ក្រុមផែនដីវិទ្យាអាមេរិក USGS បានប្រកាសថា ការរញ្ជួយដីកម្រិត៦.៧រ៉ិចទ័របានកើតឡើងស្ថិតនៅភាគពាយព្យទីក្រុង Imphal ប្រទេសឥណ្ឌា ដែលស្ថិតនៅជិតព្រំដែនជាមួយប្រទេសមីយ៉ាន់ម៉ាធ្វើឲ្យកក្រើកញាប់ញ័រកាលពីថ្ងៃទី៤ ខែមករា ឆ្នាំ២០១៦ ។
ប្រភពបន្តថា ការរញ្ជួយដីនេះមានជម្រៅ៥៧គីឡូម៉ែត្រ ដែលដំបូងគឺបានកម្រើកញាប់ញ័រនៅក្នុងទឹកដីមីយ៉ាន់ម៉ា ។ ការរញ្ជួយដីនេះបានកើតឡើងនៅវេលាម៉ោង៤និង៣៥នាទីទៀបភ្លឺ ម៉ោងនៅក្នុងតំបន់ ស្ថិតនៅចម្ងាយ៣៣គីឡូម៉ែត្រ ភាពពាយព្យទីក្រុង Imphal រដ្ឋ Manipur ប្រទេសឥណ្ឌា ។
ក្រុម USGS បានអះអាងថា ការរញ្ជួយដីនេះមានសមត្ថភាពធ្វើឲ្យមានបាត់បង់ជីវិតមនុស្ស និងបំផ្លិចបំផ្លាញទ្រព្យសម្បត្តិពលរដ្ឋរងគ្រោះនៅក្នុងតំបន់ ។ ទីភ្នាក់ងារព័ត៌មានឥណ្ឌា ANI បានផ្សព្វផ្សាយថា មនុស្ស២១នាក់បានរងរបួសដោយសារតែការរញ្ជួយដីនៅពេលនេះ ។
ប៉ូលិស និងក្រុមជួយសង្គ្រោះបន្ទាន់ក្នុងតំបន់អះអាងថា ការរញ្ជួយដីនេះបណ្តាលឲ្យលំនៅឋានពលរដ្ឋបាករលើងទាំងគ្រឹះ ។ បុរសម្នាក់បានបាត់បង់ជីវិតដោយសារតែអគារបានបាក់សង្កត់ស្ថិតទីក្រុង Imphal នោះផងដែរ ។
អ្នកស្រុកជាច្រើននាក់បានរត់ចេញពីផ្ទះសម្បែងរបស់ខ្លួន ខណៈដែលចរន្តអគ្គិសនីនៅក្នុងទីក្រុងត្រូវកាត់ផ្តាច់ទាំងស្រុង។ អគារជាច្រើនខ្នងបានបាក់រលំ ក្នុងនោះមានទាំងអគារមន្ទីរពេទ្យផងដែរ បណ្តាលឲ្យមនុស្សច្រើននាក់រងរបួស។ នេះបើតាមការបញ្ជាក់របស់ប៉ូលិស ។ បុគ្គលិកក្រុមជួយសង្គ្រោះម្នាក់ឈ្មោះ Kanarjit Kangujam បានប្រាប់រ៉យទ័រថា វាជាការរញ្ជួយដីទ្រង់ទ្រាយធំបំផុតដែលយើងទើបជួបប្រទះនៅក្នុងទីក្រុង Imphal នេះ ។
ក្រុមផែនដីវិទ្យាអាមេរិក USGS បានចេញបម្រាមគ្រោះថ្នាក់ក្នុងកម្រិតពណ៌លឿង ទាក់ទងមហន្តរាយកើតឡើងដោយសារតែការរញ្ជួយដី និងធ្វើឲ្យបាត់បង់ជីវិតមនុស្ស ទ្រព្យសម្បត្តិប្រជាពលរដ្ឋក្នុងតំបន់នោះ ។ ប្រភពបន្តថា អគារនៅក្នុងតំបន់មានកម្ពស់ខ្ពស់ និងធំផង ប៉ុន្តែការរញ្ជួយដីនេះ នៅតែបណ្តាលឲ្យអគារទាំងនោះញាប់ញ័រដដែល ។
ការរញ្ជួយដីនេះបានធ្វើឲ្យកក្រើកញាប់ព័រនៅទូទាំងភាគឦសានឥណ្ឌា និងនៅរដ្ឋធានី ដាកា ប្រទេសបង់ក្លាដែសផងដែរ ។ បណ្តាញទូរទស្សន៍ក្នុងតំបន់បានផ្សព្វផ្សាយថា មនុស្សយ៉ាងតិច២៤នាក់ត្រូវបញ្ជូនទៅកាន់មន្ទីរពេទ្យ បន្ទាប់ពីការរញ្ជួយដីនេះកើតឡើង ។
ហេតុការណ៍ស្រដៀងគ្នានេះដែរបានកើតឡើងនៅភាគឦសានរដ្ឋធានី Guwahati ប្រទេសឥណ្ឌា ដែលនៅទីនោះអគារច្រើនខ្នងត្រូវរងការបាក់បែកដោយសារតែការរញ្ជួយដីនេះផងដែរ ។ ពុំទាន់មានសេចក្តីរាយការណ៍ភ្លាមៗនោះទេស្តីអំពីគ្រោះថ្នាក់រហូតដល់អាយុជីវិតនៅក្នុងប្រទេសឥណ្ឌាដោយសារការរញ្ជួយដីនេះ ៕
ប្រែសម្រួល៖ ថាច់ យ៉ាត
