ខេត្តបាត់ដំបង ៖ កាលពីវេលាម៉ោង១០ និង៣០នាទីយប់ថ្ងៃទី១០ ខែធ្នូ ឆ្នាំ២០១៩ មានករណីមន្ត្រីនគរបាលអន្តោប្រវេសន៍ម្នាក់សង្ស័យស្រវឹងស្រា បានទាញកាំភ្លើង​ខ្លីរបស់ខ្លួនបាញ់ អស់ចំនួន១៤គ្រាប់ តែ​ មិនបណ្តាលឲ្យនរណាម្នាក់រងរបួសនោះទេ គ្រាន់តែរត់ចែកជើងគ្នាប៉ុណ្ណោះ។ ហេតុការណ៍ខាងលើនេះបានកើតឡើង​នៅចំណុចភូមិអូរដាលើ ឃុំបឹងរាំង ស្រុក​កំរៀង ខេត្តបាត់ដំបង។

តាមប្រភពព័ត៌មានពីសមត្ថកិច្ចអាវុធហត្ថស្រុកកំរៀង បានឲ្យដឹងថា ជនសង្ស័យ ដែលបាញ់បោះដោយសេរីឈ្មោះ នៅ លីដា ជាមន្ត្រីនគរបាលអន្តោប្រវេសន៍ច្រកទ្វារ អន្តរជាតិដូង មានឋានៈជាវរសេនីយ៍ត្រី ដោយប្រើប្រាស់អាវុធខ្លី ធុន SIG SAUER។ ប្រភពបន្តថា រហូតដល់ម៉ោង១១យប់ថ្ងៃ​ដដែល កម្លាំងអាវុធហត្ថស្រុក សហការ​ជាមួយ កម្លាំងនគរបាលស្រុក ធ្វើការឃាត់ខ្លួនជនល្មើសបានភ្លាមៗផងដែរ។

ក្នុងពេលប្រតិបត្តិការនោះសមត្ថកិច្ច​ដកហូតសម្ភារ អាវុធខ្លី ១ដើម ដែលមាន​គ្រាប់ ក្នុងបង់ចំនួន៣គ្រាប់ និងគ្រាប់ក្នុង​ប្រអប់ ចំនួន១០៦គ្រាប់ សម្បកគ្រាប់៩គ្រាប់ព្រមទាំងរថយន្តLexus៣០០មួយគ្រឿងផងដែរ៕
នរិន្ទ្រ