ភ្នំពេញ ៖ ម៉ូតូមួយគ្រឿងត្រូវអ្នកបើកបរបើកក្នុងល្បឿនលឿនមិនប្រុងប្រយ័ត្នបានជ្រុលចង្កូតទៅបុកស្រ្តីរើសអេតចាយវ័យចំណាស់ម្នាក់កំពុងដើរឆ្លងផ្លូវ ពេញទំហឹង បណ្តាលឲ្យដួលបែកក្បាលសន្លប់ស្តូកស្តឹង ។
ហេតុការណ៍នេះកើតឡើងកាលពីវេលាម៉ោង៧និង៣០នាទីយប់ថ្ងៃទី៣១ ខែធ្នូ២០១៥នៅលើកំណាត់ផ្លូវលេខ២១៧កែង៣១៨ សង្កាត់ផ្សារដើមគ ខណ្ឌទួលគោក មុខអាហារដ្ឋានតាំម៉េងលីមានលក់គុយទាវនិងកាហ្វេ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមានម៉ូតូ១គ្រឿងមិនចាំម៉ាក បានធ្វើដំណើរតាមបណ្តោយផ្លូវលេខ២១៧ក្នុងទិសដៅពីជើងទៅត្បូងក្នុងល្បឿនលឿន ។ លុះមកដល់ចំណុចកើតហេតុម៉ូតូនេះដែលបើកបរមិនប្រយ័ត្ននោះបានរេចង្កូតទៅ បុកស្ត្រីជនរងគ្រោះដែលកំពុង ដើរយួរថង់រើសអេតចាយឆ្លងផ្លូវបណ្តាលឲ្យដួលរងរបួសបែកក្បាលនិងសន្លប់ឈឹងនៅកណ្តាលថ្នល់ រីឯមម៉ូតូបង្កបើករត់គេចបាត់ ។
ពេលឃើញដូច្នេះប្រជាពលរដ្ឋខ្លាចមានរថយន្តឬម៉ូតូមកបុកបន្ថែមទៀត ក៏បាននាំគា្នសែងយកទៅដាក់នៅលើចិញ្ចើមផ្លូវជួយគក់ច្របាច់ និងលាបប្រេងកូឡារហូតដឹងខ្លួនវិញរួច ប្រាប់គេឯងថាគាត់ ស្នាក់នៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ។ ក្រោយពេលកើតហេតុ ស្រ្តីរងគ្រោះអត់មានលុយព្យាបាលនៅមន្ទីរពេទ្យក៏សុំឲ្យរថយន្តសង្គ្រោះដឹកទៅផ្ទះនៅឯភូមិដំណាក់ធំវិញ ៕ ប្រាថ្នា
