ភ្នំពេញ៖ បុរសម្នាក់ត្រូវសមត្ថកិច្ចនគរបាលប៉ុស្ដិ៍ចោមចៅឃាត់ខ្លួន បន្ទាប់ពីរូបគេបានជិះម៉ូតូរោទិ៍តាមផ្លូវសាធារណៈ ហើយត្រូវសមត្ថកិច្ចឃាត់សួរនាំ តែបែរជាអាងបងប្រុសជាមន្រ្តីយោធាជេរសមត្ថកិច្ច រួចមូរជើងខោរកវាយសមត្ថកិច្ច និងប្រជាពលរដ្ឋដែលចោមរោមមើល ។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៨ និង៤០នាទីយប់ថ្ងៃទី២៩ ខែធ្នូ ឆ្នាំ២០១៥ តាមបណ្តោយផ្លូវបេតុង ក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
បុរសដែលស្រវឹងស្រាជេរប្រមាថសមត្ថកិច្ចនោះ ឈ្មោះហុង សៀងហ៊ួ អាយុ៣២ឆ្នាំ មុខរបរអ្នកលក់សាច់ឆ្កែរស់នៅភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
តាមប្រភពពីសមត្ថកិច្ចឲ្យដឹងថា មុនពេលកើតហេតុនៅចំណុចខាងលើនោះ មានករណីគ្រោះថ្នាក់ចរាចរណ៍ ម៉ូតូនិងម៉ូតូបុកគ្នារងរបួសធ្ងន់និងស្រាល បានទៅព្យាបាលរបួសអស់ហើយ នៅសល់តែម៉ូតូនៅកន្លែងកើតហេតុ ដែលមានសមត្ថកិច្ចនៅឈររង់ចាំជំនាញមកវាស់វែងរួចលើកយកទៅរក្សាទុក។ ពេលនោះមានជនបង្កម្នាក់ជិះម៉ូតូធំ ពណ៌ផ្ទៃមេឃ ពាក់ស្លាកលេខខេមរភូមិន្ទ 02.1.1689 ដែលអ្នកបើកបរស្ថិតក្នុងស្ថានភាពស្រវឹង។ ខណៈពេលជិះមកដល់មុខសមត្ថកិច្ចស្រាប់តែ រោទិ៍សំឡេងខ្លាំងៗទើបសមត្ថកិច្ចឃាត់សួរនាំ ស្រាប់តែជនបង្កបានប្រាប់ថា ចាំមួយភ្លែតរួចទូរស័ព្ទហៅបងប្រុសរបស់ខ្លួន ដែលជាមន្រ្តីយោធាមក។ គ្រាន់តែឃើញបងប្រុសខ្លួនមកដល់ ស្រាប់តែជនបង្កចាប់ផ្តើមជេរប្រមាថសមត្ថកិច្ចរួចមូរជើងខោរកវាយសមត្ថកិច្ច និងប្រជាពលរដ្ឋដែលឈរមើលនោះទៀតផង ធ្វើឲ្យប្រជាពលរដ្ឋដែលធ្លាប់ស្គាល់ជនបង្កបានអះអាងថា បុរសជាអ្នកលក់សាច់ឆ្កែរូបនោះអាងបងប្រុសធ្វើយោធា យកស្លាកលេខម៉ូតូខេមរភូមិន្ទមកពាក់នឹងម៉ូតូរបស់ខ្លួន ហើយតែងតែ បង្ករឿងអុកឡុកនៅក្នុងភូមិជាញឹកញាប់ ធ្វើឲ្យពួកគាត់មានការមិនពេញចិត្ត ក៏បានដាក់ពាក្យបណ្តឹងជនបង្កខាងលើ ។
បន្ទាប់ពីមានពាក្យបណ្តឹង សមត្ថកិច្ចបានឃាត់ខ្លួនបុរសជនបង្ក យកទៅសាកសួរដើម្បីបន្តចំណាត់ការតាមច្បាប់ ៕
ដោយ៖ វិបុល
