្ថាប័ន ហាឡាល់ក្នុងពេលឆាប់ៗខាងមុខនេះ ប្រកបដោយគុណភាព ប្រសិទ្ធភាព និងទំនុកចិត្តខ្ពស់ ។
ក្នុងឱកាសនោះ លោកឧត្តមសេនីយ៍ តាណាសាក់ ប៉ាទីម៉ាប្រាកន ឧបនាយករដ្ឋមន្ត្រី តំណាងលោកឧត្តមសេនីយ៍ ប្រាយុទ្ធ ចាន់អ៊ូចា នាយករដ្ឋមន្ត្រីថៃ បានបញ្ជាក់ថា៖សន្និសីទអន្តរជាតិហាឡាល់លើកទី២ ដែលបាន និងកំពុងប្រព្រឹត្តទៅ នៅទីក្រុងបាងកង ប្រទេសថៃ ដែលបានរៀបចំដោយមជ្ឈមណ្ឌល វិទ្យាសាស្ត្រហាឡាល់ នៃសាកលវិទ្យាល័យចុឡាឡុងកន សហការជាមួយក្រុមប្រឹក្សាកណ្តាលឥស្លាមប្រទេសថៃ និងដោយមានអ្នកចូលរួមជាជាភ្ញៀវអន្តរជាតិមកពី៤០ប្រទេស និងក្រុមហ៊ុន សហគ្រាសធ្វើការលើវិស័យទំនិញហាឡាល់ ថ្នាក់ដឹកនាំឥស្លាមថៃ សិស្សនិស្សិតបញ្ញវន្ត និងភ្ញៀវកិត្តិយស ដទៃទៀត ចំនួន៥០០០នាក់។ បន្ទាប់ធ្វើសន្និសីទនេះបញ្ចប់ទៅ យើងក៏មានរៀមចំតាំងពិព័រណ៏ផលិតផលហាឡាល់ជួន ដល់សាធារណជនរយៈពេល៣ថ្ងៃផងដែរ ។
លោកឧត្តមសេនីយ៍ តាណាសាក់ ប៉ាទីម៉ាប្រាកន បាន គាំទ្រ និងកោតសរសើរដល់ភាពជោគជ័យរបស់ក្រុមប្រឹក្សាឥស្លាមថ្នាក់កណ្តាលប្រទសថៃ មជ្ឈមណ្ឌលវិទ្យាសាស្ត្រហាឡាល់ នៃសាកលវិទ្យាល័យជុឡាលុងកនប្រទេសថៃ និងវិទ្យាស្ថានស្តង់ដារហាឡាល់ប្រទេសថៃ ក្នុងការធ្វើឲ្យប្រទេសថៃក្លាយជាប្រទេសមួយ ក្នុងចំណោមប្រទេសឈានមុខ ក្នុងការផលិតទំនិញហាឡាល់ ដែលពិតជាបានជួយដល់កំណើនសេដ្ឋកិច្ច របស់ប្រទេសថៃ តាមរយៈការនាំផលិតផល ម្ហូបអាហារហាឡាល់ ទៅកាន់ពិភពលោក ពិសេសទីកាន់ប្រទេសសមាជិកអូអាយស៊ី (Organization of Islamic Cooperation) និងកំណើននៃការនាំចូលភ្ញៀវទេសចរ មកកាន់ប្រទេសថៃ។ លោកបន្ដថា៖ មកដល់ពេលនេះ ប្រទេសថៃជាប្រទេស ដែលបាននាំផលិតផល និងម្ហូបអាហារហាឡាល់ ទៅកាន់ប្រទេស សមាជិក អូអាយស៊ី ក្នុងលំដាប់លេខរៀងទី១២ ហើយនៅក្នុងពេលអនាគតដ៏ឆាប់ ប្រទេសថៃ នឹងទទួលបានលំដាប់ លេខរៀងទី១ និងក្លាយជាមណ្ឌលផលិតអាហារ សម្រាប់ពិភពលោក ។ តាមរយៈសន្និសីទអន្ដរជាតិ និងការដាក់តាំងផលិតផលហាឡាល់នៅពេលនេះ ពិតជាបានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលថៃ ក្នុងការជំរុញ និងសហការជាមួយបណ្តាប្រទេសជាច្រើន ទាំងវិស័យឯកជន និងរដ្ឋ លើទំនិញហាឡាល់ ជាពិសេសទំនាក់ទំនងល្អរវាងរដ្ឋាភិបាលថៃ និងបណ្តាប្រទេសអ៊ីស្លាម ។
លោកបណ្ឌិត វីណៃ ឌះឡាន នាយកស្ថាបនិកនៃមជ្ឈមណ្ឌលវិទ្យាសាស្ត្រ ហាឡាល់ បានបញ្ជាក់ថា ទំនិញហាឡាល់ រួមមានម្ហូបអាហារ សម្ភារប្រើប្រាស់ ដែលធានា ដល់សុខភាព និងសុខុមាលភាពរបស់អ្នក ទទួលទាន និងអ្នកប្រើប្រាស់ទូទៅ ពិសេស ដើម្បីធានាដល់គុណភាព និងប្រសិទ្ធភាពនៃការប្រកួតប្រជែងក្នុង សហគមន៍សេដ្ឋកិច្ចអាស៊ាននាពេលខាងមុខ ។
លោកបន្ដថា៖សម្រាប់ឆ្នាំកន្លងទៅទីផ្សារនាំចេញអាហារហាឡាល់ ពិភពលោកមានចំនួន ដល់ទៅ១២ លានលាន ដុល្លារសហរដ្ឋអាមេរិក ស្មើនិង (1.2 Trillion USD) ហើយ សម្រាប់ប្រទេសថៃ មកដល់ពេលនេះ បានផលិតផលិតហាឡាល់ចំនួនប្រមាណ៨០,០០០មុខ សម្រាប់ប្រើប្រាស់ នៅក្នុងប្រទេស និងនាំចេញទៅ ក្រៅប្រទេស ពិសេសទៅកាន់តំបន់មជ្ឈឹមបូព៌ានិងអ៊ឺរ៉ុប ។ រីឯនៅក្នុងប្រទេសថៃ មានភោជនីយដ្ឋាន ហាឡាល់ចំនួន ប្រមាណ ៣៥០០កន្លែង សម្រាប់បម្រើដល់ជនមុស្លិមនៅក្នុង ប្រទេស និងមកពីប្រទេសអូអាយស៊ី។
លោកបន្តថា៖ សន្និសីទអន្តរជាតិហាឡាល់នេះ គឺជាការៀបចំលើកទី២ ដែលមានការតាំងពិព័រណ៌ពីផលិត ហាឡាល់ដោយមានការចូលរួមពីផលិតផលចំនួន ២៥០ស្តង់ មកពី ៣៥ ប្រទេស រួមនឹងកិច្ច ប្រជុំពិភាក្សា ជាច្រើនជុំវិញប្រធានបទ «ពាណិជ្ជកម្ម វប្បធម៌ និងការច្នៃប្រឌិត សម្រាប់សេដ្ឋកិច្ចហាឡាល់» ៕
ដោយ៖ សំរិត
