ភ្នំពេញ៖ មូលនិធិ Yayasan Murni Aqidah Malaysia នៃប្រទេសម៉ាឡេស៊ី បានជួយចូលរួមចែករំលែក ផ្ដល់ នូវចំណេះដឹង ដោយធ្វើការបណ្តុះបណ្តាល និងពង្រឹងសមត្ថភាព ដល់គ្រូបង្រៀនខ្មែរឥស្លាមចំនួន១០០នាក់ បន្ទាប់ពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានសម្រេចដាក់បញ្ចូលគ្រូបង្រៀនខ្មែរឥស្លាម ទៅក្នុងក្របខណ្ឌ ក្រសួងអប់រំ យុវជន និងកីឡា ចំនួន១៥០០នាក់ កាលពីខែមិថុនា២០១៥នោះមក។
ក្នុងឱកាសបិទវគ្គបណ្ដុះបណ្ដាលចំណេះដឹងដល់គ្រូបង្គោលខ្មែរឥស្លាមចំនួន១០០នាក់ កាលពីព្រឹកថ្ងៃទី៣១ ខែធ្នូ ឆ្នំា២០១៥នេះ លោក អូស្មាន ហាស្សាន់ រដ្ឋមន្រ្តីអមនាយករដ្ឋមន្រ្តី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ក៏បានចូលរួមផ្ដល់វិញ្ញាបនប័ត្រគរុកោសល្យ ស្តង់ដាម៉ាឡេស៊ី ដល់គ្រូបង្គោល ក្នុងឱកាសនេះដែរលោកក៏បានគំាទ្រដល់ភាគីម៉ាឡេស៊ីដល់សហគមន៏ នៅកម្ពុជាផ្នែកមនុស្សធម៌ ផងដែរ ។
លោកអូស្មាន ហាស្សាន់ បានបញ្ជាក់ថា៖ មន្ដ្រីដែលជាគ្រូបង្រៀនខ្មែរឥស្លាមក្នុងចំណោម១៥០០នាក់នូវទូទំាងប្រទេស យើងបានជ្រើសរើសយកគ្រូដែលមានបទពិសោធខ្ពស់ចំនួនតែ១០០នាក់សុទ្ធ តែជាគ្រូមានសមត្ថភាព និងមានបទពិសោធស្រាប់មកធ្វើជាគ្រូបង្គោល គឺភាគច្រើនជាសាស្រ្តាចារ្យ ខ្មែរឥស្លាម ដែលបានបញ្ចប់ការសិក្សាថ្នាក់ឧត្តម មកពីក្រៅប្រទេស និងមួយចំនួនតូចក្នុងប្រទេសផងដែរ ។
លោកបន្ដថា៖ ការផ្ដល់វគ្គបណ្ដុះបណ្ដាល ចំណេះដឹងដល់គ្រូវខ្មែរឥស្លាមចំនួន១០០នាក់នេះ ក៏មានការជួយឧបត្ថម្ភ គំាទ្រពី ក្រុមប្រឹក្សាឥស្លាមរដ្ឋស្លាងរប្រទេសម៉ាឡេស៊ី ជាស្ថាប័នរដ្ឋម៉ាឡេស៊ី ក្រោមការគ្រប់គ្រង ដោយផ្ទាល់ដោយ ព្រះចៅ នៃរដ្ឋស្លាងរ ទទួលបន្ទុកកិច្ចការសាសនាឥស្លាម និងការប្រមូលទ្រព្យបរិច្ចាករបស់សាសនិកឥស្លាម ។ ចាប់តាំងពីឆ្នាំ២០១០ ស្ថាប័ននេះបានធ្វើការសហការជាមួយ គណៈដឹកនាំជាន់ខ្ពស់ នៃសាសនាឥស្លាមកម្ពុជា និង អង្គការមូលនិធិអភិវឌ្ឍន៍មុស្លិមកម្ពុជា ជួយកសាងសមិទ្ឋិផលនានាជាច្រើន ដែលសរុបថវិកា អស់ប្រមាណ ១,១២០,០០០ ដុល្លារអាមេរិក រួចមកហើយដែរ ។
លោក Dato Aidit Bin Haji Ghazali ប្រធានមូលនិធិ Yayasan Murni Aqidah Malaysia ប្រទេសម៉ាឡេស៊ី បានបញ្ជាក់ថា៖ ក្នុងនាមប្រធានមូលនិធិ ដើម្បីជួយដល់អ្នកទន់ខ្សោយ អ្នកដែលគេកំពុងត្រូវការនោះ យើងត្រូវ ខិតខំបន្ដរកជំនួយពីប្រភពផ្សេងៗ ដើម្បីយកមកជួយ ដល់អ្នក ដែលគេពេញចិត្ដនិងទទួលយក ជំនួយរបស់យើង ជាក់ស្ដែងថ្ងៃនេះយើងកំពុងជួយ ផ្ដល់នូវចំណេះដឹង ដោយធ្វើការបណ្ដុះបណ្ដាល ដល់គ្រូបង្គោលចំនួន ១០០នាក់ ដោយចំណាយថវិកាទំាងស្រុងពីមូលនិធិ Yayasan Murni Aqidah Malaysia ប្រទេសម៉ាឡេស៊ី ដើម្បីឲ្យគ្រូទំាងនេះ មានសមត្ថភាពគ្រប់គ្រាន់ ក្នុងការដឹកនំា និងមានបច្ចេកទេស តិចនិច្ចក្នុងការបង្រៀន ដល់កូនសិស្សនៅមូលដ្ឋាន ព្រោះថា សង្គមកម្ពុជា បច្ចុប្បន្នកំពុង អភិវឌ្ឍន៏ពង្រឹងសមត្ថភាព ឆ្ពោះទៅកាន់សហគមន៏អាស៊ាន ៕
ដោយ៖ សំរិត
