ខេត្តកំពង់ធំ៖ ល្បែងស៊ីសងបៀរ អាប៉ោង និងកន្ទុយលេខ កំពុងតែបើកលេងយ៉ាងគគ្រឹកគគ្រេងដូចផ្សារត្រី បង្កឲ្យមានការព្រួយបារម្ភ យ៉ាងខ្លាំងពីសំណាក់ប្រជាពលរដ្ឋថា ស្ថានភាពនេះអាចនឹងជាមូលហេតុ ដែលនាំឱ្យមានការទាស់ទែងគ្រួសារ និងចោរលួចចោរប្លន់។
ប្រជាពលរដ្ឋក្នុងមូលដ្ឋានបានឲ្យដឹងថា សកម្មភាពលក់កន្ទុយលេខ ត្រូវបានចែម៉ៅ ដើរលក់តាមហាងគុយទាវ ហាងកាហ្វេ និងភោជនីយដ្ឋាន ក្នុងបរិវេណភូមិខោស នៃផ្សារទំរីងយ៉ាងរំភើយ ទោះជាសមត្ថកិច្ចនៅអង្គុយចំពីមុខក្តី ក៏មេឆ្នោតដ៏ល្បីនេះ តែហាក់ដូចជាពុំមានការភ្ញាក់ផ្អើល ឬមានប្រតិកម្មបន្តិចឡើយពីសមត្ថកិច្ចមូលដ្ឋាន មិនតែប៉ុណ្ណោះមេឆ្នោតបានបើកលក់ដូចទំនិញ។ សកម្មភាពនេះ បានធ្វើឲ្យមហាជន មានការសង្ស័យថា ប្រហែលជាត្រូវរ៉ូវគ្នាអស់ហើយ បានជាអាចលក់បានដោយរលូន និងពុំមានការខ្លាចញញើតពីច្បាប់ឡើយ ខណៈពេលដែលប្រមុខរាជរដ្ឋាភិបាល កំពុងតែពង្រឹង និងរឹតបន្តឹងមិន ឲ្យមានល្បែងស៊ីសងគ្រប់ប្រភេទនៅតាមមូលដ្ឋាន។
ប្រភពបានឲ្យដឹងទៀតថា មេឆ្នោតដ៏ល្បីចំនួន៣នាក់កំពុងតែយក ឃុំទំរីងធ្វើជាទីតាំងចាក់កន្ទុយលេខ គឺទី១. ចែម៉ៅ, ទី២. ចាន់ ធឿន និងទី៣. តានំប៉ាវ ដែលបុគ្គលទាំង៣នាក់នេះជាអ្នកលក់កន្ទុយ លេខដ៏សកម្មតែពុំត្រូវបានបង្ក្រាបនោះឡើយ។
ករណីនេះ ប្រជាពលរដ្ឋជាច្រើនបានសំណូមពរដល់ស្នងការដ្ឋាននគរបាលខេត្តកំពង់ធំ និងគណៈបញ្ជាការឯកភាពស្រុក ក៏ដូចជាអធិការដ្ឋាននគរបាលស្រុកសណ្ដាន់ ឲ្យជួយទប់ស្កាត់នូវល្បែងស៊ីសង ដែលកំពុងតែពង្វក់ស្មារតីប្រជាពលរដ្ឋ នៅក្នុងភូមិសាស្ដ្រឃុំទំរីង ស្រុកសណ្ដាន់ នេះផង៕
ដោយ៖ ប៊ុន រិទ្ធី
