ភ្នំពេញ៖ បន្ទាប់ពីការផលិតអស់រយៈពេល១ឆ្នាំ«ល្បុក្កតោចម្លែក» ដែលជាខ្សែភាពយន្តប្រមូលផ្តុំសម្តែងដោយតារាចម្រៀងតារាកំប្លែង តារាសម្តែង និងកីឡាករក្បាច់គុនជាច្រើននាក់នោះបានប្រកាសសម្ពោធដាក់ឲ្យបញ្ចាំងហើយកាលពីថ្ងៃទី២៩ ខែធ្នូ ឆ្នាំ២០១៥ ជាមួយនឹងក្តីរំពឹងខ្ពស់ ។
ផលិតកររឿងនេះលើកឡើងថា អាចនឹងទទួលបានប្រាក់ចំណូលខ្ពស់ ព្រោះតែលោកជឿជាក់លើគុណភាព និងភាពប្លែងភ្នែកពីខ្សែភាពយន្តខ្មែរផ្សេងៗ ។
ខ្សែភាពយន្តបែបបុរាណវាយតប់ និងកំប្លែងនេះត្រូវបានអ្នកគ្រប់គ្រងផលិតកម្មZ Entertainment បញ្ជាក់ថា ចំណាយច្រើនជាង១៣ម៉ឺនដុល្លារក្នុងការផលិតជាមួយគុណភាពខ្ពស់ ដែលនឹងរំពឹងដែរថា នឹងអាចវាយលុកទីផ្សារនៅក្នុងស្រុក។
«ល្បុកតោចម្លែក»មានការចូលរួមសម្តែងពីសំណាក់កីឡាករប្រដាល់ក្បាច់គុនបុរាណខ្មែរប្រមាណជាង១០នាក់ ដែលជាអ្នកប្រដាល់ខ្មែរល្បីៗ ចូលរួមសម្ដែងក្នុងខ្សែភាពយន្តនេះមានដូចជា លោកវ៉ន វីវ៉ា, លោកសេន ប៊ុនថេន, កីឡាករអូត ភូថង, កីឡាករពេជ្រ សុផាន់, លោកម៉ឺន សុភា និងកីឡាករ ធន់ សុភា រួមទាំងតារាសម្ដែងក្បាច់គុន សុខ សុវណ្ណ ដែន សេង សុខ ចាន់ ជាដើម ។
ក្រៅពីនេះក៏មានការចូលរួមសម្តែងពីសំណាក់តារាចម្រៀងកែវវាសនាកញ្ញា ម៉ារី លីន កញ្ញាឌុច លីដា និងតារាកំប្លែងជាច្រើនទៀតនៅកម្ពុជាផងដែរ។ ខ្សែភាពយន្តនេះនឹងត្រូវចាក់បញ្ចាំងសម្រាប់អ្នកទស្សនានៅគ្រប់រោងភាពយន្តទំនើបនៅភ្នពេញ និងខេត្តសៀមរាបចាប់ពីថ្ងៃទី០១ ខែមករា ឆ្នាំ២០១៦ តទៅ ។
ចាងហ្វាងផលិតកម្មZ Entertainment លោកលៀង ខេងហេង និយាយថា “ល្បុក្កតោចម្លែក” គឺជាខ្សែភាពយន្តបុរាណខ្មែរបានសម្រិតសម្រាំងឡើងយ៉ាងពិសេសដើម្បីឆ្លើយតបទៅនឹងទីផ្សារភាពយន្តកម្ពុជាបច្ចុប្បន្ន។ អ្វីដែលជាចំណុចសំខាន់ ខ្សែភាពយន្តខាងលើចូលរួមសម្ដែងដោយអ្នកប្រដាល់ល្បីៗ តារាចម្រៀងតារាសម្តែងរបស់ខ្មែរ ។
លោកធានាថា រឿងនេះពិតជាប្លែកខុសពីរឿងដទៃ ព្រោះផលិតកម្មបានសម្រិតសម្រាំងខ្លាំងទាំងប្លង់ថត និងការវាយតប់ក្បាច់ល្បុក្កតោខ្មែរពិតៗតែម្ដង ហើយផលិតកម្មបានចំណាយទុនខ្ពស់ក្នុងទិញឧបករណ៍ផលិតរួមទាំងបច្ចេកទេសទំនើបៗ ដើម្បីប្រាកដថាខ្សែភាពយន្តមួយនេះដាក់បញ្ចាំងនៅលើរោងភាពយន្តទទួលបានការគាំទ្រច្រើន ។
លោកបន្តថា ក្រៅតែពីបង្ហាញឈុតឆាកនៃការវាយតប់ច្រើនខ្សែភាពយន្តដំបូងរបស់លោកក៏មានឈុតឆាកកំប្លែងជាច្រើនទៀតចូលរួមផងដែរដើម្បីបង្កបរិយាកាសសាច់រឿងទាំងមូលទាក់ទាញការចាប់អារម្មណ៍។ផលិតករសញ្ជាតិអាមេរិកធ្លាប់ទទួលជោគជ័យក្នុងខ្សែភាពយន្តជាច្រើនកាលនៅផលិតឱ្យផលិតកម្មRGB បញ្ជាក់ដែរថាខ្សែភាពយន្តនេះមានប្លង់ថតភាគច្រើននៅតំបន់ភ្នំបាសិត ។
ការបោះទុកផលិតខ្សែភាពយន្តនេះត្រូវបានលោកបញ្ជាក់ថា ដោយសារទីផ្សារភាពយន្តនៅកម្ពុជាបច្ចុប្បន្នកំពុងតែមានការរីកចម្រើនហើយអ្វីដែលោកផ្តោតសំខាន់នោះគឺភាពប្លែកភ្នែកនៃគំនិតច្នៃប្រឌិតថ្មី និងគុណភាពខ្សែភាពយន្តសម្រាប់អ្នកទស្សនា។ លោកបន្តថាគុណភាពខ្សែភាពយន្តនេះនឹងធ្វើឲ្យអ្នកទស្សនាដែលទន្ទឹងរង់ចាំជាយូរមកហើយនោះមិនខកបំណង ហើយលោកជឿជាក់ថា នឹងទទួលបានប្រាក់ចំណេញពីការចាក់បញ្ចាំងខ្សែភាពយន្តនេះ។ បន្ទាប់ពីខ្សែភាពយន្តនេះផលិតកម្មលោកក៏ទើបនឹងបញ្ចាំងការថតខ្សែភាពយន្តថ្មីមួយទៀតគឺរឿង អមតៈ ដែលកំពុងកាត់តហើយនឹងចាក់បញ្ចាំងក្នុងអំឡុងខែមេសា ឆ្នាំ២០១៤ខាងមុខនេះផងដែរ ។
តារាចម្រៀងកែវ វាសនា ដែលជាតួឯកប្រុសក្នុងខ្សែភាពយន្តនេះ បានបញ្ជាក់ថា លោកពិតជាមានអារម្មណ៍ប្លែកដែលទទួលបានការសម្តែងខ្សែភាពយន្ត ល្បុកតោចម្លែកនេះ ។ លោកថា ជារឿងដែលល្អមួយសម្រាប់អ្នកទស្សនាព្រោះតែទាំងសាច់រឿងប្លង់ថតតារាសម្តែងសុទ្ធតែល្អហើយពួកគាត់ប្រឹងប្រែងសម្តែងនិងផលិតដើម្បីប្រាកដថាខ្សែភាពយន្តនេះនឹងធ្វើឲ្យអ្នកទស្សនាសប្បាយរីករាយក្នុងការទស្សនា ។ លោករំពឹងដែរថាខ្សែភាពយន្តនេះនឹងទទួលបានការគាំទ្រជាច្រើនពីទស្សនិកជន ៕
ដោយ៖ វឌ្ឍនា
