ប្រទេសបារាំង៖ បើទោះបីបារាំងរឹតបន្តឹងសន្តិសុខ នៅក្នុងឱកាសបុណ្យគ្រីស្មាស Christmas និងចូលឆ្នាំថ្មីខាងមុខ ប៉ុន្តែ ការបាញ់ប្រហារនៅតែកើតមានឡើង ក្នុងប្រទេសនេះដដែល។
កាសែតបារាំង L’Est Republician នៅថ្ងៃទី២៦ ខែធ្នូ ឆ្នាំ២០១៩ បញ្ជាក់ថា៖ សំឡេងផ្ទុះអាវុធជាច្រើនបានលាន់ឮឡើង កាលពីថ្ងៃទី២៥ ខែធ្នូ នៅទីក្រុង Besancon ប្រទេសបារាំង ហើយមនុស្ស៣នាក់ បានរងរបួសត្រូវបញ្ជូនទៅកាន់មន្ទីរពេទ្យ ។
ប្រភពថា ការបាញ់ប្រហារកើតឡើង នៅក្នុងសង្កាត់ Planoise ទីក្រុង Besancon។ អ្នកស្រុកក្នុងតំបន់ បានអះអាងថា ការផ្ទុះអាវុធនៅទីនេះ គេបានឮសូរប្រហែល៣០លើក ។ ក្រុមអាជ្ញាធរដោះស្រាយគ្រាអាសន្ន បានបញ្ជាក់ថា៖ បុរសជាច្រើននាក់បាញ់ប្រហារគ្នា នៅពាក់កណ្តាលយប់ ដោយប្រើអាវុធស្វ័យប្រវត្តិ ។ មនុស្សយ៉ាងតិច៣នាក់ រងរបួស ក្នុងនោះម្នាក់របួសធ្ងន់ ។
អ្នកស្រុកម្នាក់ និយាយថា «ខ្ញុំស្មានថា មនុស្សគេចូលរួមអបអរបុណ្យគ្រីស្មាស Christmas ដោយការដុតកាំជ្រួចនោះទេ។ តាមពិតជាការផ្ទុះអាវុធសោះ»។
ការបាញ់ប្រហារនេះ បានកើតឡើង នៅតាមដងវិថី de Friborg ។ តំបន់ជិតខាងនេះទាំងមូលត្រូវប៉ូលិសបិទចរាចរណ៍ទាំងស្រុង ។ ក្រុមបច្ចេកទេសរបស់បារាំង បានទៅដល់កន្លែងកើតហេតុ និងមានវត្តមានរបស់កងកម្លាំងសមត្ថកិច្ចយ៉ាងច្រើនផងដែរ ។
សាក្សីខ្លះថា ឃើញបុរសម្នាក់គ្រវែងគ្រាប់បែក ។ សារព័ត៌មានក្នុងស្រុក បានផ្សាយថា មិនទាន់ដឹងថា ការវាយប្រហារនេះ ដោយសារមូលហេតុអ្វីនៅឡើយ៕
ដោយ៖ មែវ សាធី
