ភ្នំពេញ៖ ដើម្បីផ្សាភ្ជាប់ទំនាក់ទំនងអោយកាន់តែជិតស្និទ្ធថែមទៀតរវាងប្រជាពលរដ្ឋជាមួយអាជ្ញាធរ សមត្ថកិច្ច និងស្វែងយល់ពីតម្រូវការ ពីទុក្ខកង្វល់ រួមទាំងទទួលយក សំណូមពររបស់ប្រជាពលរដ្ឋដើម្បីធ្វើការដោះស្រាយទៅតាមលទ្ធភាព នៅព្រឹកថ្ងៃទី៦ ខែកញ្ញា ឆ្នាំ២០១៩ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ បានអញ្ជើញ ក្នុងវេទិការ សាធារណៈ ជាមួយប្រជាពលរដ្ឋ នៅភូមិចំពុះក្អែក១ សង្កាត់ព្រែកថ្មី ខណ្ឌច្បារអំពៅ ។ ក្នុងវេទិការនេះលោកអភិបាលខណ្ឌ បានស្តាប់និងស្រាយបំភ្លឺ ដោះស្រាយ ពីសំណេីរ សំនួរ សំណូមពរ កង្វល់នានា របស់បងប្អូនប្រជាពលរដ្ឋ ហើយក៏បានធ្វើការផ្សព្វផ្សាយពីការបំរើសេវាតាមយន្តការការិយាល័យច្រកចេញចូលតែមួយរបស់រដ្ឋបាលខណ្ឌ សេវាវិស័យពន្ធដារ(ពន្ធអចលនទ្រព្យ) និងការចុះបញ្ជីដីជាលក្ខណៈប្រព័ន្ធ ក្នុងឱកាសនោះផងដែរ ។ បន្ថែមលើនេះទៀត ដើម្បីអនុវត្តគោលនយោបាយ “ ភូមិ-សង្កាត់ មានសុវត្ថិភាព “ អោយមានប្រសិទ្ធភាព លោកអភិបាលខណ្ឌបាន អំពាវនាវដល់ប្រជាពលរដ្ឋទាំងអស់ បន្តសហការជាមួយអាជ្ញាធរសង្កាត់-ខណ្ឌ និង នគរបាលប៉ុស្តិ៍រដ្ឋបាល តាមរយៈការចូលរួមរាយការណ៍ជាបន្ទាន់ នៅពេលមានហេតុការបទល្មើសកើតឡើងចំពោះគ្រួសារយើង និង អ្នកជិតខាងយើង ដើម្បីសមត្ថកិច្ចបង្ក្រាបអោយបានទាន់ពេល។ ការដាក់កំលាំងត្រួតពិនិត្យអាវុធជាតិផ្ទុះ នៅតាមច្រកល្ហក និងតាមដងផ្លូវសំខាន់នានា ជាប្រចាំ ក៍ជាប្រការមួយសំខាន់បំផុត ក្នុងការទប់ស្កាត់នូវរាល់ការប៉ុនប៉ង ប្រព្រឹត្តបទល្មើសពី សំណាក់ជនអាក្រក់មួយចំនួន ៕
ដោយ៖ សណ្តោស
