ខេត្តក្រចេះ៖ ក្រោយពីស្គាល់ និងស្រលាញ់គ្នាតាមទួរស័ព្ទ ក្មេងស្រីអាយុ១៤ឆ្នាំម្នាក់ រស់នៅក្រុងភ្នំពេញ និងជាសិស្សសាលាត្រូវបានជនសង្ស័យម្នាក់ល្បួងនាងឱ្យមកខេត្តក្រចេះ និងបាននាំគ្នាទៅរស់នៅដោយខុសច្បាប់នៅស្រុកកែវសីមា ខេត្តមណ្ឌលគិរី តែត្រូវបាននគរបាលខេត្តក្រចេះ សហការណ៍ជាមួយនគរបាលខេត្តមណ្ឌលគិរិ ស្រាវជ្រាវនិងចាប់ឃាត់ខ្លួន ក្រោយពីបានទទួលពាក្យបណ្តឹង។
ក្រោយពីមានការចាប់ឃាត់ខ្លួនក្មេងស្រីរងគ្រោះត្រូវបាននគរបាលប្រគល់ទៅឲ្យក្រុមគ្រួសារចំណែកជនសង្ស័យ ត្រូវបាននគរបាលខេត្តក្រចេះកសាងសំណុំរឿងបញ្ជូនទៅសាលាដំបូងខេត្តក្រចេះនៅព្រឹកថ្ងៃទី៣០ខែធ្នូនេះ។
ជនសង្ស័យដែលរងការចោទប្រកាន់ម្នាក់នេះឈ្មោះឃឹម តុលា អាយុ២១ឆ្នាំ រស់នៅក្នុងសង្កាត់អូរឬស្សី ក្រុងក្រចេះ ហើយត្រូវបាននគរបាលខេត្តក្រចេះ សហការជាមួយនគរបាលខេត្តមណ្ឌលគិរីចាប់ឃាត់ខ្លួនបានកាលពីថ្ងៃទី២៨ ខែធ្នូ ខណៈដែលជននេះបាននាំក្មេងស្រីរងគ្រោះអាយុ១៤ឆ្នាំមានទីមានទីលំនៅក្រុងភ្នំពេញ និងបានស្រឡាញ់នាងទាំងមិនទាន់គ្រប់អាយុទៅពួនសម្ងំរស់នៅជាមួយគ្នានៅស្រុកកែវសីមា ខេត្តមណ្ឌលគីរីបានមួយរយៈពេល។
ស្នងការរងកណ្តាលប្រឆាំងបទល្មើសលោកវរៈសេនីយ៍ឯក គង់ វណ្ណារឹទ្ឋ បានឲ្យដឹងថា ក្រោយពីបានទទួលពាក្យបណ្តឹងពីម្តាយក្មេងស្រីរងគ្រោះនិងមានការស្រាវជ្រាវអស់រយៈពេលជាងមួយខែរួចមក ក៏ឈានទៅដល់ការចាប់ឃាត់ខ្លួន ខណៈជននេះបានជម្លៀសខ្លួនក្មេងស្រីរងគ្រោះទៅពួនសម្ងំរស់នៅជាមួយគ្នាក្នុងស្រុកកែវសីមាខេត្តមណ្ឌលគិរី ។
លោកស្នងការងបានបន្តថាជនសង្ស័យ និងក្មេងស្រីរងគ្រោះ បានស្គាល់គ្នាតាមទូរស័ព្ទកាលពីខែវិច្ឆិកា ឆ្នាំ២០១៥ ហើយជននេះបានល្បួងក្មេងស្រីរងគ្រោះអាយុ១៤ឆ្នាំជាសិស្សរស់នៅទីក្រុងភ្នំពេញឲ្យមកខេត្តក្រចេះ។ លោកថា បន្ទាប់ពីមានការបាត់ខ្លួនរបស់ក្មេងស្រីរងគ្រោះរួចមក ម្តាយរបស់នាងបានដាក់ពាក្យបណ្តឹងមកនគរបាលហើយនគរបាលក៏ស្រាវជ្រាវតែម្តង ។
លោកស្នការរងបានបញ្ជាក់ថា ក្រោយពីការស្រាវជ្រាវយ៉ាងយកចិត្តទុកដាក់ឃើញថា ការបាត់ខ្លួនរបស់ក្មេងស្រី គឺបានមកពួនសម្ងំរស់នៅជាមួយជននេះនៅខេត្តក្រចេះ ហើយបន្ទាប់ពីដឹងថា រឿងនេះត្រូវបែកធ្លាយ ជននេះក៏បាននាំក្មេងស្រីរងគ្រោះទៅពួនសម្ងំរស់នៅជាមួយគ្នានៅស្រុកកែវសីមាខេត្តមណ្ឌលគីរី តែក៏ត្រូវបានកម្លាំងនគរបាលតាមស្រាវជ្រាវ និងចាប់ឃាត់ខ្លួនបានតែម្តង ៕
ដោយ៖ កោះទ្រុង
