ខេត្តបាត់ដំបង៖ មីនតោនបន្សល់ទុកពីសម័យសង្គ្រាមបានផ្តាច់ជីវិតប្រជាពលរដ្ឋខ្មែរម្នាក់ និងរងរបួសទៀតហើយនៅខេត្តបាត់ដំបង។ បុរសម្នាក់បើកត្រាក់ទ័រភ្ជួរដីចំការបានបើកទៅជាន់មីនតោនកប់ក្នុងដីបណ្តាលឱ្យផ្ទុះផ្លោងខ្ទាតទាំងត្រាក់ទ័រ និងអ្នកបើកបរជាង១៥ម៉ែត្របណ្តាលឱ្យអ្នកបើកស្លាប់មួយរំពេច នៅកន្លែងកើតហេតុ ហើយអំបែងមីនជះត្រូវបុរសម្នាក់ទៀត ដែលកំពុងរើសដំឡូងក្នុងចំការនោះបណ្តាលឱ្យរងបួសស្រាល ចំណែកត្រាក់ទ័រភ្ជួរដីវិញរងការខូចខាតទាំងស្រុង។
ហេតុការណ៍កើតឡើង កាលពីវេលាម៉ោង៩និង១០នាទីព្រឹកថ្ងៃទី១ ខែមករា ឆ្នាំ២០១៦ នៅចំណុច ដីចំការមួយកន្លែងស្ថិតក្នុងភូមិអូរចំណិប ឃុំតាស្តា ស្រុកសំពៅលូន ខេត្តបាត់ដំបង ។ នៅចម្ងាយជាង២គីឡូម៉ែត្រពីកន្លែងផ្ទុះមីនចាស់កាលពីអំឡុងខែវិច្ឆិកា ឆ្នាំ២០១៥បណ្តាលឱ្យបុរសអ្នកបើកត្រាក់ទ័រងរបួសធ្ងន់កន្លងទៅនេះ ។ បុរសរងគ្រោះបាត់បង់ជីវិតមានឈ្មោះសៅ វិត អាយុ២៩ឆ្នាំ ចំណែកអ្នករងបួសឈ្មោះ ស៊ុន សែន អាយុ២៧ឆ្នាំ អ្នកទាំង២នាក់ បច្ចុប្បន្នរស់នៅភូមិឃុំកើតហេតុខាងលើ។
បើតាមប្រភពព័ត៌មានពីលោកអនុសេនីយ៍ត្រី ហេង វុណ្ឌី នាយប៉ុស្ថិ៍នគរបាលរដ្ឋបាល ស្តីទីឃុំតាស្តាប្រាប់ឱ្យដឹងថា ជនរងគ្រោះបើកត្រាក់ទ័រភ្ជួរដីចំការឱ្យអ៊ុំប្រុសដែលជាសមាជិកក្រុមប្រឹក្សា ឃុំតាស្តា ឈ្មោះយោគ សំអុល អាយុប្រហែល៥៨ឆ្នាំ រស់នៅភូមិតាស្តា ឃុំតាស្តា ស្រុកសំពៅលូន ដីដែលភ្ជួររងការផ្ទុះមីនគឺម្ចាស់ទើបតែដកដំឡូងមីរួចហើយ ហើយជនរងគ្រោះភ្ជួរដីបម្រុងដាំដំឡូងមីបន្តទៀត ។ មុនពេលកើតហេតុជនរងគ្រោះបានបើកត្រាក់ភ្ជួរដីជិតរួចរាល់ទៅហើយក៏ស្រាប់តែកង់ក្រោយត្រាក់ទ័រផ្នែកខាងស្តាំទៅជាន់មីនតោនកប់ដីបន្សល់ទុកតាំងពីសម័យសង្គ្រាម ក៏បណ្តាលឱ្យផ្ទុះលាន់កក្រើកធ្វើឱ្យមានការភ្ញាក់ផ្អើលដល់ប្រជាពលរដ្ឋរស់នៅក្នុងតំបន់នោះ និងសមត្ថកិច្ចបាននាំគ្នាចុះទៅមើលនិងត្រួតពិនិត្យកន្លែងកើតហេតុ ហើយក៏ដឹកជនរងគ្រោះទាំង២នាក់ទៅមន្ទីរពេទ្យ ក៏ប៉ុន្តែដល់មន្ទីរពេទ្យគ្រូពេទ្យប្រាប់ថាជនរងគ្រោះអ្នកបើកត្រាក់ទ័រស្លាប់បាត់ទៅហើយ។
លោកនាយប៉ុស្ថិ៍បានបន្តឱ្យដឹងទៀតថា ដីចំការខាងលើត្រូវបានម្ចាស់ដាំដំណាំអាស្រ័យផលជាង១០ឆ្នាំទៅហើយ កាលពីជាង១០ឆ្នាំមុនកូនប្រុសបង្កើតម្ចាស់ចំការម្នាក់ក៏បានស្លាប់បើកគោយន្តដឹកពោធជាន់មីនតោនដូចគ្នាផងដែរ ។ ទីតាំងដីចំការនោះជាតំបន់សមរភូមិក្តៅ ហើយនៅក្បែរអតីតបន្ទាយកងទ័ពខ្មែរក្រហម។មីនតោនដែលផ្ទុះនោះត្រូវបានគេសន្និដ្ឋានថាទំនងជាមីនតោនត្រូវបានគេកប់ក្នុងដី២គ្រាប់ដើម្បីប្រឆាំងនិងរថក្រោះឥទ្ធិពលខ្លាំងជាងការផ្ទុះមីនតោនកន្លងមកទៅទៀត រណ្តៅមានជម្រៅប្រហែលកន្លះម៉ែត្រចំណែកមាត់ទទឹងរណ្តៅមានប្រវែងជាង១ម៉ែត្រកន្លះ។
សូមរំលឹកថា ក្នុងរយៈពេល២ខែចុងក្រោយនេះនៅខេត្តបាត់ដំបងគេសង្កេតឃើញមានករណីផ្ទុះមីនតោនចំនួន៣លើកមកហើយគិតចាប់ទាំងលើកចុងក្រោយនេះ ។ បណ្តាលឱ្យអ្នកស្លាប់ចំនួន២នាក់និងទទួលរងបួសធ្ងន់៣នាក់ហេតុការណ៍កើតនៅស្រកបវេល១លើក និងនៅស្រុកសំពៅលូន២លើក ៕
ដោយ៖ សំ វិច្ឆិកា
